Recientemente lider di fraccion PPA parlamentario Otmar Oduber a cuestiona e falta di respuesta pa su preguntanan tocante e caso di Ayden Lanoy. El a indica cu el a bolbe manda un rappel pa minister di Husticia, Arthur Dowers, pa e haya contesta riba un lista di pregunta largo cu el a manda anteriormente pa e mandatario den un esfuerso pa no laga e combersacion tocante e caso lamentabel aki muri sin cu a haya contestanan concreto.
Parlamentario Oduber a remarca cu el a manda un carta di recordatorio pa minister Dowers mirando cu den e caso di Ayden Lanoy a duna un tempo di tres luna pa e famianan haya resultado, pero tempo ta sigui pasa bay y te na e momentonan aki ainda tur e preguntanan cu el a manda pa minister Dowers no a ser contesta.
Anteriormente fraccion di PPA a presenta un amienda den cual nan a indica cu nan kier mira accion pa loke ta trata uso di bodycam y dashcam, test di droga den Cuerpo Policial, apoyo pa loke ta trata e aspecto psicologico y psikiatrico, y pa duna e fondonan pa training na cuerpo policial.
E lider di PPA ta urgi minister y gobierno pa bay parlamento pa discuti riba e proceso y no e investigacion pa demostra transparencia y respet pa comunidad y Parlamento di Aruba.
Den e carta cu parlamentario Oduber a manda pa minister Dowers, fecha 17 di april 2025, parlamentario Oduber ta referi na e caso lamentabel cu a sucede dia 9 di februari 2025 cu a cobra bida di Ayden Lanoy, un hoben di apenas 19 aña, debi cu miembronan di KPA a los tiro riba su persona.
Dia 11 di april 2025 OM a declara cu lo bay persigui e dos polis y a informa cu ta 20 tiro e agentenan a los riba e hoben como resultado cu un di e tironan aki tabata fatal.
Landsrecherche, cu ta un entidad independiente bou di liderazgo di OM ta haci e investigacion, pero esaki den opinion di pueblo ta dura demasiado tempo.
Oduber ta splica ta conoci cu cada miembro di KPA tin un autoridad di discrecion (“discretionaire bevoegdheid”) caminda e tin e espacio pa dicidi ki ora, den ki situacion y con pa actua. Ademas, KPA tambe mester sa kico mester haci despues cu un incidente tuma luga ora di por ehempel usa arma of ora un hende a fayece. Cu KPA (korpschef) tin 24 ora pa entrega un rapport di e sucedido na fiscal (officier van justitie), conforme articulo 38 y 50 di e Landsbesluit ambts- en gewelddadig optreden.
E parlamentario a enfatisa cu si tene cuenta cu e caso lamentabel aki a conmociona henter Aruba y tin duda di proceso di investigacion, como lider di fraccion di PPA e ta considera importante pa e minister concerni hiba combersacionnan necesario cu OM pa nan por acelera e proceso di investigacion pa asina mas pronto posibel comunidad, specialmente e famia di Ayden Lanoy, haya mas claridad riba e proceso y resultado di e investigacion.
Den e lista di pregunta cu parlamentario Oduber a manda pa minister Dowers e ta puntra e mandatario pa ki tempo OM lo tin e resultado y conclusion di e investigacion cla; si e minister por confirma si ta berdad cu unicamente un agente policial ta haya training pa uso di arma ora e caba su estudio y prome cu e cuminsa traha; si ta asina, kico ta e plan pa agentenan, specialmente esnan cu ta duna servicio publico ‘straatdienst’ sigui haya regularmente training debido pa uso di arma reglamentario; y si no ta asina, e parlamentario a puntra, cu ki regularidad e training na e agentenan cu ta duna servicio publico ‘straatdienst’, pa uso di arma reglamentario, ta tuma luga.
Oduber a recorda cu den un reunion publico yama pa fraccionnan di PPA, AVP y FUTURO dia 4 di maart 2025 por a compronde di e minister di Husticia e tempo ey cu tin un proyecto piloto pa bodycam pa polis, y no dashcam, sinembargo, el a señala, cu no tin mas informacion tocante e resultado di e proyecto, cu e gabinete actual lo inverti den entre otro implementacion di bodycam y dashcam.
