E edificio aki, situa na Wilhelminastraat na Oranjestad, ta destaca como un di e casnan den estilo Caribense mas bunita den e area. E ta un construccion di Dr. Jacobo Eloy Arends, cu diseño den su arkitectura di e arkitecto Arubano Chibi Wever.

E famia Arends ta uno cu un historia largo na Aruba, cual ta data te na mita di siglo 18. Conoci pa nan negoshinan exitoso, nan tabatin un posicion prominente riba e isla.

Dokter Eloy Arends a construi su cas den 1922 tempo cu e y su prometida Maria Monica Lacle a compromete pa casa. Eloy Arends, inspira pa e edificionan luhoso di Caracas, e capital di Venezuela y na Bogota, Colombia, a pidi su arkitecto inclui e influencianan Neo-Baroque Latinoamericano den su diseño.

Manera tabata e tradicion entre e famianan manera e famia Arends, e homber mester a contrui un cas y completamente amuebla e cas nobo prome cu e muhe por wak e. Pues den 1925, prome cu el a bira Sra. Arends, Maria Monica mester a keda leu for di e edificio y no por a ni bishita e bario.

Despues di a regresa di nan luna de miel, Maria Monica a mira e cas pa prome biaha. E rumannan di Eloy Arends a amuebla e cas completamente mientras e pareha tabata biaha.

Varios evento social y festividad tabata organisa na e cas di e dokter na Wilhelminastraat. E cas aki literalmente por ser considera un cas di estilo habri, cu murayanan cu ta dobla paden y cu ta permiti un uso flexible di e espacio. E cas no solamente tabata e pareha su residencia, sino tambe tabatin e dokter su oficina y sala di operacion.

Den e añanan cu a sigui, e edificio a ser usa pa diferente proposito. Manera un restaurant y un partido politico su sede. Den 1986, Eloy Arends su yiu Jesus, ken tabata un dentista, a bende e cas na e gobierno di Aruba pa motibo cu e no por a cubri e gastonan di mantencion. El a haci esaki bao condicion cu lo restaura e edificio.

Den 1997, trabao di restauracion a cuminsa, no solamente di e residencia di Arends, sino tambe di ex Hotel Colombia patras. Ambos edificio monumental tabata conecta pa arkitectura moderno cu metal y glas, pa bira Oranjestad su Stadhuis, incluyendo e isla su Censo. E sala principal di e residencia a bira un sala elegante pa casamento.

Fuente; Monumentenfonds Aruba