(AP) — Migrantenan na Grecia cu solicitud di asilo rechasa ta bay ta rekeri pa bisti monitor di enkel como parti di medidanan planea pa agilisa deportacion, segun un oficial di gobierno a anuncia dialuna.
Minister di Migracion, Thanos Plevris a bisa cu medida ta programa pa keda implementa prome cu fin di aña bao reformanan cu lo criminalisa no cumpli cu orden di deportacion.
“E uso di monitoreo electronico ta bay laga cla cu e opcionnan a bira menos,” Plevris a bisa radio estatal ERT.
E regulacionnan mas pisa, incluyendo castigo di prison obligatorio pa desafia orden di deportacion, ta bay keda entrega na Parlamento otro luna, despues di un atraso di berano causa pa un aumento den yegada di migrante for di Libya na e isla di Crete.
Plevris a bisa cu ta bay aplica monitoreo electronico durante un periodo di cumplimento di 30 dia otorga na migrantenan despues cu nan solicitud di asilo keda rechasa y no tin mas apelacion posible. El a agrega cu gobierno tambe ta considerando un bonus di deportacion di 2mil euro pa esnan dispuesto pa cumpli.
Politicanan fuerte di migracion introduci pa gobierno conservador di Grecia – incluyendo un prohibicion recien contra solicitud di asilo pa migrantenan yegando via lama for di Nort Africa – a genera critica di Conseho di Europa y gruponan di derecho humano.
