Segun reportahenan den prensa local, gobierno kier rapidamente reloca e adictonan ambulante, cu actualmente ta causa estorbo diario na KIA. Na mesun tempo, e prison mes ta den un condicion cu manera a informa anteriormente, ta asina precario cu e minister ta yama esaki un facilidad “practicamente condena.”
Recientemente, e minister a informa den un comunicado cu e proceso pa inicia cu construccion di un prizon nobo ta “den su fase di estudio.” El a agrega cu “na e momento aki e facilidad Korrectie Instituut Aruba (KIA) no ta factibel y ta practicamente afgekeurd.” E minister a splica cu actualmente tin un analisis cu a cuminsa cana pa por sigura cu no tin un riesgo directo pa ningun persona mientras tambe ta haya indicacion di e condicion di e facilidad.
El a indica tambe cu no por descarta cu “lo tin posibilidad cu na cierto parti di e facilidad aki, esaki lo por bin abao na cualkier momento. Mirando e riesgo aki mes ta bay percura pa esaki keda mitiga.”
E estado actual di e prison ta uno preocupante, pa motibo cu esaki ta señala un falta di mantencion structural cu tin varios aña ta cana caba. Aunke ta trata di prisoneronan of detenidonan den e facilidad aki, no por ignora e hecho cu tambe ta trata di ser humano cu tin derechonan fundamental, y entre esaki tin e derecho na un condicion di bida adecua y seguridad cu proteccion.
Na nivel internacional, algun di e aspectonan cu e prisoneronan mester tin acceso na dje ta inclui entre otro recreacion. Esaki ta necesario pa por mehora nan bienestar general pa medio di reduci stress, mehora nan salud mental y fisico, promove un interaccion social positivo y te hasta yuda nan siña habilidadnan pa por reintegra den sociedad. Algo asina simpel manera actividadnan recreacional por provee un ambiente structura, ofrece un outlet positivo pa nan emocionnan y contribui na un mente y curpa mas sano den un ambiente cu no ta e miho y den varios ocasion por ta yen di violencia, rabia y demas sentimentonan negativo.
Esaki ta apenas un di e varios ehempel di e servicionan cu un prison mester por provee na e prisoneronan, cual tin un impacto positivo y esencial. Cu e situacion precario di e edificio aki na Aruba, cumpli cu tur e necesidadnan amplio di prisoneronan y adecuadamente rehabilita nan, cual ta parti di e trabao di un facilidad coreccional, por bira un tarea dificil o te hasta imposible di cumpli. Nos por a mira algun dia pasa cu esaki ta un problema cu ta presente den varios departamento manera tambe e departamento di rijbewijs. E falta di mantencion di un edificio asina importante manera KIA no tin impacto solamente riba e prisoneronan, sino tambe riba e personal cu ta traha aki y nan seguridad y a yega tempo pa pone bista riba un solucion rapido y eficaz pa esaki.
Aunke no ta cla si e areanan cu ta den peligro di cay den otro of situacion mas precario ta directamente usa pa e prisonero of empleadonan, esaki toch ta posee un peligro pa tur esnan cu ta haci uso di e facilidad sea como prisonero, empleado of te hasta bishitante.
Pa e motibo aki ta di gran importancia pa cuminsa cu trabao di reconstruccion of construccion di un facilidad adecua pa e personanan cu ta depende di esaki den bida diario, y mas ainda si tin e plan di inclui e adictonan ambulante den e facilidad aki.
Segun e comunicado di e mandatario, despues di un analisis profundo lo tin cu tuma un decision riba loke ta sigui den e procedura, y “ta mira si yega na e determinacion cu berdaderamente tin cu muda e prison, cual ta algo cu a indica anteriormente caba.”
Tambe a haci mencion di e varios cambio tecnologico rond di mundo cu cual mester tene cuenta pa cu e proceso, prome cu duna inicio na e construccion di un prison nobo pa e pais.
Segun e minister di Husticia, mr. drs. Arthur Dowers, tin atencion pa locual ta e grupo cu ta riba caya y causando un reto hopi grandi pa e comunidad, pues e adictonan ambulante, cu mester sali for di den comunidad y keda ubica den un facilidad pa haya tratamento. Manera a menciona anteriormente, tin e intencion y plan pa inclui e adictonan ambulante di Aruba na KIA. Segun loke e minister ta informa, e intencion ta “pa nan haya tratamento pero tambe limita e risico cu nan ta causa daño den comunidad y na bienestar di hende y nan mes riba caya.”
Minister Dowers a indica cu e accionnan aki lo mester bin den un corto tempo y cu lo mester interveni na un manera extenso den parti di facilidadnan den KIA pa asina garantisa cu por atende cu e grupo aki. “Den pasado e grupo di adicto tabata bay bao curatela y ta pasa pa e opvang”, un sistema cu no tabata activo, sinembargo e minister a indica cu “esaki tin cu bay reactiva den forma rapido pa asina garantisa cu por cuminsa reduci e presion cu e grupo aki ta causa den comunidad.”
E ta un berdad cu no por nenga, cu e adictonan ambulante ta birando un preocupacion y problematica cu mester di solucion urgente pa seguridad y bienestar di tanto e adictonan como comunidad, sinembargo, ta necesario pa haci esaki di e manera adecua y den e orden corecto. Pa por cumpli cu e necesidadnan y brinda e sosten necesario na e adictonan ambulante, e situacion y condicion di e facilidad mester ta uno adecua y cu no lo ta den posible violacion di e derechonan fundamental cu nan ta comparti cu demas personanan na KIA y humanidad en general.
Ta di gran importancia pa atende cu e estado den cual e edificio di KIA ta enkontra su mes, pa asina tanto e detenidonan como e adictonan ambulante por tin un luga sigur y adecua pa por ricibi cumpli cu nan castigo y ricibi e rehabilitacion y tratamento cu nan tin mester.
