Mike de Meza a entrega otro caso sumario contra OM

Parlamentario di fraccion AVP, Mike de Meza ta continua cu su bataya legal. Despues di e sentencia cu Corte Comun di Husticia a dicta diabierna ultimo den e caso di apelacion di de Meza contra Ministerio Publico (OM), e parlamentario a entrega otro caso sumario contra OM.

Segun informacion publica pa un medio di comunicacion local, abogado di de Meza, Sra. Desiree Croes, a entrega otro caso sumario pa su cliente contra OM. Segun e portal di noticia local, abogado Croes a confirma cu e caso nobo aki su contenido lo ta mescos cu e prome enfocando riba dos peticion; primeramente ta pidi claridad y un splicacion duidelijk di kico ta e acusacionnan contra de Meza; y di dos ta pidi OM pa informa si nan ta bay persigui de Meza si of no.

Manera ta conoci diabierna atardi mediante un comunidad di prensa OM a informa cu den su sentencia Corte Comun di Husticia a rechasa e peticionnan cu de Meza a entrega den su caso di apelacion contra e decision di hues di Corte di Prome Instancia di dia 17 di juli 2025, den cual hues a rechasa e peticionnan di de Meza pa obliga OM pa inform’e mas tocante e sospechonan contra di su persona y pa tuma un decision di persecucion den su caso penal prome cu 15 di augustus 2025.

OM a indica, Corte Comun di Husticia ta di acuerdo cu e apelacion di de Meza no ta no admisibel, pa motibo cu abogadonan di de Meza a entrega e apelacion aki laat, y debi na e eror aki, Corte Comun di Husticia no por trata e apelacion di de Meza contra e decision di hues di Corte di Prome Instancia.

Manera ta conoci, origen di e saga aki ta e hecho cu e trayecto di proceso di screening di candidato pa minister Mike de Meza a ser alarga, pa motibo di diferente contratiempo cu a pone un impasse den e nominacion di de Meza, cual ainda e y su ekipo legal ta luchando pa resolve.

Den luna di juni a bira conoci cu DIMP a entrega un caso penal contra de Meza, tocante cual OM inicialmente no a duna clarificacion na Sr. de Meza. Pa e motibo aki, de Meza a entrega peticion na corte contra OM. Segun de Meza, den su mesun declaracion, el a tende di formador cu OM a mark’e como sospechoso den e caso entrega pa DIMP. El a pidi hues pa duna ordo na e instancia pa clarifica e tipo y motibo di e sospecho contra dje. Den un decision emiti dia 25 di juni, hues a afirma su opinion cu ciudadanonan cu ta marca como sospechoso tin derecho pa sa pakico nan ta sospechoso y ki tipo di investigacion ta tumando luga contra nan. Sinembargo, esaki ta solamente si e persona envolvi ser oficialmente deteni, interoga of invita pa interogacion.

Den e caso di de Meza, esaki no a sucede.

Hues a splica e tempo ey cu OM no a emiti un declaracion oficial den cual a marca de Meza como sospechoso, pues nan no ta obliga ainda di duna e tipo y motibo di e sospecho contra dje.

Na otro banda, hues a reconoce e naturalesa precario di e caso aki, unda por papia di circunstancianan excepcional y peso—ya cu de Meza tabata nomina como minister—cual lo por exigi pa acelera e clarificacion. Pues hues a dicidi cu OM tin dos siman tempo pa duna un clarificacion na de Meza si e ta sospechoso den un investigacion y e articulo den ley pa cual e ta sospechoso, cual de Meza y su ekipo no a keda satisfecho cune.

Dia 17 di juli ultimo, hues a entrega su decision relaciona cu e peticionnan cu de Meza a entrega na Corte di Prome Instancia. E peticion di e ex-minister, ken tabata ta den nominacion pa bira minister den e gabinete nobo di AVP-FUTURO, a pidi pa clarificacion tocante e tipo y e motibo di e acusacionnan cu Ministerio Publico (OM) tin contra dje. Ademas, de Meza a pidi OM pa tuma un decision si ta persiguie of no prome cu 15 di augustus 2025.

Den su decision hues a splica cu OM a cumpli cu e decision di Corte di 25 di juni 2025, door di informa Mike de Meza riba e mesun dia ey cu e ta sospechoso den un investigacion cu tin andando y a pon’e na haltura di e articulo den ley riba cual e sospecho contra dje ta basa. Tambe hues a rechasa e peticion pa OM duna contesta prome cu 15 di augustus tocante un posible persecucion. Segun hues, e peticion aki ta di considera prematuro.

De Meza no a keda contento cu e decision aki y pues a entrega un apelacion. Dia 5 di augustus ultimo a tuma luga tratamento di e caso di apelacion na unda despues di esaki de Meza hunto cu su ekipo legal a sali “cu un bon sentimento” den speransa cu lo por ricibi un resultado den direccion positivo pa nan, pero esaki no tabata e caso ya cu Corte Comun di Husticia a bisa declara e caso di apelacion di de Meza contra OM no admisibel pa motibo cu a entrega e peticion laat.

Di su banda parlamentario de Meza ta sigura y ta keda para riba e hecho cu na momento cu tabatin e proceso screening, su screeningnan di OM, KPA, e screening di salud, test psicologico y di droga tur cos a sali bon, pero den e screening di Departamento di Impuesto (DIMP) nan a bin riba un caso di 16 aña pasa y sugestivamente dunando cierto acusacionnan cu, segun e parlamentario, no ta cuadra.

El a splica cu cosnan cu a tuma luga tabata riba instruccion di gobernador y formador e tempo ey cu a indica cu si e activo den comercio mester pone e negoshinan riba un distancia, cual el a sigura el a haci a traves di dos compania di accountant y notario y e dossier ey a ser entrega na gobernador, formador e tempo ey cu a bira prome minister y a ser entrega tambe na directora di Departamento di Impuesto. “Y awor 16 aña despues bo ta bin tende tocante algo, pero e no ta cuadra. Te aworaki mi ta sinta warda kico realmente e acusacionnan ta,” el a remarca.

E parlamentario a indica cu e ta continua cu su trabounan como parlamentario. Ademas el a sigura cu e ta sigui lucha te na final pa resolve su situacion y ta dispuesto pa yega te na Corte Europeo si ta necesario.