Si e rijkswet aki ta asina beneficioso pa Aruba Gobierno no mester tin problema pa brinda claridad y contesta pregunta. Loke nos ta sigur caba ta cu e consecuencianan lo ta grandi pa Aruba y no positivo. Sinembargo Gobierno ta den silencio riba e supuesto beneficionan.
Pregunta na gobierno
29 di augustus ultimo, pues dos siman pasa, a manda 13 pregunta pa Mike Eman pa haya claridad riba rijkswet HOFA (Houdbare Overheidsfinanciën Aruba). Preguntanan al caso pa haya sa kico e beneficio y efecto financiero anual ta pa Aruba pa e periodo di 2026 te 2040. Pero tambe nos kier wak tur conseho cu a ricibi pa tuma un decision asina grandi entre otro riba nivel economico social. E ultimo mas ainda despues cu evaluacion haci door di Hulanda riba e mesun ley aki na Corsou y Sint Maarten a sali negativo.
Negociacion door di gobierno
Parlamentarionan di AVP y Futuro ta bisa cu e mesun team di negociacion a keda traha. Pero obviamente esey ta riba nivel di ambtenaar. Negociacionnan politico ta wordo haci door di Gobierno. Durante reunion den juli Mike Eman a bisa cu na comienso di augustus e lo cuminsa negocia cu Hulanda, y ya caba riba 13 di augustus e a entrega tur cos den man di Hulanda sin informa Parlamento. P’esey nos a manda haci pregunta tambe cuanto biaha nan a reuni riba nivel politico cu Hulanda riba e topico aki.
Pa conclui
Ta incomprendibel cu despues di dos siman, Gobierno ainda no por duna contesta riba e preguntanan basico. Si bo ta tuma un decision asina grandi cu tin consecuencia grave pa nos pais, bo tin cu tin e informacion aki disponibel mes ora.
Si e rijkswet HOFA ta asina bon pa Aruba, dicon Gobierno no ta duna transparencia?
Nota di redaccion: E articulo aki ta opinion di e autor y no ta representa opinion di Bon Dia Aruba.
