Recientemente fraccion di Futuro a tene un conferencia di prensa, durante cual lider di fraccion Gino Goeloe a trece dilanti e topico di Cuenta Anual di pais Aruba y e Ley di Reino. Parlamentario Goeloe a elabora riba e situacion actual y informacion cu segun e ta causa hopi confusion den comunidad.

Primeramente parlamentario Goeloe a expresa su decepcion pa e hecho cu como parlamentario e no a haya un cuenta anual di pais Aruba te dia di awe pa e por wak. “Den e funcion cu mi tabata, mi a custuma di traha cu jaarrekening, presupuesto, calidad, jaarverslag pero no tin un jaarrekening awe den parlamento. Algo cu mi no por kere cu den 40 aña di Status Aparte, y un pais cu ta papia di biyones di florin, no tin un documento cu ta bisa mi tin un presupuesto y mi por controla kico mi a gasta,” el a remarca.

El a splica cu gobierno ta papia di surplus pero sin niun documento esencial no por mira den kico realmente e placa ta ser gasta. El a indica cu un profesional, director den cualkier organisacion eyfo, den sector priva y den organisacionnan respeta, mester tin un documento, un jaarrekering audit door di un accountant.

Pa e motibo ey, el a enfatisa, den e caso di gobierno tambe ta hopi importante pa tin un cuenta anual. “Mi ta kere nos mester cuminsa riba e parti aki y mi ta haya jammer cu niun di e otro parlamentarionan di oposicion no a haci niun pregunta tocante jaarrekening. Awor con bo ta cuestiona autonomia y tur esaki cu tanto cos y bo no ta puntra e pregunta unda e jaarrekeing ta?” el a subraya.

Parlamentario Goeloe a splica cu pa e mesun e motibo aki, pa falta di cuenta anual, pa motibo cu Aruba no tin control riba su parti financiero, Hulanda ta riba Aruba cada biaha y ta un motibo tambe pakico e Ley di Reino ta riba mesa. “Nos no ta controla nos parti financiero… Nos no tin control,” el a agrega.

El a remarca cu aworaki cu gobernacion di AVP-FUTURO, y cu minister Geoffrey Wever na cabes di cartera di finanzas, e ta haciendo su best pa haal in tur e cuentanan anual cu a keda atras, pero toch e parlamentario Goeloe ta cuestiona unda tur e biyones di florin di surplus a bay.

E parlamentario a hasta menciona cu segun el a compronde cu tin algun minister cu ta sinta actualmente a haya deurwaarde a bin cu recibonan cu ministernan anterior a laga atras, cu recibonan cu no a ser paga.

“Bo a laga un surplus cu yen debe, pero ami como parlamentario no tin control awor pasobra no tin ningun documento cu bo por wak. Esey ta e parti caminda cu mester tuma e cos ki hopi na serio y wak di unda el a bin. Dicon nan ta papiando aworaki di un Rijkswet, di unda el a bin? Door cu nos no ta maneha nos parti financiero na drechi. P’esey nos tin cu para keto na dje y haci’e miho,” Goeloe a señala.

Pa loke ta trata e Ley di Reino, parlamentario Goeloe a indica cu e Ley di Reino ta data di 13 di november 2020 unda ex-prome minister, actual parlamentario, a firma e prome biaha cu Secretario di Estado anterior, Sr. Raymond Knops, despues cu su sucesor, Secretario di Estado Alexandra van Huffelen cu ken a firma un acuerdo financiero pa un Ley di Reino Hibrido.

“E mesun persona cu a bisa 90% bo a lag’e atras ta menciona cu el a firma un hibride Rijkswet. P’esey mi ta kere cu nos mester keda serio riba e topico aki y ban uni pa wak na unda nos por mitiga e partinan unda cu nos no ta di acuerdo cune. Si bo tin puntonan cu bo no ta di acuerdo, laga nos sinta na mesa y debati riba e puntonan ey,” el a indica.

 

Parlamentario Goeloe a splica cu pa loke ta e Ley di Reino cu tin riba mesa na e momentonan aki ta trata di un concepto locual kiermen cu e no ta un ley ainda. Na momento cu e yega parlamento e ta bira un ley.

“E por bay tur caminda di mundo pero tanten e no bin parlamento di Aruba pa nos por debati riba dje y vota riba dje, e no ta bira ley. Nos tin cu debati den parlamento pa yega na otro y e ora ey ta bin e votamento y e votamento ey ta wak si e ta bira un ley si of no. E por cana su caminda, e por bay Hulanda, pero den parlamento ta dicidi. Y mester tin 11 voto pa e por pasa, si tin menos cu 11 voto e no ta pasa,” el a agrega.

Parlamentario Goeloe a indica cu un aspecto importante cu nan ta mira ta e parti cu aworaki pais Aruba ta bay paga un interes di 6.9% pa 20 aña cu ta sali di e placa di belasting cu tur ciudadano ta paga. El a remarca cu si parlamento vota na fabor di un Ley di Reino, e interes lo reduci y lo paga 3.2% di interes cu lo spaar pais Aruba entre 20 miyon cu 30 miyon florin cu ta bay den back den comunidad,

“E ta bay back den bo camindanan, bay back den e caso aki scolnan, na pensionadonan, bay back tambe den e lista di espera cu tin caminda pashentnan mester warda tres pa cuater luna pa por wak un specialista. Nos por hinca e placa den esey, trece specialista for di Colombia pa yuda nos hendenan. Esey ta e placa cu nos por haya back, pero si nos dicidi cu no ta bin cu Rijkswet, ta sigui paga y e ora 20 miyon pa 30 miyon ta bay den caha di gobierno di Hulanda y nos ta keda sufri aki bou. Mi ta kere cu e parti ey mester pone bon den balans y mester sinta na mesa, debati riba e puntonan cu por tin diferencia di opinion riba dje, y asina por logra sali afo,” el a finalisa.