Durante un conferencia di prensa recien, lider di fraccion di PPA, parlamentario Otmar Oduber a toca e tema di Ley di Reino di Consenso HOFA, un topico cu ta keda di suma importancia pa pais Aruba. Oduber a indica cu e Ley di Reino HOFA ta entrega e derecho parlamentario di Aruba na Hulanda, algo cu el a enfatisa ta inaceptabel.

Parlamentario Oduber a recorda cu partido PPA a cuminsa cu e discusion tocante e Ley di Reino for di aña pasa caba pa mustra e importancia di e ley aki mientras cu niun otro hende a dun’e importancia.

El a a señala cu e tempo ey partido MEP no tabatin interes den duna e topico importancia pasobra nan tabata den gobierno e momento ey y a prefera di keda keto riba dje. Di otro banda fraccion di AVP tabata dividi, caminda un rato si un rato no nan tabata na fabor di e Ley di Reino y nunca a fiha un posicion, te ora cu den eleccion prome minister Mike Eman a bisa cu e ta contra. Y pa loke ta partido Futuro, for di inicio caba minister Gerlien Croes mustra cu nan ta na fabor di un Ley di Reino.

Oduber a subraya cu ya caba desde plataforma Pais, y despues cu partido PPA, el a bisa cu nan ta hermeticamente contra un Ley di Reino loke a conduci tambe na cu manera a drenta den Parlamento di Aruba, dia 30 di januari, fraccion di PPA a haci peticion pa un reunion publico pa trata e tema di Ley di Reino.

Pero manera ya ta conoci siete luna y mey despues di e peticion aki presidente di parlamento a yama e reunion publico pa trata e Ley di Reino, pero te dia di awe en realidad e tema no a ser trata pasobra presidente di parlamento a suspende e reunion na momento cu fraccion di AVP, cu no a pidi e reunion, a pidi pa schors e reunion.

AVP a pidi pa schors e reunion cu dos siman, pero aworaki ta bay haci tres siman cu ainda no a bolbe yama reunion pa trata e Ley di Reino den Parlamento, mientras cu henter Aruba ta papia riba e topico, pasobra tin miembronan di parlamento na Parlatino y despues otro delegacion ta sali pa IPKO. “Asina ta mira cu no ta duna importancia na un ley cu tin henter e comunidad acapara,” el a remarca.

Parlamentario Oduber a splica cu e tempo ey PPA a bisa cu no por y no ta aceptable pa bay den direccion di un Ley di Reino pasobra simplemente e base di dje ta contra e derecho constitucional cu tin hancra den Aruba si Constitucion. “E ta impugna e derecho di cualkier pais pa loke ta su aspecto constitucional, di su autodeterminacion cu ta un lucha cu nos a hiba pa hopi aña,” el a agrega.

El a sigui splica cu si no tin alternativa, e ora por bisa cu mester bay den e direccion aki, pero el a subraya cu PPA a mustra riba alternativanan y a mustra riba e hecho cu no mester un Ley di Reino. El a indica cu Aruba por dicidi como pais cu no kier bay den direccion di un Ley di Reino y ta bisa Hulanda cu ta bay paga e debe na nan. Segun el a splica e debe ta costa 0.5% di Aruba su presupuesto y mester mas o menos ocho pa dies miyon florin pa nos por paga Hulanda e suma aki cu a fia den tempo di Covid y asina e discusion riba Ley di Reino ta caba.

E di dos opcion cu PPA a menciona ta cu ta dialoga cu Hulanda y si nan no ta confia Aruba y nan kier garantia, Aruba ta duna e garantia door di hinca e Begrotingskamer den su Constitucion caminda mester un mayoria absoluto, no mayoria di un gobierno manera tin awor, di 15 voto bay ariba den parlamento pa cambia e normanan pa asina por duna e garantia necesario na Hulanda.

“Pa esey tuma luga mester tin Consenso na Aruba, mester tin un frente nacional caminda tur partido politico ta stop di acusa otro y ta bisa cu ta bay traha pa e pais aki pasobra nos kier e bienestar di e comunidad di pais Aruba,” el a enfatisa.

Pa loke ta e ley mes, HOFA y loke tin riba mesa awe, parlamentario Oduber a indica cu e ley aki nunca a bin riba mesa. El a subraya cu den e ley di HOFA tin cosnan cu simplemente no por. El a splica cu den e ley ta regla cu pa motibo cu den 2024 a yega na acuerdonan na nivel di gobiernonan, e acuerdo entre otro ta cu e leynan na nivel local di pais Aruba no por ser cambia sin autorisacion di gobierno di Hulanda y di Tweede Kamer.

“Inaceptabel. Punto. Ami no ta mira ki discusion tin cerca ningun fraccion mas pasobra e ora bo no a entrega autonomia, bo a entrega bo derecho parlamentario na Hulanda,” el a enfatisa.

Oduber a splica cu ora drenta den e ley mes ta mira cu tin miembro di parlamento ta lesa pero no ta compronde pasobra algun ta bisa cu den tres aña por sali for di dje si cumpli cu e condicionnan. Pero segun e parlamentario Aruba mester tin e Ley di Reino pa minimo dies aña y despues di 10 aña, si cumpli cu tur e 28 condicionnan cu tin, e ora tres aña consecutivo mester cumpli cune. El a indica cu e ora no ta sali di e ley gewoon, pero e ora gobierno ta haci un peticion na Hulanda y Hulanda ta dicidi despues di 13 aña si e kier of no laga Aruba sali di e Ley di Reino.

“P’esey nos ta para y boga pa e frente nacional pasobra ta ora pa Evelyn [Wever-Croes] y Mike [Eman] dera hacha. Ta ora pa Futuro compronde cu e cuna di oro cu [ministernan] Geoffrey [Wever] y Gerlien [Croes] a nace den dje, pero sin un dia sinti e dolor di dje, pa nan tambe compronde y realisa cu e lucha no ta simplemente un discusion di Status Aparte awe, di autonomia, e ta un lucha pa dignidad, un lucha pa e principionan cu nos ta para p’e como pais,” el a agrega.

Parlamentario Oduber a remarca cu den e discusion ki lo mas lamentable ta cu e ta scucha minister Gerlien Croes ta bisa cu nan a cumpli cu tur e proceso. Pero e parlamentario a recorda cu na 2022, e tempo ey como parlamentario, minister Gerlien Croes durante e Inter Parlamentario Reunion di Reino, IPKO, a firma cu niun gobierno den caso di Consenso Rijkswet no por manda ley sin cu parlamento di Aruba mira e concepto prome.

Durante e reunionnan aki a ser stipula cu e gobiernonan mester garantisa cu semper tin

Consenso di e parlamentonan ora ta trata di leynan di Consenso, tanto den e proceso di traha e ley como durante e proceso cu ta sigui despues. Transparencia cu e parlamentonan no ta un opcion, ta un obligacion.

“Esey bo a vota p’e na Den Haag caminda cu a haya sosten di henter IPKO. Awe bo ta sinta den gobierno y crucifica e pueblo aki, bo ta traiciona e pueblo aki riba algo cu abo a firma. Nan kier a trompica Evelyn [Wever-Croes] luga el a traha trampa pa su mes, pasobra awe e ta sinta den gobierno,” el a subraya.