Inflacion ta un problema grandi pa Aruba y mundo henter. Ya caba na nos isla e gap entre e bestaansminimuum y entrada minimo ta grandi. Tur lector cu no ta Centrale Bank van Aruba of Bureau Economische Zaken ta sinti cu inflacion ya caba ta bastante sofocante. Awo e mal noticia ta cu tur esaki ta un apperitivo pa e main course cu ta bay bin den e añanan siguiente, esta 2026 y 2027. Usando fuentenan di e caliber mas halto manera Bank of America Merril Lynch, Apollo y cu mi mesun dataset, ta yega conclusionnan bastante grave.

Inflacion ta eleva caba

E siguiente grafico di banco di private equity Apollo, ta mustra cu e patronchi di inflacion ta casi precies mesun cos cu añanan 1970 pa 1980. E ta mustra sumamente duidelijk cu e prome aumento di inflacion, esta durante e periodo di COVID, siguramente no ta e delaster “montaña di inflacion”, y cu nos por spera inflacion hopi mas halto den añanan 2026 y 2027.

Banconan Central rond mundo a corta interes

Pero e ora un lector por puntra, kico ta e causa di tur esaki?
Wel simplemente bisa, cu Banconan Central rond mundo a corta interes mientras cu inflacion ta bastante eleva caba. E siguiente grafico di Bank of America Merril Lynch ta mustra cu banconan central a corta interes na un velocidad comparabel cu e crisis economico di 2008 y e crisis di COVID. Esaki tambe ta un muestra duidelijk cu e narativa local na Aruba, cu economia no ta para malo, ta un manipulacion di prome grado. Si Banconan Central rond mundo, cual ta e gruponan miho informa y cu e miho herment, ta cortando nan tasa di interes manera nos ta den pleno crisis, ta un indicacion masha serio cu algo ta sumamente “off” den economia global.

Economia di Estados Unidos bao presion severo

Usando varios indicador visual for di Financial Times di Inglatera, manera e cambio di balor di e US Dollar Index, ta mustra di manera obvio cu e balor di e Dollar Americano a cay na un velocidad cu ta comparabel cu añanan 1970, durante e guera di Vietnam. Door cu Aruba su moneda ta pega na e Dollar Mericano, esaki kiermen cu den terminonan real, e Florin Arubiano tambe a perde masha hopi balor den e delaster 9 luna cu a pasa. Esaki ta e parti inflacionario.

Awo e otro parti ta cu tur esaki ta tumando lugar den contexto cu economia di Merca a cuminsa slow inmensamente. Un indicador di esaki ta accionnan di Merca su aerolineanan. Door cu vakantie ta un producto relativamente di luho, e ta un di e promenan cu lo sinti efecto si economia slow, y en berdad nos wak e Dow Jones US Airlines Index, nos por nota cu esaki a cay 7% den e siman cu a pasa. Esaki siguramente no ta un bon contexto pa Aruba su turismo.

Tanto na tanto alternativa

E cos mas frustrante di full e saga economico aki, cu Aruba indirectamente lo haya su mes aden, ta cu tin tanto na tanto alternativa tecnologico cu por a ser usa pa brinda alivio no solamente di manera inmediato, pero tambe riba largo plaso.

Mi por compronde cu politica di un pais ta move mas slow, pero despues di 3 aña ta skirbi di innovacion, nos como pueblo di Aruba no a wak ni un nano-gram di innovacion berdadero. Esaki ta pone mi puntra mi mes preguntanan sumamente fastioso.

Ta dicon nos no ta wak innovacion na Aruba?
Ta full Cocolishi ta incapaz, ta full e staff di trahador cual hopi tin titulonan MSc. tambe cu Minister studia no ta somehow capacita? Con por ta cu ningun otro instancia of grupo cu autoridad a grijp in na e fayonan structural aki den maneho na Aruba? Tambe dicon nos como Aruba no a wak nada di innovacion, ta asina negativo e lo ta pa e status quo?

En fin, ora cu e crisis stagflationario yega cu piek na añanan 2027, lo bay tin hopi frustracion bao pueblo cu simplemente no por afford pa biba un bida digno na nos Isla. E ora tambe ningun mandatario por bisa cu no por a wak e crisis di inflacion bin. Pasobra no ta ami so tin acceso na fuente di caliber halto, full e ultra-kader di Aruba por lesa y compronde reportahenan di investment bank. Na final, e fayonan completo di maneho di ambos MEP-RAIZ & AVP-Futuro ta bay tin consecuencianan hopi severo cu lo tin su efectonan socioeconomico.