(AP) — Presidente Donald Trump a bisa cu ehercito Mericano riba dialuna a bolbe ataca un barco supuestamente transportando droga for di Venezuela, matando tres persona abordo, y a aludi cu por expande mas ainda e atake militar contra cartelnan.
“E atake a sucede mientras e narcoteroristanan confirma aki for di Venezuela tabata den awanan internacional transportando narcotico ilegal (un arma mortal venenando Mericanonan!) bayendo Merca,” Trump a bisa den un post riba Truth Social anunciando e atake. “E cartelnan extremadamente violento aki di trafico di droga ta un menasa pa seguridad nacional Mericano, politica exterior y interesnan vital Mericano.”
A haci e atake casi dos siman despues di otro atake militar contra loke administracion di Trump a bisa tabata un speedboat transportando droga for di Venezuela, cu a mata 11 persona.
Papiando cu reporteronan den Oficina Oval mas laat dialuna, Trump a bisa cu gen. Dan Caine, presidente di Joint Chiefs of Staff, a mustr’e imagen di e atake mas recien.
Contestando ki prueba Merca tin cu e barco tabata transportando droga, Trump a contesta: “Nos tin prueba. Tur loke bo mester haci ta mira e cargo cu a keda plama tur riba lama – saconan grandi di cocaina y fentanilo tur caminda.”
Trump tambe a sugeri cu atakenan militar Mericano contra supuesto traficadornan di droga riba lama por keda expandi riba tera. El a bisa cu ehercito Mericano ta mirando menos barco den Caribe desde cu a ehecuta e prome atake e luna aki. Pero el a bisa cu e cartelnan ainda ta traficando droga riba tera.
“Nos ta bisando e cartelnan aworaki cu nos ta bay stop nan tambe,” Trump a bisa. “Ora nan bin riba tera nos ta bay stop nan di mesun manera cu nos a stop e barconan… Pero talbes door di papia tocante esey un tiki, e no ta bay sucede. Si e no pasa, esey ta bon.”
Secretario di Guera, Pete Hegseth despues a subi X pa adverti cartelnan cu Merca lo “track nan, mata nan y desmantela nan rednan door di nos hemisferio – na e momento y lugar di nos escogencia,” haciendo un echo di e lenguahe muscular usa pa administracionnan pasado durante e Guera Global contra Teror. Cas Blanco tambe a post un video clip no clasifica riba rednan social, mustrando e atake.
Duda tocante legalidad
Administracion di Trump a hustifica e accion militar como un escalacion necesario pa stop e fluho di droga na Merca.
Pero varios senador, Democrata y algun Republicano, a cuestiona e legalidad di accion di Trump. Nan ta mir’e como un extralimitacion di e autoridad ehecutivo en parti pasobra a usa ehercito pa proposito di aplicacion di ley.
Gruponan di derecho humano tambe a expresa preocupacion cu e atakenan ta viola ley internacional. Cas Blanco a ofrece tiki informacion riba con a hinca e operacion den otro of e autoridadnan legal bao cua a ehecuta nan.
Administracion di Trump a usa defensa propio como hustificacion legal pa e prome atake, cu Secretario di Estado, Marco Rubio argumentando cu e cartelnan di droga “ta presenta un menasa inmediato” na e nacion.
Oficialnan Mericano a bisa cu e atake anterior e luna aki tabata contra Tren de Aragua, un gang Venezolano designa pa Merca como organisacion terorista. Y nan a indica cu lo tin mas atake militar contra obhetivonan di droga na caminda mientras Merca ta busca pa “haci guera” contra e cartelnan.
Trump no a specifica si Tren de Aragua tambe tabata e obhetivo di e atake dialuna.
Dialuna durante un conferencia di prensa, presidente Venezolano, Nicolas Maduro a critica gobierno Mericano, acusando administracion di Trump di usa acusacionnan di trafico di droga como excuus pa un operacion militar cual su intencion ta pa “intimida y busca cambio di regimen” den e pais Sur Americano.
Maduro tambe a repudia loke el a describi como un operacion durante weekend den cual 18 marinier a invadi un barco di pesca Venezolano den Caribe. “Kico nan tabata busca? Tuna? Kico nan tabata busca? Un kilo di snapper? Ken a duna orden na Washington pa un destroyer manda 18 marinier arma pa subi un barco di pesca?” el a bisa. “Nan tabata buscando un incidente militar. Si e muchanan di pesca tabatin cualkier tipo di arma y lo a usa arma mientras tabata den hurisdiccion Venezolano, e lo a bira e incidente militar cu e belicistanan extremista cu kier guera den Caribe ta buscando.”
Papiando cu Fox News anteriormente dialuna, Rubio a reitera cu Merca no ta mira Maduro como e lider legitimo di Venezuela, sino como cabesante di un cartel di droga. Rubio consistentemente a pinta Venezuela como e restonan di un ideologia comunista den Hemisferio Occidental. “Nos no ta bay tin un cartel, operando of disfrasa di gobierno, operando den nos propio hemisferio,” Rubio a bisa.
Despues di e prome atake militar riba e barco supuestamente transportando droga for di Venezuela, e diplomatico top di Merca a bisa cu Trumo ta “bay usa ehercito Mericano y tur elemento di poder Mericano pa enfoca riba cartelnan cu ta atacando Merca.”
AP y otronan a reporta cu e barco a bolter y tabata bayendo back na costa ora a atak’e. Pero Rubio dialuna a bisa cu e no sa si esey ta corecto. “Loke mester cuminsa pasa ta cu algun di e barconan aki mester rementa,” Rubio a bisa. “Nos no por biba den un mundo unda diripiente nan ta haci un U-turn y e ora nos no por mishi nan mas.”
