(Infobae) – Jhon Smith Cruz Arce, conoci como ‘Jhon Pulpo’ y fundador di e organisacion criminal Los Pulpos de Trujillo, a celebra su liberacion cu un fiesta cu a inclui e participacion di e cantante popular di cumbia Tony Rosado, segun imagennan publica pa e website di Investiga.
Segun fuentenan cita pa medionan local, e celebracion a tuma lugar dia 18 di juli, apenas cuater dia despues cu Cruz Arce a sali for di e prizon Challapalca na Tacna. E imagennan viral ta mustra “Jhon Pulpo” para contento cu varios amigo. E fiesta tambe a ser anima pa ex miembronan di un conocido banda musical di e districto di Guadalupe.
Te awe no ta conoci unda Cruz Arce ta. Su abogado, Jorge Gutiérrez, a confirma na e programa Ocurre Ahora cu el a perde contacto cu su cliente “desde cu prensa a cuminsa bombardi’e den tur medio di comunicacion.”
Investigacion a revela cu ‘Jhon Pulpo’ por a biaha pa Chile, caminda ta supone cu su yiu homber, Jhonsson Smith Cruz Torres, alias ‘Jhonsson Pulpo’ , ta, pa ken gobierno ta ofrece un recompensa di 500 mil soles pa informacion tocante su paradero.
Di acuerdo cu un documento policial cita pa Ocurre Ahora, e ultimo caminda e tabata mira segun informe tabata den e ciudad di Rancagua, Chile, despues di tabata un fugitivo na Bolivia. E informacion tambe ta detaya cu Cruz Torres ta mantene un relacion estrecho cu su medio ruman, Eddy Armando Cruz Arce, kende, segun e certificado di inmigracion, ta residencia den e pais sur desde 2 di augustus 2008.
Cruz Arce tin mas cu 40 aña di historia criminal pa crimennan incluyendo homicidio, extorsion, heridanan serio y atraco agrada. Den La Libertad so, e tin 19 caso penal habri.
