Siman pasa, noticiero internacional Reuters a publica informacion indicando cu tankernan di compania petrolero Chevron a cuminsa regresa Venezuela despues di a ricibi un licencia nobo for di Merca. Loke a hala atencion localmente, ta cu e tankernan tabatin Aruba como destinacion inicial.

Segun datonan di shipping, por lo menos tres tanker cu Chevron (CVX.N) a usa pa transporta crudo Venezolano pa Merca tabata nabega den direccion di awanan di e pais Sur Americano diahuebs ultimo, cu exportacion cu ta spera di reanuda mas laat e luna aki, despues di un licencia nobo di Merca.

Departamento di Tesoro di Merca fin di luna pasa a autorisa Chevron pa opera den e nacion OPEC sanciona atrobe, exporta su zeta y haci intercambio cu e compania estatal PDVSA a traves di un licencia restringi cu ta prohibi cualkier pago na gobierno di Venezuela.

E reportahe ta indica cu e tankernan charter pa Chevron, MediterraneanVoyager y Canopus Voyager tabata acercando Aruba, segun datonan di monitoreo di barco di LSEG a mustra. Un di tres barco, Sea Jaguar, tabata nabega for di Europa cu Aruba tambe como su destinacion inicial.

Exportacion di azeta di Venezuela a baha te na 727 mil bari pa dia luna pasa, mientras cu e partnernan di empresa conhunto di PDVSA, incluyendo Chevron y algun otro compania Europeo, tabata warda riba autorisacionnan di Merca pa reanuda nan operacionnan.

Dia 1 di augustus, Reuters a reporta cu CEO di Chevron, Mike Wirth a bisa cu e compania ta anticipa cu su exportacionnan di crudo Venezolano pa Merca lo reanuda e luna aki, despues di ricibi un licencia restringi e siman aki di Departamento di Tesoro pa opera den e pais sanciona y haci intercambio di azeta.

Wirth tambe a bisa den un yamada, pa divulga e resultadonan trimestral di e compania, cu e exportacionnan lo cuminsa cu un “cantidad limita”, y a agrega cu e no ta spera cu e fluho lo tin un impacto material riba e resultadonan di e di tres trimester.

Chevron su exportacion di azeta Venezolano a keda suspendi for di april, na momento cu e compania estatal Pdvsa a cancela carga cu tabatin programa cu partner di joint-venture pa motibo di problema cu pago, relaciona cu e sancionnan di Merca riba e pais di OPEC.

Lectornan di Bon Dia Aruba por recorda cu na maart, administracion di presidente Mericano, Donald Trump a revoca un licencia otorga na Chevron bao di ex-presidente, Joe Biden. Administracion di Trump y un manyen di partner di Pdvsa tabatin te fin di mei pa conclui cualkier transaccion.

Luna pasa, Washington a bay di acuerdo pa reinstala e licencia di Chevron despues di un intercambio exitoso di preso cu Venezuela. Miembronan di Congreso Mericano tambe a urgi pa otorga e autorisacionnan pa azeta di nobo, pa evita cu barinan di petroleo Venezolano bay China.

Partnernan Europeo di Pdvsa ainda no a ricibi autorisacion pa reanuda nan operacionnan na Venezuela ni pa exporta petroleo pa refineria, segun fuentenan di compania.

Prome cu cancelacion di e licencia, Chevron tabata exporta alrededor di 250mil bari pa dia (bpd) di crudo Venezolano den prome kwartaal di aña, segun datonan basa riba movecion di barco. Esey ta representa 29 porciento di e exportacion total di e pais.

E autorisacion nobo ta similar na e licencia di tempo di Biden. Sinembargo, e licencia nobo ta prohibi e administracion di presidente Venezolano, Nicolas Maduro, di ricibi cualkier pago, segun fuente y informacion suministra pa oficialnan di Merca.

Desde cu Washington a aproba e licencia, Chevron a cuminsa negocia un mecanismo nobo di extraccion cu Pdvsa, cu tin problema di likides.

Ta spera cu e areglo lo inclui pago di royalties obligatorio y impuesto na Venezuela en natura, cu por bin di un porcion di crudo produci conhuntamente, of a traves di intercambio di petroleo cu Chevron, cu ta suministra Venezuela cu diluyente, segun e fuentenan.

Unidad Venezolano di Chevron tambe a ordena inspeccion nobo di terminalnan di carga di Pdvsa, prome cu cualkier contract di fleta di barco, segun fuentenan di transporte a indica.

E refinadornan di Costa di Golfo Mericano a tuma e volumen mas halto di crudo di Medio Oriente y Sur America na juli pa compensa e perdida di barinan Venezolano, segun datonan di barco a mustra.

“Aunke nos a anticipa cu e entrega lo bolbe Merca den un tempo cortico, comentarionan di CEO, Mike Wirth ta indica cu nos no mester spera un recuperacion na volumen cu a mira na comienso di aña pronto,” Matt Smith, un analista principal di petroleo na Kpler, a bisa.

E refinadónan di Kosta di Golfo di Merka a kohe volúmennan mas haltu di krudo di Medio Oriente i Sur Amérika na yüli pa kompensá e pèrdida di barinan Venezolano, datonan di rastreo di barku a mustra.

“Ounke nos ta antisipá ku entreganan lo regresá na Merka den un tempu kòrtiku, komentarionan di CEO Mike Wirth ta indiká ku nos no mester spera un rekuperashon na e volúmennan ku a mira na kuminsamentu di aña pronto,” Matt Smith, un analista prinsipal di zeta na Kpler a bisa.

Comienso di luna, Chevron y Valero Energy a cuminsa traha pa reanuda suministro di crudo Venezolano na refinerianan Mericano di Valero, bao un acuerdo cu tabata pausa, tres fuente cercano na e preparacionnan a bisa diamars, despues di e licencia nobo cu Merca a otorga na Chevron.

Mientras Chevron tabata warda pa compania estatal Venezolano Pdvsa aloca carga pa entrega na augustus, Chevron y Valero tabata negociando detaye di nan acuerdo, incluyendo reanuda operacion barco-pa-barco cerca di Aruba.

E transferencia di carga di Valero cerca di Aruba lo reanuda e luna aki, despues di inspeccion obligatorio y contract di barco den negociacion, un di e fuentenan a bisa.

Chevron y Valero no a responde inmediatamente na solicitud pa comentario.

Den prome kwartaal, prome cu a revoca e licencia di Chevron pa opera na Venezuela, Chevron a suministra como 50mil bari pa dia di crudo pisa na e refinerianan di Valero for di Aruba, segun data di shipping.

E volumen tabata representa como 20 porciento di e exportacion total di Chevron di azeta Venezolano den e periodo ey, segun e data ta mustra. E suministro aki ta clave pa e di dos joint venture mas grandi di Chevron na Venezuela, Petroboscan den region occidental di Venezuela, pa motibo di limitacion den almacenahe di e crudo pisa Boscan produci pa e proyecto aki, cu a forsa recorte di produccion den pasado.