(AP) – Jaden Smith a ser contrata como e director creativo pa hende homber di Christian Louboutin y lo muda bay biba na Paris segun un reportahe den media.
Den un storia largo cu Louboutin y Smith confirmando e noticia, Women’s Wear Daily a bisa cu e fundador di e marca cu suela di sapato cora lo sigui supervisa su division di hende homber mientras cu Smith, di 27 aña, lo ta encarga cu e banda creativo di sapato, articulonan di cuero y accesorio, conhuntamente cu desaroya campaña, eventonan y experiencianan interactivo.
Smith lo presenta su prome diseño na Paris den januari durante hende homber su Fashion Week. E lo supervisa 4 coleccion pa aña.
“Esaki ta e honor mas grandi den mi bida y mi ta sinti hopi presion pa por cumpli cu tur expectativa y tur loke Christian a haci pa e cas di moda y tambe drenta un rol asina serio,” e actor y rapper, ken ta yiu di Will Smith y Jada Pinkett Smith a comenta.
Smith su nombramento, Louboutin a bisa, lo dune espacio pa crece den e negoshi di hende muhe. E tin speransa di haci uso di Smith su fama como celebridad y casi 20 miyon siguido riba Instagram pa impulsa e categoria di hende homber. E ta responsable pa 24% di e negoshi pero ta experienciando caida.
“E tin un manera di mira cosnan, di digeri cos, of transforma cu berdaderamente ta conecta cu mi manera di funciona,” Louboutin a bisa.
Peticionnan di email pa comentario of representantenan di Louboutin y Smith no a ser regresa inmediatamente diaranson.
