Den e columna aki, mi kier comparti cu mi persona a yega e conclusion cu e vision di un Aruba cu Inteligencia Artificial den tur sector, cas 3D print, cada cas na Aruba haya su energia solar & sistema di bateria, robotaxi publico y entrada universal via belasting riba vermogen, muy probablemente no lo tuma lugar.

Esaki ta profundamente lamentable pasobra tur rond mundo, tin ehempel tras di ehempel unda e tendencianan tecnologico aki si ta tumando forma. For di Canada, Estados Unidos, Australia y China, tur e paisnan aki a dicidi di adopta innovacion tecnologico. Aruba lastimamente no, e consecuencia di NO a scoges pa e ruta di innovacion no lo ta pasivo pero profundamente severo.

Tapa e berdad incomodo cu poesia & restaurant special

Ta berdad cu e practica di politica tin hopi di haber cu “optiek”, den e sentido con un hende averahe di pueblo ta pensa di bo como lider politico. P’esey nos ta wak masha hopi ‘window dressing’ di politico di tur partido. Esta MEP, cu awo ta gaña boga pa hisa salarionan den sector di educacion y salubridad y cu kwijtscheld studieleningen, mientras cu durante nan gobernacion a haci net nada den e direccion aki. Tambe e Gobierno actual cu ta riba e campana di media pisa cu anuncionan di Poesia den Tweede Kamer na Hulanda of e apertura di un Restaurant cu trahador “special”. Pa ta duidelijk e cosnan menciona manera e Poesia y apertura di un restaurant special, ta cosnan hopi bunita. Pero ami ta haya tur esaki basta “manipulativo” considerando e realidadnan hopi duro cu nos como pueblo di Aruba lo enfrenta por lo pronto.

E ruta cu nos lo wak, e berdad incomodo, door cu NO a kies pa innovacion berdadero y radical ta un economia unda crecemento lo slow y inflacion lo hisa na mesun momento, loke muy probablemente lo forsa un gobierno pa bay den austeridad net den e wowo di un tormenta economico internacional.

Tur esaki ta trece e berdadnan masha incomodo cu tur partido grandi incluso MEP y AVP prefera di no papia di dje en absoluto, pero cu jammer genoeg ta realidadnan cu no por gewoon hunga caki-sconde cu nan.

Ehempelnan obvio ta e hecho cu edad di pensioen mester hisa, kier of no kier. Cu muy probablemente primanan manera SVB y AZV riba pueblo mester subi, door cu aunke ta haci full un fiesta cu e fondo SVB tin 65 aña den existencia, y cu na e momento aki tin surplus chikito. Pero frapantemente NO tin ningun plan publica over con lo mester deal cu e hecho over con pa tene e fondo SVB den bida pa largo plaso. Precies mesun storia cu AZV.

Tambe awo cu ta obvio cu economia global a cuminsa slow, kiermen cu por tin scenarionan no ta bay tin placa pa tur sorto di reparatietoeslagen, mas sigur lo mester cuminsa corta den uitkeringen. En fin door di maneho monetario internacional, pero siguramente door di falta di inversion den innovacion berdadero tur loke a menciona tambe lo pasa den un contexto unda prijs lo sigui hisa.

Ki dia lo bisa pueblo e berdad?

Atrobe ta sumamente lamentable cu nos aparatonan di bestuur mas halto di nos pais, yena cu hende capacita, diploma y experiencia, no por yega na e punto unda tin suficiente curashi di gewoon conta pueblo e berdad manera e ta, y cu mi persona mester hunga un Boeman. E ta algo hopi tristo mes cu full e aparato di Ultra-Kader, no solamente esun politico pero tambe e otro “check & balances”, parce den mi opinion cu no solamente a faya den un manera profundo, pero tambe den un manera structural.

Nos no a yega e punto obvio ainda, aunke tur “insider” sa cu esaki no lo dura largo mas. Pero probablemente aki 6-12 luna ora e crisis global stagflationario yega e punto unda ciudadano averahe ta sinti e consecuencianan, pueblo mester eis cu mester bin un reflexionnan profundo & honesto, di con un sistema socioeconomico den un pais prospero por a faya asina, den un manera structural bao diferente gobierno.