Ayera mainta a tuma lugar a ceremonia di apertura di Aña Parlamentario 2025-2026, despues di e clausura di e Aña Parlamentario anterior un dia prome. Manera custumber, e ceremonia a conta cu un cantidad di invitado y mandatario, y a hala atencion pa e importancia di e trabao di Parlamento den nos democracia.
Minister y parlamentario di coalicion AVP-Futuro, parlamentarionan di oposicion y invitadonan special, manera muchanan di Klas 5 di Scol Pius X, tabata presente na e ceremonia, y por observa e ambiente di celebracion riba e potretnan adhunto.
Relato anual parlamento
Dialuna mainta durante un reunion den Parlamento, Parlamentario Evelyn Wever-Croes (MEP) a duna un discurso elaborando riba e relato anual 2024-2025 di Parlamento. El a indica cu transparencia y responsabilidad ta e base di un democracia saludabel, pero sin contestacion di gobierno riba preguntanan haci, no tin control.
E relato ta mustra cu Parlamento a haci 2,275 pregunta, pero solamente 585 a wordo contesta. Esaki ta menos cu 26%, pa un total di 1.684 pregunta cu no a wordo contesta. Esaki ta nifica cu representantenan di pueblo no por cumpli cu nan tareanan completo.
Pa loke ta preguntanan haci pa AVP/Futuro por bisa cu di e preguntanan solamente 63% a wordo contesta. Esaki ta un berguensa, y ta di spera cu e parlamentarionan di AVP y Futuro cuminsa pone mas presion riba gobierno pa nan cumpli cu nan tarea.
Pa Fraccion di MEP tin 76% di preguntanan sin haya contesta. Esaki no ta solamente un cifra, pero ta un cuestion di respet pa Parlamento y pa pueblo cu nan ta representa. Miembronan di Staten ta dedica tempo y energia pa prepara preguntanan cu tin relacion directo cu problema y preocupacionnan di sociedad. Ora gobierno no ta contesta, esaki ta basicamente un falta di respet na tur ciudadano.
Parlamentario Wever-Croes a expresa cu bon gobernacion no ta solamente un palabra bunita, pero mester ta principalmente un acto concreto di transparencia y dialogo. E tendencia aki ta mina e confianza di pueblo den gobierno y Parlamento.
Di e relato tambe por mira tur e reunionnan cu fraccion di MEP a pidi pa mas di 5 luna pasa, pero ainda Presidente di Parlamento no a yama nan.
Algun di e reunionnan ta riba e topico di:
Aumento di tarifa di gas domestico;
Proceso di plannan di reforma den e “landspakket”;
Acusacionnan falso di Minister Gerlien Croes di 14 miyon florin cu lo a desaparece;
Reunion pa Prome Minister bin duna informacion di e proceso di screening di candidato pa minister
informacion di e lista di remedi cu e gobierno aki a amplia;
Negosacionnan cu Hulanda, cu a conduci na entrega di nos autonomia.
E cifra akinan no ta solamente estadistica sino ta trata di preguntanan crucial riba temanan serio cu ta biba den comunidad. Sin informacion pueblo ta keda sin claridad y sin transparencia.
Na final, parlamentario Wever-Croes a termina cu un mensahe di speransa. “Nos pueblo a mustra hopi biaha cu e ta merece miho. Den ultimo siete aña y mei bou Gabinete Wever-Croes, Aruba a conoce bon gobernacion, esaki ta loke cu pueblo ta desea, y cu pueblo tin derecho di exigi. Mi tin e fe y confiansa cu nos pueblo tin forsa, tin balentia, y tin speransa pa sigui lucha pa un gobierno cu ta habri nan porta pa oportunidadnan, cu ta respeta Parlamento, y cu ta pone pueblo na prome luga di berdad” Wever-Croes a termina bisando.
Premio “Hala di Shoco”
Hoben Richard Tromp a bira e prome ganador di e reconocemento di Parlamento, “Hala di Shoco”, pa su trabaonan pa comunidad. Tromp tin un fruteria y un barberia cu ta dedica su ganashi pa yuda hendenan vulnerable den comunidad. Su trabao pa comunidad a haci cu Parlamento a scog’e como e ganador di e premio aki. Pabien!