Parlamentario Oduber ta puntra minister Dowers si ta berdad cu gobierno lo inverti den KPA pa entre otro implementacion di bodycam y dashcam, kico ta e suma cu lo inverti y pa ki tempo lo inverti den esaki.
E parlamentario ta indica tambe cu tur proyecto tin un inicio y un fin y tin cierto metanan cu kier logra. El a puntra minister Dowers si e por comparti e informacion di e proyecto piloto, pues uso di bodycam, te cu awor.
Oduber a puntra tambe si e proyecto a yega su final, of ta den proceso ainda, kico ta e resultado preliminar di e proyecto te cu awor; kico ta e retonan cu a detecta durante e proyecto piloto pa implementa uso di bodycam y dashcam; kico gobierno ta haci of ta bay haci pa atende cu e retonan aki; si un di e retonan ta cambio di ley pa uso di bodycam pa loke ta trata entre otro ley di privacidad, kico gobierno ta haci pa traha riba dicho ley; y con lo tene cuenta cu e cambionan di ley pa uso di bodycam y dashcam por ta efectivo.
E lider di fraccion PPA tambe ta cuestiona, den caso cu e proyecto piloto no a yega su final ainda, ki dia esaki lo finalisa, pa ki tempo y con lo implementa e uso di bodycam, pero tambe e uso di dashcam pa henter Cuerpo Policial.
Parlamentario Oduber ta señala cu durante e reunion publico di 4 di maart 2025 den parlamento por a compronde cu cualkier pregunta cu alto mando di KPA ricibi cu tin haber cu salud mental di un miembro di e cuerpo, nan mester atende cu esaki debidamente. Sinembargo, el a indica, cu nan a compronde for di Sindicato pa Polis Arubano (SPA) cu KPA no tin un psicologo den servicio.
E ta indica tambe cu for di aña pasa tin un proyecto di salud mental den KPA cu a ser aproba cu ta consisti di implementacion di un programa di salud mental pa tur miembro di KPA. E programa aki, segun el a splica, ta consisti di ehercicio, training y combersacion cu miembronan di KPA y e ayudo necesario cu ta brinda na nan.
Relaciona cu esaki Oduber a puntra minister Dowers kico specificamente e programa di salud mental aki ta encera; despues di un aña cu ta duna e programa aki, kico ta e resultado di e programa; kico ta e retonan cu KPA ta encontra den ehecucion di e programa aki; y den caso cu a encontra retonan, con e mandatario encarga cu Husticia ta yuda KPA pa e mitiga e retonan pa e programa por ta efectivo.
Oduber ta remarca tambe cu un psicologo den servicio di KPA ta importante y lo por yuda cu e programa di salud mental. El a puntra kico gobierno ta haci pa KPA por haya un psicologo den nan servicio, y pa ki dia e minister lo por garantisa cu KPA lo tin un psicologo den servicio.
El a menciona tambe cu segun e carta di SPA a stop cu e ‘Colegiale Ondersteunningsgroep’. El a cuestiona pa ki motibo a stop e y si minister tin pensa di reactiva esaki.
Por ultimo parlamentario Oduber ta indica cu dia 6 di maart 2025, como reaccion riba e mocion di fraccion PPA, cual a ser sosteni pa tur otro fraccion, Parlamento di Aruba a ricibi un carta di SPA indicando cu nan ta sostene e pensamento pa implementa test di droga riba e miembronan di KPA cu ta den servicio permanente, pero tambe ta di opinion cu mester haci esaki mas amplio den e aparato gubernamental y Parlamento di Aruba.
Relaciona cu esaki el a puntra kico ta minister Dowers su pensamento tocante test di droga riba miembronan di KPA y kico ta e pasonan cu gobierno lo tuma pa test di droga den KPA bira un realidad.
Parlamentario Oduber ta enfatisa cu ya ta cuater luna despues y ainda e famia di Ayden y parlamento ta warda riba contesta. El a remarca cu ta un falta di respet y transparencia cu ainda minister Dowers no ta ni contesta e preguntanan cu el a manda relaciona cu e caso tragico aki.
