Aruba a bira punto di encuentro internacional durante e celebracion di e di 41 edicion di Reunion Regional di America di Federacion Internacional di Asociacion di Controlador di Trafico Aereo (IFATCA) cu tin como tema principal seguridad di aviacion. E evento aki ta reuni experto, institucion y lidernan politico pa discuti riba retonan, desaroyo y normanan cu ta garantisa un aviacion mas sigur y sostenibel.

Minister di Turismo, Transporte y Labor, Wendrick Cicilia tabata presente na e apertura di e conferencia y a remarca cu pa pais Aruba como un destinacion turistico, seguridad di aviacion ta fundamental pa economia di e pais.

E mandatario a indica cu confiansa internacional ta depende di cumplimento cu standardnan di Organisacion Internacional di Aviacion Civil (ICAO), pa Aruba ser reconoci como tambe como un destinacion sigur pa aviacion. “Esaki ta algo cu nos kier conserva, ta algo cu nos kier fortifica y esaki ta un momento cu region ta bini hunto. E ta un encuentro regional pa nos por sigui enfoca riba fortifica nos cooperacion regional cu nos partnernan den regio, intercambia conocemento, tambe un tiki di loke ta e desaroyonan regional riba loke ta seguridad di aviacion,” el a remarca.

Minister Cicilia a splica cu como destinacion conectividad aereo ta hopi importante. El a indica cu den e simannan cu ta bini gobierno lo sigui intensifica e contactonan cu ANSA y cu Departamento di Aviacion Civil na Aruba pa discuti kico ta e retonan y kico ta e oportunidadnan cu nan tin.

Pa loke ta trata recursonan financiero cu aviacion ta genera, e mandatario a splica cu, manera ya caba el a menciona, Aruba su espacio aereo ta genera cierto recursonan financiero y pais Aruba ta ricibi un parti di esaki, pero minister Cicilia a señala cu en realidad Aruba por ricibi hopi mas.

“Ta importante pa nos por habri e discusion aki pa tin un apertura pa cu esaki. Siman pasa mi tabata na New York cu prome minister di Corsou y esaki ta un tema tambe cu mi a trece dilanti cerca dje y sigur nos kier habri e discusion aki pa wak con nos por ricibi mas pasobra cu recursonan financiero aki cu nos por ricibi, nos por sigui inverti den eleva nos institutonan tambe. Esaki ta importante y tin nos enfoke na e momentonan aki,” el a remarca.

 

Pa loke ta trata Royal Schiphol Group (RSG), minister Cicilia a splica cu Gobierno di Aruba ta den e fase final di e negociacionnan cu Royal Schiphol Group. El a sigui splica cu nan tin beneficio pa locual ta trata aspectonan operacional di aeropuerto di Aruba, mas aun cu aworaki gobierno ta acelerando e proyecto cu tabatin un retraso grandi a base di e responsabilidad di e accionistanan mayoritario anterior, cual ta e gobierno anterior.

El a indica cu a base di negligencia gobierno anterior a percura cu e proyecto aki no a avansa na e manera cu mester a avansa, cual ta haci cu awor gobierno actual tin cu haal in e trabounan cu tin atrasa pa por avansa. El a remarca cu e experticio di Royal Schiphol Group taa necesario pa guia nan den e proceso aki.

Minister Cicilia a menciona cu un di e topiconan cu a ser discuti ta e topico di CEO. El a splica cu a base di strategic operational agreement (acuerdo operacional strategico) cu Gobierno di Aruba tin cu Royal Schiphol Group, nan ta provee e CEO, pero na momento cu a sinta na mesa na mesa, el a indica, gobierno a expresa su deseo cu e posicion di CEO ta un posicion cu nan ta desea pa bay pa un persona local. El a sigui splica cu si acaso, a base di evaluacionnan cu ser haci, Schiphol Group provee un persona cu no ta local, Gobierno di Aruba di su banda a indica cu nan lo pone banda di dje un statutaire directeur cu ta un persona local como un contraparti.

“Locual cu anteriormente no a ser haci a base di decision di minister aki, nos si ta bay haci cu ta pone un counterpart local banda di un posibel CEO cu lo por ta uno no local. Esaki ta un decision cu nos a tuma caba, a hancra esaki den e MOU y a papi’e caba cu Royal Schiphol Group,” el a enfatisa.

E mandatario a remarca cu ta importante tambe cu aworaki, den e parti operacion mirando cu aeropuerto ta den expansion, pa retene y balora e profesional y expertonan local.

E di 41 edicion di Reunion Regional di America di Federacion Internacional di Asociacion di Controlador di Trafico Aereo (IFATCA) a sirbi como plataforma pa recorda cu seguridad aereo no ta solamente responsabilidad di piloto of aerolinea. Patras di cada vuelo tin un red completo di controlador, tecnico, investigador y institucion cu ta traha dia y anochi pa mantene shelo sigur. Aruba, despues di 18 aña sin organisa un evento di e magnitud aki, a bolbe bishita un tema crucial cu no solamente ta afecta turismo, sino tambe soberania aereo y oportunidad pa genera ingreso adicional.

E conferencia a representa mas cu un evento protocolario. El a enfatisa e hecho cu seguridad aereo ta un proceso continuo, cu mester di liderazgo, cooperacion y inversion. Pa Aruba, aviacion ta un liña di bida cu no por keda sin proteccion.