Diamars atardi a drenta informe di un incidente na e construccion di The Stork Club Residence na Sasaki. Mesora a dirigi tanto polis y ambulance na e sitio. Prome informe ta indica cu un piso di beton lo mester a cay riba un trahador y e no ta reacciona.
E impacto tabata fuerte a pesar cu personal di ambulance a cuminsa duna prome auxilio na e victima, lamentablemente no por a haci nada mas. A pidi presencia di dokter na e sitio. Dokter forensico di Polis señora Volskuil a yega na e sitio pa asina constata morto di e fayecido.
Dokter a constata fayecimento di S.S.V. naci dia 10 december 1971 na Corsou. Polis forensico a presenta pa haci nan investigacion. Departamento di Slachtofferhulp tambe a presenta na e sitio pa asina brinda e famia di e victima sosten den e momento aki. Personal di DTI a wordo poni na altura y a yega na e sitio mirando cu tabata un accidente na pia di trabou cu lamentablemente tabata fatal pa e victima.
Nos ta manda palabra di profundo condolencia na famia di e fayecido.
