Den e articulo di e siman aki, mi kier toca un tema mas filosofico pero hopi relevante pa nos pais, cual ta e concepto di Meritocracia Intelectual. Normalmente den kadernan cientifico y den organisacionnan grandi optimalmente nos lo kier wak cu un idea/tema cu ta onderbouwd cu literatura y pensamentonan cualitativo lo tin cu suparsa idea/modonan di traha cu no tin e mesun caliber intelectual su tras. Despues di un discusion unda tur data y literatuur onderbouwing ta wordo analisa, e idea mas onderbouwd tin cu wordo acepta y implementa.

Lastimamente tur loke mi ta wak y tende via via, nos Isla ta leu di esaki. Kader personeel halto den gobierno privadamente sa acerca mi bisando: “Simon, bo tin 4 aña ta skirbi, kico bo a logra cu esaki? Nada no lo cambia toch.” Of pio unda via diferente tactica ta purba pest of te hasta intimida un analista. E cultura aki di “miedo intelectual” pa papia den canalnan publico over temanan impopular (cu onderbouwing hopi adecuado). Ta un problema fundamental cu tin cu cambia, si nos kier wak nos pais progresa berdaderamente.

Mi ta wak e como mi tarea como yiu di Tera, opgeleid academico pa ta un voz intelectual onderbouwd pa nos Isla. Si discusion riba nivel intelectual no pasa, lo nos wak e prome stap pa Aruba bira un Banana Republiek y te hasta bay den direccionnan mas autoritario te hasta. Den contexto aki mi lo sigui skirbi den speransa cu op den duur e berdad intelectual surpasa pensamentonan cu no tin e mesun fundeshi. Esaki semper ta pasa a plaso largo, pasobra e berdad intelectual semper ta gana.

E berdadnan impopular

Nos lo conclui e articulo aki, cu temanan sumamente impopular cu mester wordo aangepakt si nos kier nos Isla prospera riba plaso mas largo. Na prome lugar e tema economico mundial di debe gubernamental, deficitnan gubernamental, y balor directo y indirecto di placa ta uno cu varios pais manera te hasta Estados Unidos di Merca,Hapon, Italia y Francia tin problema grandi cune. Pa nos haci manera esaki no ta relevante pa Aruba, ta un actitud di avestruz. En berdad mi a toca e tema varios biaha di nos reserva monetario y te hasta unda kier “motiva” fondonan local pa cumpra Aruba su staatsobligaties di 5%, uno sumamente preocupante mes. Pasobra no lubida si problema resulta den esaki riba plaso largo, ta anos como pueblo lo haya e cuenta pa esaki.

Na otro banda tambe nos wak e fondonan social di Svb & AZV riba plaso largo, esta despues di 2035, cu nan lo ta bashi of casi bashi. Mi kier gewoon nota cu te cu ami sa, mi no a wak ningun beleidsstuk of plan concreto pa atende e tijdbom aki. Nos por gewoon analisa e modelonan matematico pa mustra cu mi tin rason den esaki. Pero simplemente nos ultra-kader ta kies pa no discuti esaki y den mi opinion den modo kinderachtig purba warda pa hende lubida e tema aki. Mi kier recorda lectornan cu esaki ta nos fondonan social cu ta e fundeshi di nos sociedad. Dus esaki merece atencion.

Tambe si nos wak e cuestion di Aruba su empresanan estatal, manera Setar, Elmar y Post N.V. Nos tin cu puntra nos mes hopi duidelijk si e organisacionnan aki lo tin derecho di existencia den contexto di innovacion global cu ta pasando tur rond mundo. Corda tambe cu ineficiencianan manera empresanan estatal cu ta wordo proteha y te hasta subsidia ta eigenlijk un impuesto indirecto riba pueblo di Aruba.

Gobierno Nobo: Campaña Bunita di PR pero 0.0 Contenido (Tot nog toe). Aunke mi no ta un PhD di politicologia di Universidad di Amsterdam, mi ta compronde cu imagen y “Public Relations” ta hunga un rol grandi den transcurso politico. Pero pa simplemente constantemente saca potret pa actonan cu na mi opinion no tin ningun of casi ningun balor agrega berdadero pa Aruba, ta un berguensa intelectual mi ta sinti.

Nos ultra-kader finalmente tin cu refleha profundamente, wak su mes den spiel y cuminsa e discusion intelectual di entre otro e temanan menciona. Pa simplemente ignora esakinan y saca “happy fotos” tur dia no ta un manera cu un pais moderno mester wordo goberna.