(AP) – ABC lo sigui cu transmision di Jimmy Kimmel su show den bista di critica tocante su comentarionan tocante e asesinato di e activista conservativo Charlie Kirk, oficialnan di e red a bisa dialuna.
“Nos a pasa e ultimo dianan teniendo combersacionnan hopi profundo cu Jimmy, y despues di e combersacionnan aki nos a yega e decision cu e programa lo regresa diamars,” un declaracion di e red a informa.
ABC a suspende Kimmel di manera indefini despues di comentario cu el a haci tocante Kirk, ken a ser asesina dia 10 di september, durante un monologo unda Kimmel a bisa cu “varios den e mundo MAGA ta trahando hopi duro pa capitalisa riba e asesinato di Charlie Kirk” y cu “gang MAGA” tabata “desesperadamente purbando di caracterisa e mucha cu a asesina Charlie Kirk como tur cos menos un di nan.”
Kimmel tin desde aña 2003 ta anfitrion di “Jimmy Kimmel Live!” riba ABC y ta un figura di television y comedia pa hopi mas tempo. Tambe e ta conoci como un presentador, despues di ta anfitrion di e Academy Awards 4 biaha.
Critica na Kimmel su comentarionan tabata rapido. Nexstar y Sinclair, dos di ABC su propietario afilia mas grandi, a bisa cu nan lo kita “Jimmy Kimmel Live!” for di nan stacion. Otronan, incluyendo algun comediante, a bini na su defensa.
No tabatin comentario inmediato for di Nexstar y Sinclair den respuesta na mensahenan cu The Associated Press a laga.
Presidente Donald Trump, antes un di e victima di Kimmel, a publica riba rednan social cu Kimmel su suspension ta un “gran noticia pa Merca.” Tambe el a haci yamado pa otro anfitrionnan similar ser despedi.
Kimmel a ser puntra den un entrevista cu Variety den zomer ultimo cu e ta preocupa cu e administracion lo tuma accion contra comediantenan. El a expresa preocupacion cu e accion den nan contra por ta na caminda.
“Well, bo mester ta un poco kens pa no preocupa un poco,” el a expresa. “Pero esey no por cambia loke bo ta haciendo.”
Kimmel su suspension a yega na un momento unda Trump y su administracion a persigui menasan ,demanda y presion di gobierno federal pa purba eherce mas control riba e industria di media. Trump a yega varios acuerdo cu ABC y CBS tocante nan cobertura.
Trump tambe a entrega demanda di difamacion contra The Wall Street Journal y The New York Times. Republicanonan den Congreso a kita financiamento federal for di PBS y NPR.
Brendan Carr, e presidente di Federal Communications Commission, a emiti un advertencia prome cu Kimmel su suspension unda a critica Kimmel su declaracionnan tocante Kirk su asesinato.
“Nos por haci esaki e manera facil of e manera dificil,” Carr a bisa. “E companianan aki por busca manera di cambia conducta, tuma accion, francamente contra Kimmel, of lo tin trabao adicional pa FCC.”
Carr a nenga dialuna cu el a menasa cu kita ABC su licencianan di stacion local a causa di Kimmel su declaracionnan.
“Kimmel ta den e situacion cu e ta a causa di su cifranan. No a causa di cualkier cos cu a sucede na nivel federal of gubernamental,” Carr a bisa na Concordia Annual Summit.
