Dialuna mainta Dienst Openbare Werken (DOW) a tene un conferencia di prensa unda a elabora un poco riba e proyecto di revitalisacion na San Nicolas, specificamente den Bernard van de Veen Zeppenfeldstraat. Ademas a anuncia plan pa instala mas verkeersplateau y a duna actualisacion di e proyecto di “Micro Paving” riba Green Corridor.

Atendiendo preocupacion tocante B v/d Zeppenfeldstraat
Como nan prome punto di enfoke di e conferencia, director suplente di DOW Sr. Francis Gomez a enfatisa cu e trabaonan cu tabata tumando luga den e area aki tabata parti di e proyecto pa revitalisa di San Nicolas, cual tabata un vision di gobierno cu a haya sosten di minister di Economia Geoffrey Wever. E proyecto aki cu recien a finalisa tabata encera e versmalling di e caminda, unda a splica cu a lag’e na 6 meter hancho—e standard cu ta usa pa camindanan riba e isla. Tambe a enfatisa cu a amplia e hanchura di e bermen pa asina por crea mas espacio pa peatonnan cana y reconstrui e crusada na comienso di Mainstreet.

Luna pasa Bon Dia Aruba a reporta tocante e preocupacionnan cu pueblo tabatin pa e proyecto aki, unda varios comentario riba red social a cuestiona si e lo bira un ‘eenrichtingsverkeer’ y si esaki lo afecta e movemento di truck y carosanan durante paradanan di Carnaval. E tempo aki minister Wever ya a splica cu e caminda lo keda uno di dos direccion. Durante e conferencia di prensa, Sr. Gomez a agrega cu DOW a tuma cuenta di e truck y carosanan durante temporada di Carnaval, splicando cu a laga e stupi “overrijdbaar” pa asina e truck y carosanan por maniobra facilmente riba nan sin keda pega of sin cu e stupi lo causa daño. Pa loke ta e reconstruccion di e crusada, a splica cu a pone atencion pa mehora seguridad y bista riba e crusada.

Instalacion di verkeersplateau

Pa loke ta verkeersplateau riba nos isla, a splica cu esaki ta pa atende e problema di velocidad halto riba caminda. Segun e director suplente, DOW ta construi 10 plateau pa aña dependiendo su presupuesto. Ademas a enfatisa cu actualmente e instancia tin un lista di peticionnan pa instala e plateaunan aki y ta wardando pa e ultimo fase di aprobacion finalisa pa por cuminsa cu e trabaonan.

Sr. Gomez a splica cu prome cu un area yega na remarke pa mantencion, ta considera varios aspecto. Un di nan ta e necesidad pa esaki en relacion cu e peligro cu e ta presenta, por ehempel si tin mal bista riba crusadanan (blinde bocht). Un otro aspecto ta e tipo di caretera envolvi. Manera a splica, camindanan principal no sa bin na remarke pasobra e tipo di camindanan aki ta permiti pa core cu velocidad halto. Mescos ta conta pa camindanan cu ta conecta diferente bario (ontsluitingsweg). Tambe mester evalua si ta trata di un scol of cas di cuido den bisindario, y si e caminda ta hopi largo—unda chauffeurnan por tin e tendencia pa aumenta nan velocidad. E verkeersplateau lo kibra momentum di e caretera, treciendo mas seguridad pa trafico y peaton.

Pa loke ta encera e localisacion di e verkeersplateau, DOW a sigura cu ya a dicidi unda lo instala esakinan y cu despues di aprobacion lo cuminsa implementa nan.

Introduciendo un metodo nobo na mantencion di caminda
Tur aña Aruba ta enfrenta deterioro di nos camindanan, unda varios careteranan ta keda cu buraco of scheur cu ta causa strobacion di trafico y daño na autonan. Durante temporadanan di yobida, e problema aki ta empeora y constantemente ta mira ciudadanonan trece nan preocupacionnan pa dilanti, apelando na e instancia pa interveni lo mas liher posible y yena e buraconan cu ta stroba trafico.

Durante e conferencia di prensa, project manager di e proyecto Green Corridor, Lisandro Wernet di CIC a atende e asunto di mantencion di nos careteranan, unda a hala atencion riba un metodo nobo riba nos isla, e yamado “Micro Paving” cu ya ta ser usa mundialmente. Na februari por a nota un deposito di bultonan (saco blanco) cerca di e brug di Green Corridor. E tempo ey a enfatisa cu “Green Corridor lo cuminsa cu e prome camindanan pa aplica e Micro Paving. Nan lo cuminsa for di Yara bay pa Weg Fontein.”

Micro Pavement ta un mescla di polymer modifica, cual al contrario cu e metodo tradicional di basha asfalt cayente, ta ser aplica friu riba e capa di asfalt existente pa asina alarga e bida di e caminda. Manera a splica, e asfalta friu aki tin hopi awa y ora esaki evapora, e asfalt restante lo crea un capa cu ta fortalece e asfalt existente. A enfatisa cu esaki ta un sistema conoci mundialmente caba pero te awor a ser introduci pa Aruba. A splica cu a mira e beneficio di e metodo aki pa mantencion di caminda riba nos isla, specialmente despues cu e instancianan a observa e funcionalidad di Micro Paving na Colombia, unda trafico ta hopi mas druk. Tambe a bisa cu e metodo aki lo yuda preveni dañonan causa pa yobida, sigurando cu e capa lo keda bon cubri.

Sr. Wernet a sigui splica cu e implementacion di Micro Paving ta forma parti di un metodo preventivo, unda na momento apropia lo introduci e metodo pa mehora funcionalidad di e caminda ora esaki mustra señal di deterioro. A subraya cu e metodo aki no ta atende e restructuracion di caminda, pues no ta apto den casonan di camindanan completamente deteriora manera riba caminda di WEB bay Barcadera of Franse Pas.

Pa temporada di vakantie, a menciona cu a probecha di e reduccion di trafico riba camindanan principal pa aplica e metodo aki. Pa ora scol cuminsa a calcula cu e trabao riba caminda principal lo finalisa pa despues sigui cu Micro Paving den Savaneta, specificamente e caminda patras di Marinierskazerne bay Pos Chikito. E ultimo parti di e proyecto lo encera e caminda principal di aeropuerto, rotonde di Mahuma , Sero Teishi, Kibaima te rotonde di Pos Chikito. A calcula cu lo finalisa e proyecto pa october 2025.

Fondo limita

DOW a splica cu fondo pa mantencion di caminda ta limita, unda antes e instancia tabata 2,5 miyon florin tur aña pa trabao di mantencion. Sinembargo, a splica cu pa “haal in” e deterioro riba caminda lo rekeri un presupuesto di 18 miyon florin anualmente pa e proximo 25 aña. Sr. Daryl Lue, hoofdbeheer di infrastructura na DOW, a splica cu aña pasa e instancia a haya un presupuesto di 18 miyon florin unda a nota caba cu esaki a mehora operacion di DOW pa mantencion di caminda.

A splica cu e aumento di presupuesto pa e suma aki lo crea mas espacio pa DOW aborda partinan mas deteriora, manera e caminda di Barcadera.

Potretnan di DOW.