(NLTimes) – Conseho di Estado ta hopi critico di un proyecto di ley cu lo prohibi municipionan di duna refugiadonan prioridad ora di asigna vivienda social. E prohibicion lo conduci na discriminacion contra di refugiadonan, y esey ta viola e derecho riba trato igual garantisa pa e Constitucion Hulandes, e organo principal di conseho di gobierno a bisa den su conseho riba e ley.

Refugiadonan – solicitantenan di asilo cu nan peticion a ser aproba y a haya un permiso di estadia – ta cuminsa cu un posicion desfaborabel den e mercado di vivienda, Conseho di Estado a señala. “E proyecto di ley aki ta kita e opcion pa municipionan compensa e desbentaha aki cu un schema di prioridad. Si un instrumento pa compensa desigualdad ser retira pa un grupo specifico, mientras cu e grupo ey no ta den un posicion di inicio igual, esaki ta conduci na un trato desigual.”

Gobierno a anuncia medidanan cu e intencion di mehora e posicion di refugiadonan den e mercado di vivienda, pero e Conseho di Estado no ta impresiona. “No ta realistico pa spera cu e medidanan aki lo tin e efecto necesario na tempo,” e organo di conseho a bisa. “P’esey e refugiadonan lo sigui ta den desbentaha. Consecuentemente e proyecto di ley ta viola e derecho riba trato igual cu Constitucion ta garantisa.”

Conseho di Estado a reconoce cu vivienda pagabel na huur ta hopi scars na Hulanda, y gobierno ta confronta dilema pa determina ken lo tin acceso na vivienda social bou di ki circunstancia. “

Criterionan mester ser formula pa logra e reparticion mas husto posibel,” e conseho di Estado a bisa. Discrimina contra di refugiadonan no ta e manera pa hacie.

E Conseho di Estado tambe a señala cu e permiso di residencia cu un refugiado ta ricibi ora su peticion pa asilo ser aproba ta “compaña pa un responsabilidad social pa provee ​vivienda adecua.”

Tur esey, “combina cu e hecho cu municipionan ta ser poni den un posicion hopi dificil, e Division di Conseho no por emiti un recomendacion positivo riba e proyecto di ley,” Conseho di Estado a bisa. “E ta conseha gobierno pa no entrega esaki na parlamento.”