Durante un conferencia di prensa ayera mainta Eduard Pieters, fractie medewerker di fraccion PPA, a trece dilanti e topico di Ley di Reino pa Supervision Financiero (Rijkswet). Pieters a remarca cu te ainda pueblo no por haya bista di kico e Rijkswet ta encera y ya ta mas cu mitar di aña a pasa bay.
Pieters a splica cu desde final di januari fraccion PPA a entrega un peticion pa gobierno bay Parlamento di Aruba y splica den un reunion publico pa duna un splicacion detaya tocante e Rijkswet, cual mester a ser yama dentro di 30 dia, pero te dia di awe, siete luna despues e reunion no a ser yama.
El a indica cu en berdad Parlamento a haya un presentacion di e ambtenaarnan tocante un concepto di e Rijkswet y eynan por a ripara cu na final di september den Conseho di Minister di Reino na Hulanda lo trata un concepto di e Rijkswet.
“Parlamento te dia di awe no a haya oportunidad pa trece esaki den pueblo. Parlamento ta esnan cu ta representa pueblo y esaki no ta sucede. E proceso aki ta un proceso caminda cu na Hulanda un grupo di ambtenaar ta bay tuma cierto decision, ta schets e ley aki y e ta bay prome na Den Haag den Conseho di Minister di Reino, despues Tweede Kamer y por ultimo e ta bin Parlamento di Aruba,” el a indica.
Pieters a recorda cu den luna di mei eigenlijk tabata e deadline, pero niun decision a ser tuma y p’esey PPA a yama e reunion na januari pa trata e ley aki y haya e sentimentonan di pueblo pa prome cu e deadline tuma decision, pero esey no sucede y awor como consecuencia di e falta di tumamento di decision Aruba ta pagando un interes di 6,9% riba e prestamo cu a haya for di Hulanda, cual Pieters a señala tambe ta cuestionable.
El a splica cu e ta bisa cu e ta cuestionable pasobra den un forma pisa, memey di un pandemia, no un incidente cu a pasa na Aruba so pero un pandemia cu a afecta henter mundo, caminda Aruba mester a fia placa pa sigui cu bida na Aruba, nan probecha y awor nan ta cobra e placa aki banda di e 6,9% di interes.
“Awe nos ta wak tin falta di liderazgo. Pakico mi ta bisa esaki, pasobra si nos tin un liderazgo cu curashi awe nos por trece e puntonan aki y splica pueblo kico ta loke e ambtenaarnan a trece pa dilanti. Falta di liderazgo tambe pa uni e pueblo aki. Si nos wak di añanan 40 bin te aña 86, door di union cu tabatin a logra nos status aparte. P’esey tambe PPA for di inicio tabata papia di un frente nacional consistiendo di e mesun politiconan, pero tambe di e gremio comercial y gremio sindical,” el a indica.
El a splica na luna di juni fraccion di PPA a yama un reunion cu gremio comercial pa sinta cu nan y splica nan kico ta pasando, na cual gremio comercial a sali bisa cu nan no ta compronde kico ta balor agrega di parlamento pasobra parlamento e momento ey no a haya informacion tocante kico e Rijkswet ta.
“Nos ta biba den un estado di derecho nos ta biba den un democracia parlamentario y e ora bo ta haya cu nan ta cuestiona, cu tur nan rason, e derecho di existencia di parlamento, e por ta algo peligroso,” el a subraya.
Pieters a splica cu siguiendo cu e insistencia pa un frente nacional, fraccion PPA a reuni tambe cu gremio sindical y a informa gremio sindical tocante kico tabata e concepto cu lo bay bin riba mesa pa loke ta trata Rijkswet.
El a sigui splica cu despues di e reunion aki un sindicato a trece dilanti cu e Rijkswet no tin draagvlak. Esaki, el a remarca, ta un di e motibonan pakico PPA semper a boga pa informa hendenan, gremionan, tocante e Rijkswet pa asina ora cu mester cu mester tuma decision tin e draagvlak.
“Un parti importante ta autodeterminacion pasobra cu Rijkswet tin peliger di perde esaki, cual tanto a lucha p’e y esaki ta cosnan cu gremio a vocifera y p’esey nan kier ta den dialogo cu gobierno pasobra dia di mañan e ta afecta nan tambe,” el a enfatisa.
Por ultimo Pieters a subraya cu tin un sin fin di falta di tumamento di decision y p’esey fraccion PPA ta haya cu tin falta di liderazgo riba e pais aki. “Un falta di liderazgo efectivo, un falta di liderazgo caminda nos por transforma e pueblo aki y esey ta hopi di lamenta,” el a resalta.
Pa loke ta trata e frente nacional, Pieters a sigura cu fraccion PPA no lo stop di insisti pa forma e frente nacional aki y nan ta spera cu den futuro cercano gobierno por yama tambe un dialogo nacional.
Manera ta conoci dia, 1 di mei ultimo tabata stipula como e deadline pa Gobierno di Aruba y Hulanda yega na un acuerdo riba Rijkswet financieeltoezicht (ley di Reino pa supervision financiero) y entrega e proyecto di ley aki na Parlamento di Aruba y Tweede Kamer. Despues cu no a logra cumpli cu e deadline, Secretario di Estado e tempo ey, Zsolt Szabó, a anuncia cu lo aumenta e interes cu Aruba mester paga riba pendiente di 5,1% pa 6,9%. E prestamonan aki ta e prestamo cu Aruba a haci durante pandemia di Covid-19.
Na nivel oficial actualmente ta trahando riba e contenido di e concepto di ley di Reino. Na momento cu ambos gobierno bay di acuerdo cu e proposicion, esaki lo ser entrega pa un ronda di conseho na Aruba y un consulta na Hulanda. Despues di procesa e conseho, ta keda na Conseho di Minister di Reino pa entrega e proyecto di ley na Conseho di Estado di Reino pa conseho.
Y mientras cu den prensa local a publica cu Hulanda no ta bay sigui cu e Rijkswet, e realidad ta cu e proceso pa yega na un tipo di rijkswet ainda ta andando. Ta simplemente cu e ley mester tin consenso entre Aruba y Hulanda, algo cu e propuesta di ley anterior no tabatin, y awo mester bin cu un propuesta cu si lo conta cu sosten den Parlamento di Aruba y alabes ta algo aceptable pa Hulanda.
Loke ta keda ta pendiente ta pa mira si e proceso parlamentario lo por cuminsa e aña aki ainda. Na momento cu e Rijkswet di Aruba drenta na vigor, Hulanda lo baha e tasa di interes na un nivel di conforme mercado mas un toeslag chikito, manera ta conta caba pa Corsou y Sint Maarten cu 3,1%. Mientras tanto, Parlamento di Aruba ainda no a reuni tocante e topico aki.
