Recientemente fraccion MEP den Parlamento di Aruba a manda un serie di pregunta pa minister di Energia, Arthur Dowers, tocante e nombramento recien di Frederick Nuboer como miembro di e Conseho di Supervision (Raad van Commissarissen) di Utilities Aruba NV y Refineria di Aruba NV.
Den e carta fraccion MEP ta expresa su preocupacion riba e competencia y integridad di Nuboer, si tene cuenta cu su pasado. E fraccion ta splica cu na 2021, Nuboer a renuncia como presidente interino di Algemene Rekenkamer Aruba (ARA) despues cu e tabata envolvi den un caso unda el a keda deteni pa motibo di buracheria den publico.
Prome cu esey, e fraccion a sigui splica, e tabata director na e compania di aviacion Insel Air, caminda iregularidadnan financiero serio a surgi bou di su liderazgo. Iregularidadnan manera, entre otro, falta di pago di belasting y contribucionnan di seguro social.
Fraccion MEP ta remarca cu nombramento pa posicionnan di supervision dentro di companianan estatal strategico mester ta basa riba integridad, experticio y transparencia. Den e caso aki, e fraccion ta haya cu e pasado di Nuboer ta lanta preguntanan tocante su habilidad pa supervisa empresanan critico dentro di e infrastructura di energia y economia.
E carta ta consisti di un total di 14 pregunta, a ser firma pa parlamentario Edgard Vrolijk. Parlamentarionan di MEP ta puntra minister Dowers si e por confirma cu recientemente Sr. Frederick Nuboer a ser nombra como miembro di Hunta di Supervision di Utilities Aruba N.V. y Refineria di Aruba N.V., y si ta asina, nan ta pidi e mandatario pa indica riba ki fecha(nan) e citanan ey a tuma luga.
Nan ta pidi e minister pa duna un splicacion di ki proceso a ser hiba pa e nombramento aki, ta puntra ki criterionan di seleccion a ser usa, y si a haci un evaluacion di capacidad of integridad independiente.
Fraccion MEP tambe ta puntra minister Dowers si e ta na altura cu na 2021 Nuboer mester a renuncia di su funcion na Algemene Rekenkamer Aruba pa motibo di un incidente di buracheria publico y mal conducta, cu a daña seriamente e autoridad di e organo di supervision aki, y con a tene cuenta cu e historia aki den e decision pa nombr’e den e Hunta di Supervision.
E fraccion ta puntra e mandatario si e ta na altura di e critica publico cu Nuboer a ricibi como ex director di Insel Air Aruba, unda cu debenan importante di impuesto y seguronan social a ser construi bou di su liderazgo, cu consecuencianan negativo pa empleadonan y finanzas di gobierno, y con a tene cuenta cu e antecedentenan aki den e evaluacion di Nuboer pa su nombramento.
Ademas nan ta puntra e mandatario si e ta considera ta responsabel y den liña cu bon gobernacion cu un persona cu e pasado ey ta ser nombra den funcionnan di supervision na companianan estatal strategico cu ta di importancia crucial pa Aruba su politica energetico y economico.
E fraccion ta puntra si como minister encarga cu energia e ta prepara pa reconsidera of suspende temporalmente e nombramento di Nuboer pendiente pa un evaluacion adicional di su capacidad y integridad.
Adicionalmente fraccion MEP ta pidi e mandatario pa duna e parlamento un bista di tur e miembronan di e Hunta di Supervision di tanto Utilities Aruba N.V. como Refineria di Aruba N.V., incluyendo e duracion di nan nombracion y nan antecedente profesional.
Por ultimo, e fraccion ta puntra minister Dowers ki pasonan su ministerio ta tumando pa garantisa e integridad, transparencia y capacidad di supervisornan dentro di empresanan estatal, y si tin un cuadro legal of di politica cu ta inclui criterianan di evaluacion.
Finalisando e carta e fraccion ta subraya cu mirando e importancia di bon gobernacion y confiansa publico den maneho di empresanan estatal, nan ta pidi pa minister Dowers contestanan e preguntanan por escrito di urgencia y no mas tarda cu dentro di 2 siman.
Aña pasa den luna di juli tambe nombramento di Nuboer como director interino di Arubus a causa controversia. Prome minister e tempo ey, actual parlamentario Evelyn Wever-Croes a indica cu aunke Gobierno no por a tuma decision of cambia e decision di Aruba, nan a pidi e compania pa reconsidera e nombramento e tempo ey.
