Ayera, hues a duna veredicto den e caso di apelacion di JOB, doño di Isla di Oro, contra e veredicto di Corte di Prome Instancia den un caso cu Fundacion Parke Nacional Aruba a entama pa stop JOB di haci trabao di construccion of limpiesa rond y riba e tereno di Isla di Oro.

E caso tabata entama pa J.O.B. Holding & Management VBA, representa pa abogadonan Sra. A.A. Ruiz y B.F.H. Croes, contra Fundacion Parke Nacional Aruba (FPNA), representa pa abogado mr. Z.T.M. Arendsz-Marchena; y cuatro fundacion di conservacion di naturalesa: Stiching Scubblebubbles, Stichting Turtugaruba, Stichting Fundacion Proteccion y Conservacion di Commandeursbaay y Vecindario, y Aruba Birdlife Conservation, representa pa mr. G.W. Rep.

Den e vonnis di e caso por lesa con JOB ta doño di un isla di rif cerca di costa di Aruba, yama Isla di Oro, y a haci trabao riba e isla usando un excavator. FPNA, cu ta lucha pa proteccion di reserva natural na Aruba, y varios otro fundacion cu metanan similar, a bisa cu mester prohibi JOB di haci trabao riba of rond di Isla di Oro pasobra esaki ta contra regulacionnan di conservacion di naturalesa. Corte den Prome Instancia a bay di acuerdo cu esaki, y e decision actual tabata un reconsideracion di Corte Comun di Husticia.

Procedura

Dia 19 di juni 2024, JOB a entrega un apelacion contra e veredicto den procedura sumario di Corte di Prome Instancia di Aruba di dia 29 di mei 2024.
Dia 10 di juli 2024, JOB a duna un declaracion di keho cu prueba, treciendo dilanti y splicando cuatro keho, buscando pa revoca e veredicto y pa rechasa e ponencia di e acusadonan, cu un orden pa paga gasto.

FPNA a duna un declaracion di defensa cu prueba, buscando confirmacion di e veredicto cu tabata siendo reta, cu e gastonan bayendo pa JOB.

Igualmente, e fundacionnan pa conservacion di naturalesa tabata opuesto na apelacion di JOB.

E audiencia oral a tuma lugar di 10 di juni 2025, cu tur partido representa, y a intercambia documentonan por escrito.
E veredicto a tuma lugar ayera.

Hechonan
 Corte a considera den su veredicto e siguiente hechonan:
FPNA ta un fundacion pa proteccion y maneho di varios area di naturalesa na Aruba. Pa Decreto Nacional di dia 21 di december 2018, cierto awa na costa a keda designa como un reserva nacional bao di e Ordenansa di Conservacion di Naturalesa. A nombra FPNA manager dia 16 di april 2019.

Mediante Decreto Nacional dia 5 di mei 2020, cierto area terestre cu balor natural distintivo igualmente a keda designa como areanan protegi, cu FPNA como manager.

Dia 17 di juli 2023, JOB a obtene derecho di erfpacht te dia 14 di februari 2026 riba un tereno publico di 880m2 conoci como Isla di Oro. E erfpacht original ta bay back na dia 14 di februari 1966.

E acta di transferencia ta specifica cu uso di e tereno ta pa un bar-restaurant cu facilidadnan relaciona na esaki. For di dia 7 di maart 2024, JOB a cuminsa trabao riba Isla di Oro, usando un excavator. JOB no tabatin un permiso di construccion. Dia 27 di maart 2024 a aplica pa esaki, pero na april e permiso a keda rechasa. JOB a entrega un apelacion administrativo contra e decision aki.

Procedura den Corte di Prome Instancia

FPNA a solicita un mandato prohibiendo JOB di ehecuta cualkier trabao riba of rond di Isla di Oro bao castigo di multa. FPNA tambe a solicita un orden imponiendo e mesun prohibicion bao multa te ora cu tuma un decision riba e merito.

Corte a otorga e solicitud, prohibiendo JOB di haci cualkier trabao riba of rond di Isla di Oro sin permiso, incluyendo actividadnan di limpiesa, cu castigo di un multa di Afl. 250mil pa dia te un maximo di Afl. 10 miyon.

Evaluacion den apelacion
 Corte di Prome Instancia tambe a prohibi Pais Aruba di extende e erfpacht mientras e problemanan di zoning ta keda sin resolve. Aruba no a apela, pues e parti aki ta final.

E obhecionnan di JOB y e solicitud di urgencia di FPNA a keda discuti, unda a nota cu JOB tabata falta suficiente interes pa reta algun punto.

Corte a haya cu Isla di Oro ta cualifica como un area maritimo y reserva natural bao Ordenansa di Conservacion di Naturalesa y e Plan di Desaroyo Teritorial (ROPv). Pa e motibo aki, ningun actividad por tuma lugar eynan sin un permiso di construccion, y e actividadnan di limpiesa di JOB tambe ta considera trabaonan prohibi.

Corte no a haya ningun structura existente cu lo cualifica pa un excencion.

Poniendo e interesnan riba balansa, Corte a sostene cu e interes di proteccion ambiental ta pisa mas cu e interes comercial di JOB.

En conclusion, e keho ta fracasa y ta afirma e veredicto di Corte di Prome Instancia.
JOB, como e partido fracasa, ta haya ordo pa paga e costo di e apelacion, evalua pa FPNA y e fundacionnan di conservacion di naturalesa na Afl. 207 den pago y Afl. 6mil cada un den gasto di abogado.

Decision
 E corte ta afirma e veredicto di Corte di Prome Instancia. Tambe ta duna ordo na JOB pa paga e gastonan di apelacion, declarando e orden di gasto aplicable inmediatamente, y finalmente ta rechasa tur otro reclamo.

E veredicto a ser duna pa mrs. C.G. ter Veer, E.A. Saleh y E.W.A. Vonk.