Recientemente Tweede Kamer a debati riba e presupuesto di aña 2026 di gobierno Hulandes. Den esaki por a tuma nota cu Ministerio di Interior y Relacionnan den Reino (BZK) lo inverti significantemente den e parti Caribense di Reino otro aña.

E presupuesto ta consisti di centenares di miyones di euro reparti den varios area di politica, cu ta varia di e estado di derecho y gobernacion te na infrastructura, seguridad di cuminda y proyectonan social.

Segun e portal di noticia Aruba.nu a indica, pa e tres paisnan den Caribe Hulandes, Aruba, Corsou, y Sint Maarten a reserva €68 miyon pa fortalece e estado di derecho. Esaki ta encera inversionnan den e calidad di institutonan, legislacion y implementacion. E fondonan aki mester contribui na un estado di derecho mas stabiel, bon gobernacion, y un gobierno cu ta funciona miho.

Ademas, casi €28 miyon ta disponibel pa e implementacion di e Ladnspakketnan di cada pais. E paketenan di reforma aki ta enfoca riba mehoracionnan socio-economico y modernisacion di gobernacion y economia riba tur seis isla. Hulanda ta financia e proyecto aki y ta vigila su progreso.

Pa loke ta e otro islanan di Caribe Hulanda, cuater mion euro adicional lo ser aloca na e tres municipionan special pa fortalece e capacidad ehecutivo di e gobiernonan insular. Den Haag tin como meta pa usa esaki pa mehora calidad di gobernacion y sostene e islanan den ehecucion di nan tareanan.

Proyectonan grandi di infrastructura tambe ta plania. Por ehempel waf di Saba lo ricibi un inversion di dies miyon euro pa mehora su instalacionnan, y a reserva 16 miyon euro pa careteranan na Boneiro pa e periodo 2025–2028.

Pa aumenta e resiliencia economico lo habri e programa di Garantia di Prestamo SME pa empresarionan den e islanan Caribense. Esaki lo haci’e mas facil pa negoshinan chikito y mediano haya financiamento.

Ademas, lo establece un fondo giratorio di 24 miyon euro, disponibel te cu 2028 pa proyectonan di seguridad di cuminda. E fondo aki ta destina pa contribui na un suministro di cuminda mas sostenibel riba tur isla di Reino.

Pa loke ta iniciativanan social y e pasado di sclavitud, e Ministerio di Interior y Relacionnan di Reino lo reserva 23 miyon euro pa iniciativanan social na 2026. E suma aki lo ser usa, entre otro, pa agendanan di accion cu ta surgi for di e disculpa pa e historia di sclavitud.

Tambe ta sostene proyectonan riba e islanan cu ta contribui na recuperacion, reconocemento, y concientisacion.

Hulanda ta sigui sostene e reconstruccion di Sint Maarten despues di horcan Irma. Esaki ta ser haci pa medio di un fondo di confiansa na Banco Mundial y pa medio di asistencia tecnico. E fondonan lo ser usa pa restaura infrastructura y fortifica e economia, cu a sufri daño severo door di e horcan na 2017.

Inversionnan detaya di e Ministerio di Interior y Relacionnan di Reino pa 2026 pa isla/region:

Aruba, Corsou, y Sint Maarten (paisnan dentro di Reino)

€68 miyon pa fortalece e estado di derecho

€27.6 miyon pa implementacion di e Landspakketnan (conhuntamente cu tur seis isla)

Sosten structural pa reformanan socio-economico

Boneiro, Sint Eustatius, y Saba (Hulanda Caribense)

€4 miyon adicional pa e capacidad di implementacion di gobiernonan insular

€10 miyon pa waf di Saba

€16 miyon pa careteranan na Boneiro (periodo 2025–2028)

Tur seis isla

Fondo giratorio di €24 miyon te cu y incluyendo 2028 pa seguridad di cuminda

Garantianan di fiansa pa SME disponibel pa empresarionan

€23 miyon pa iniciativanan social, incluyendo agendanan di accion despues di e disculpa pa e pasado di sclavitud

Specifico pa Sint Maarten

Sosten continuo pa reconstruccion di Horcan Irma a traves di un fondo di confiansa di Banco Mundial y asistencia tecnico

Por tuma nota cu Boneiro y Saba, en particular, a ricibi proyectonan specifico di infrastructura den e presupuesto, mientras cu Corsou y Aruba actualmente solamente ta comparti den e recursonan mas amplio pa estado di derecho y Landspakketnan.