E aña aki 19 ciudadano Arubiano a haya un condecoracion Real. Manera cu tabata e caso den añanan anterior, atrobe ta posibel na ocasion di celebracion di Dia di Rey 2026, pa nomina personanan cu ta bin na remarke pa haya un decoracion Real, popularmente bisa haya un “lintje”. Esaki por entrante 2 di juni 2025.

Na tur parti di Aruba hende ta compromete su mes cu comunidad. Hopi biaha nan ta haci esaki den silencio y tras di cortina, pero e personanan aki mester pone nan den spotlight. Un persona por merece un condecoracion si tin merito special pa sociedad. Esaki por ta trabou boluntario, pero tambe un elaboracion special di un funcion principal paga of combinacion di tur dos.

Ta trata di boluntarionan cu desinteresadamente a compromete nan mes durante 15 aña of mas cu organisacionnan, gruponan, barionan of personanan riba tereno di deporte, arte, cultura, religion, naturalesa, medio-ambiente, tereno social, trabou pa hubentud, cuido di adulto mayor, ordo publico
y siguridad.

Un persona cu ta funciona excepcionalmente bon na trabou tambe por bin na remarke. Den un caso asina ta trata di un merito special y excepcional cu ta bay considerablemente mas leu cu loke por spera normalmente y di cua sociedad ta beneficia.

Si bo conoce un persona asina, bo por nomina e persona aki pa ricibi un reconocemento special pa medio di un distincion Real. Cualkier hende incluso organisacionnan of institucionnan por entrega un nominacion asina. Mester entrega tur nominacion por escrito y tambe dos formulario special.
E formularionan aki cu e instruccionnan y splicacionnan lo ta obtenibel for di 2 di juni 2025 durante orario di oficina na e balie di oficina di gobernacion na Oranjestad, San Nicolas y na tur MFA.

Na Aruba, e decoratiecommissie ta encarga pa procesa e nominacionnan y haci investigacion acompañante. Ta manda e nominacionnan pa Hulanda via canalnan oficial unda e Nederlandse Kapittel voor de Civiele Orden ta procesa nan.

Pa por evalua debidamente e meritonan di e persona nomina, ta di gran importancia pa suministra tur informacion pidi mas completo posibel. E formularionan mester ta yena y firma completamente y e nominacion mester ta bon fundamenta.

Decoratiecommissie Aruba ta enfatisa cu e distincion Real mester ta un sorpresa pa e persona concerni. P’esey ta di sumo importancia pa no informa e candidato nomina di e nominacion y pa no envolvi e den yena e formularionan. Esaki tambe ta preveni decepcion si no otorga e premio.
Naturalmente bo no por entrega un nominacion pa bo mes.

E ultimo fecha pa entrega nominacion pa un distincion Real pa aña 2026 ta diahuebs, 31 di juli 2025, 4:00 PM. No ta procesa nominacionnan incompleto y nominacionnan ricibi despues di e fecha y orario ariba menciona. Tanto e Decoratiecommissie Aruba como e Nederlandse Kapittel pa e Civiele Orden lo considera solamente nominacionnan completo y na tempo.

Mester entrega e nominacionnan den un envelop seya na balie di oficina di gobernacion na Oranjestad. Ta dirigi e envelop na Decoratiecommissie Aruba c/o Oficina di Minister di Asuntonan General, L.G. Smith Boulevard 76, Oranjestad, Aruba.

Decoratiecommissie Aruba ta hopi contento cu hopi nominacion ta drenta cada aña y ta spera cu na 2026 lo reconoce hopi hende di e comunidad di Aruba pa e trabou importante cu nan ta haci pa comunidad y cu lo por bisti nan e “lintje” bon mereci durante celebracion di Dia di Rey 2026.

Si bo tin cualkier pregunta of ta desea di ricibi mas informacion, por fabor tuma contacto cu un di e miembronan di Decoratiecommissie Aruba:

  • dhr. Frank Croes (Tel: 565-3147)
  • mw. Annelien Tromp-Diaz (Tel: 594-1640)
  • dhr. Omar Harms (Tel: 561 1310)
  • mw. Dynia Abath-Muller (Tel: 735 0331)
  • mw. I. Nicolaas-Ras (Tel: 584-8880)
  • mw. R. Garrido (Tel: 593-1820)
  • mw. Mirella Wijngaarden (Tel: 564-5778)

Tambe por tuma contacto cu e comision via e-mail: condeco.aruba@gmail.com