Mayoria parlamentario cla pa aproba mas uso di enkelband electronico en bes di sentencia cortico di prison

(NLTimes) – Un mayoria den Tweede Kamer ta cla pa sostene un proposicion di ley di D66 y CDA pa permiti huesnan condena personanan pa aresto na cas cu un enkelband electronico pa infraccionnan leve. Segun parlamentario Joost Sneller (D66) y Jeltje Straatman (CDA), esaki lo yuda soluciona e falta di celnan den prison sin mester laga personanan sali mas prome, RTL Nieuws a reporta.

Solamente personanan condena na un castigo di prison di 6 luna of menos lo cualifica pa usa un enkelband electronico na lugar di bay prison. Segun Sneller, esaki lo libera aproximadamente 400 cel pa aña.

“Cu e ley aki, huesnan por impone castigonan mas inteligente y impone detencion electronico na lugar di un sentencia cortico di prison. Esaki tambe ta libera mas espacio den prison pa tur criminal cu mester ta cera, pero cu awor ta cana liber pasobra no tin suficiente cel disponibel,” e parlamentario di D66 a bisa.

E proposicion di ley tambe lo duna huesnan e posibilidad di impone sentencianan di trabao comunitario mas largo cu ta posible awor. Segun Straatman, esaki ta duna huesnan mas espacio pa adapta un castigo apropia cu ta efectivo y cu por ser ehecuta lihe. “P’esey nos ley ta contribui na un Hulanda husto y sigur,” e parlamentario di CDA a bisa.

“Detencion electronico y sentencianan mas largo di trabao comunitario por contribui pa sentencianan cortico di prison — cu ta pone hopi presion riba e sistema penitenciario — ser impone menos biaha. Tambe e ta reduci e riesgo di ripiticion di crimen y di victimanan nobo, y ta alivia e presion riba e sistema penitenciario. E ta beneficia tur dos banda,” Sneller a bisa na RTL.

PRO, SP, PvdD, Volt, 50Plus y ChristenUnie ta sostene e plan aki, loke ta dun’e un mayoria parlamentario. Sinembargo, tanto ChristenUnie como 50Plus a enfatisa cu esaki no mester stop e construccion di mas cel.

“E ley aki ta un medida di emergencia doloroso, motiva pa e falta di prison. Mi ta sostene esaki pasobra mi ta prefera di mira un castigo cu ningun castigo. Na mesun momento, nos mester sigui traha riba expande e cantidad di cel,” parlamentario Jan Struijs di 50Plus a bisa.

E partidonan derechista JA21 y Groep Markuszower no ta sostene e plan. “Un castigo mester sinti manera un castigo. Keda na cas cu un enkelband electronico no ta sinti manera un castigo, sino manera un vakantie,” lider di JA21, Joost Eerdmans, a bisa.