Diamars mainta, minister di Finansa, Asunto Economico y Sector Primario Geoffrey Wever a reuni cu un delegacion di International Monetary Fund (“IMF”) den cuadro di e mision Article IV Consultation 2025.
Durante e mision di 23 di september pa 6 di october lo enfoca riba desaroyo actual y den futuro riba tereno financiero, economico y monetario. E delegacion di IMF ta encabesa pa sr. Marco Arena, sr. Justin Thyme, sra. Olga Bespalova y sra. Toyosi Ojo.
Despues di e “pre-visit” di IMF riba prome di october di aña pasa como preparacion pa e mision aki, minister Geoffrey Wever y IMF a elabora riba Aruba su vision y maneho financiero y economico.
Crecemento economico tabata un topico importante mirando desaroyonan geopolitico, guera y e posibel impacto di e guera di mercado riba crecemento di Aruba su economia. Cu un relacion directo entre economia y finanzas publico, minister Geoffrey Wever a elabora riba ehecucion di e presupuesto 2025 cu ta mustra un crecemento den entradanan di gobierno compara cu 2024. Crecemento di entre otro entradanan di BBO y invoerrechten ta indicadornan di mas actividad economico.
Dependencia di un solo industria ta keda un riesgo pa desaroyo di Aruba y pa entradanan di gobierno. Como minister di asunto economico, minister Geoffrey Wever a duna IMF un actualisacion riba maneho economico di Gabinete AVP-FUTURO pa crea mas sectornan economico manera agricultura comercial, industria creativo y sector di tecnologia financiero. Via presupuesto di Aruba y den cooperacion cu Hulanda via Landspakket diferente accionnan concreto ta den ehecucion pa stimula e diversificacion di Aruba su economia.
Riba tereno di finanzas publico a elabora riba cu despues di 5 luna di huramentacion, Gabinete AVP-FUTURO a entrega e Presupuesto 2026 na tempo segun ley ta stimula, ta cumpli cu e normanan normanan di presupuesto manera ancra den ley y ta duna bek na comunidad. Den e presupuesto 2026 Gabinete AVP-FUTURO lo aloca entre otro structuralmente 50 miyon florin na inversion y 50 miyon florin na mehoracion di poder di compra como parti di implementacion di e Fondo di Inversion y Koopkrachtplan. Den e presupuesto 2026 tambe tin e extra suma aloca pa y pago di extra 250 florin na Reparatietoeslag cu desde 1 di mei 2025 a wordo duna tur luna na tur pensionadonan. Den e entradanan proyecta pa 2026, e bahada di e accijnzen riba gasoline y diesel pa tur usuarionan cu 10 cent tambe desde 1 di mei ta keda vigente y tur usuarionan lo sigui haya esaki ora cumpra gasolin y diesel.
“IMF ta un organisacion internacional cu ta evalua e desaroyo di nos pais continuamente y ta importante pa duna informacion concreto riba ehecucion di maneho riba tereno economico, financiero y monetario sostenibel, pa fortifica economia y desaroyo di Aruba cu pasonan concreto”, segun minister di Finanzas, Asunto Economico y Sector Primario.
