(AP)—Israel ta den discusion cu Sur Sudan tocante e posibilidad pa relocalisa Palestinonan for di e Franha di Gaza den e pais Africano cu ta den guera, como parti di un esfuerso mas amplio di Israel pa facilita un emigracion masivo for di e teritorio cu a keda destrui despues di su ofensiva di 22 luna contra Hamas.
Seis persona familiar cu e situacion a confirma e dialogonan na The Associated Press. No ta cla cu leu e discusionnan a yega, pero si nan implementa e plan, esaki lo encera move hende for di un pais cu a sufri di guera y ta na riesgo di hamber, pa un otro den mesun condicion, y lo causa preocupacion di derecho humano.
Prome minister di Israel, Benjamin Netanyahu, a bisa cu e kier realisa e vision di presidente di Merca Donald Trump pa relocalisa gran parti di e poblacion di Gaza den loke Netanyahu ta yama “migracion boluntario.” Israel a propone plannan similar na otro paisnan den Africa.
“Mi ta pensa cu e cos corecto pa haci, segun ley di guera manera mi sa nan, ta pa laga e poblacion sali, y despues bo ta bay cu tur bo forsa contra e enemigo cu keda,” Netanyahu a bisa diamars den un entrevista cu i24, un stacion di television Israeli. E no a menciona Sur Sudan.
Palestinonan, gruponan di derecho humano, y gran parti di e comunidad internacional a rechasa e propuesta como un plan pa expulsacion forsa, en contra di ley internacional.
Rol y motivacion di Sur Sudan
Pa Sur Sudan, un acuerdo asina por yuda fortalece laso cu Israel, actualmente e potencia militar casi no desafia den Medio Oriente. Tambe e lo por crea caminda pa acerca Trump, ken a presenta e idea di relocalisacion di e poblacion di Gaza den februari, pero cu aparentemente a retira e idea den e ultimo lunanan.
Ministerio di Asunto Exterior di Israel a nenga di comenta y e ministerio di Asunto Exterior di Sur Sudan no a contesta preguntanan tocante e dialogo. Departamento di Estado di Merca a bisa cu e no ta comenta riba combersacion diplomatico priva.
Joe Szlavik, fundador di un firma di lobby di Merca cu ta trahando cu Sur Sudan, a bisa cu oficialnan di Sur Sudan inform’e tocante e discusionnan. Segun e, un delegacion di Israel tin plan pa bishita e pais pa mira e posibilidad di establece camponan pa Palestino. No tin fecha fiho pa e bishita. Segun Szlavik, Israel probablemente lo paga pa camponan temporal.
Edmund Yakani, lider di un grupo di sociedad civil di Sur Sudan, tambe a bisa cu el a papia cu oficialnan di e pais tocante e discusionnan. Cuater otro oficial cu tin conocemento di e dialogo a confirma cu nan ta tumando luga, pero a pidi anonimidad.
Dos di e oficialnan, di Egipto, a bisa cu nan tabata sa pa varios luna cu Israel ta buscando un pais pa acepta Palestinonan, incluyendo Sur Sudan. Nan a bisa cu nan ta lobby contra Sur Sudan tuma e Palestinonan. Egipto ta fuertemente contra e plan pa move Palestinonan for di Gaza pasobra nan tin miedo cu refugiadonan lo drenta den su teritorio.
Otro intento di relocalision y e situacion di Sur Sudan
AP anteriormente a reporta tocante e discusionnan similar cu Israel y Merca a inicia cu Sudan y Somalia, y tambe cu e region separatista di Somaliland. No ta cla e status di e dialogonan.
Szlavik a bisa cu Merca ta consciente di e discusion cu Israel, pero no ta involucra directamente. Sur Sudan ta busca pa e administracion di Trump kita e prohibicion di biahe riba e pais y pone sancion contra cierto figuranan elite di Sur Sudan. E pais a haya ocho persona deporta for di Merca, posiblemente pa gana fabor.
“Sur Sudan cu poco recurso mester tur aliado, beneficio financiero y seguridad diplomatico cu e por haya,” segun periodista Peter Martell. Segun su buki, agencia di spionahe Mossad di Israel a yuda Sur Sudan durante su guera di independencia contra e gobierno di Jartum, prome cu independencia den 2011.
Temor y rechaso for di parti Palestino
Muchanan Palestino lo por desea di sali for di Gaza, sikiera temporalmente, pa scapa di guera y hamber, pero nan ta rechasa di permanentemente sali di loke nan ta considera un parti integral di nan nacion. Nan tin miedo cu Israel no lo laga nan bolbe, y cu un salida masivo lo habri caminda pa Israel anexa Gaza y reestablece colonianan Hudiu, manera e ministernan ultra-derecha ta pidiendo.
Asina mes, hopi Palestino no lo risca bay Sur Sudan, un di e paisnan mas instabil y conflictivo na mundo. Sur Sudan no a logra recupera for di su guera civil cu a cuminsa despues di su independencia, cual a mata casi 400.000 persona y a hinca parti di e pais den hamber. E pais rico den petroleo ta enfrentando corupcion y ta depende di ayudo internacional pa alimenta su 11 miyon habitante, un reto cu a crece despues cu e administracion Trump a corta ayudo den exterior.
Un acuerdo di paz di siete aña pasa ta fragil y no completo, y e menasa di guera a bolbe ora cu e lider di oposicion principal a ser pone bou aresto domiciliario e aña aki.
Yakani a bisa cu Sur Sudan mester sa ken ta bin y pa cuanto tempo nan lo keda, sino lo tin hostilidad pa motibo di “asuntonan historico cu Musulman y Arabe.”
“Sur Sudan no mester bira un lugar pa tuma hende cu otro pais no kier,” el a bisa. “Y e no mester tuma hende como ficha di negociacion pa mehora relacion.”
