Kico ta sucede cu hende cu nan estadia turistico ta vence? Minister Dowers ta splica

Recientemente Bon Dia Aruba a tene un entrevista cu Minister di Husticia, Integracion y Transporte Publico, Arthur Dowers (AVP) durante cual a toca diferente tema, entre otro e topico di trayecto di flexibilisacion pa personanan indocumenta, specificamente maneho pa cu personanan cu overstay nan estadia di turista.

Bon Dia Aruba a puntra Minister Dowers, mirando cu tin un maneho activo pa evita personanan drenta via costa di forma ilegal, si tin un maneho of kico ta haci cu e personanan cu nan estadia di turista a vence. Na diferente pais rond mundo tin regla estricto pa turista cu keda atras, pero na Aruba esaki no ta e caso.

E mandatario a splica cu den Aruba su sistema legal ta regla cu un hende cu bin Aruba como turista por pidi un extension pa su estadia. E persona ta simplemente bay Departamento di Inmigracion, e ta haci un peticion y yena e formularionan. El a indica cu hopi hende ta haci uso di esaki, pero sinembargo tin un grupo di hende cu no ta haci uso di dje. E mandatario a indica tambe cu te na e momento aki e proceso aki ta gratis, pero gobierno ta bay evalua e posibilidad pa cuminsa cobra pa esaki.

“Nos ta kere cu e sistema aki ta funciona bon, pero no ta asina si cu pasobra un persona a haya un extension turistico ta nifica cu e por keda indefini na e pais,” el a enfatisa.

Minister Dowers a remarca cu den e sistema legal di Aruba no ta asina cu e permanencia ilegal den e pais ta un acto criminal. Un persona cu keda despues cu su estadia di turista vence no a comete crimen y no ta ser persigui, pero na mesun momento el a enfatisa cu un persona cu si haci’e ta haya cierto limitacion pasobra si e persona ta desea di regresa despues di bandona e pais e por ricibi un periodo di sancion cu e no mag di drenta e isla.

E mandatario a sigui splica cu den e periodo aki gobierno a pidi tur hende cu a keda na Aruba di forma ilegal, pa nan bandona e pais boluntariamente pasobra si nan bandona Aruba awor, gobierno no ta bay tene e periodo cu nan a keda di mas den nan contra. Si e personanan aki sali awor nan no ta ricibi ningun sancion y por regresa Aruba back sin problema pa vakantie of pa haci peticion pa trabao.

Na mesun momento minister Dowers a indica cu ti algun hende ta bin Aruba cu vakantie y ta topa cu hende cu ta ofrece nan trabao y kier aplica pa permiso. Pero e problema ta sinta na cu nan ta aplica pa permiso, pero nan ta keda ilegal na Aruba y esaki, el a enfatisa, no ta intencion di e sistema.

“E intencion di e sistema ta cu e persona ta regresa back su pais y ta aplica, laga e proceso cana y despues ta bin back Aruba di forma legal. Nan ta haci e cosnan mas complica pero door cu e maneho tabata di los laga bay e ultimo añanan, e ora ey niun hende ta worry pa tene nan mes na ley aworaki mas, pero nos ta purba toch di push back mas tanto posibel pa hendenan tene nan mes na reglanan,” el a subraya.

El a indica cu e ta spera cu na momento cu nan mehora e sistema cu e aplicacionnan pa permiso por ser procesa hopi mas lihe cu e ta bay aworaki, cu e ora ey nan no ta haya e situacion aki. El a remarca cu e ta compronde cu tin persona ta haya nan mes den situacion di desesperacion. Esaki, el a indica, nan ta tende hopi biaha cerca hende grandi of hende cu tin famianan malo cu no por keda cla cu un hende su permiso y e ora ta trece hende di vakantie y laga nan keda. “Esey mi ta compronde, pero esey nos no por keda tolera. Nos kier facilita na momento cu un persona ta den un caso di urgencia cu nan por haya un ayudo y preveni cu nan mester bay haci practicanan cu ta contra ley,” el a agrega.

Relaciona cu e tension creciente entre Venezuela y Merca, Bon Dia Aruba a puntra minister Dowers si den caso cu e situacion aki causa mas salida di migrante cu o por tin efecto pa Aruba atrobe, si gobierno ta prepara pa esaki.

Minister Dowers a splica cu como e parti di husticia y seguridad, nan tin e responsabilidad pa proteha e frontera y esey, el a enfatisa ta locual nan ta haciendo usando medionan cu nan tin na nan disposicion, y basa riba inteligencia y informacion cu tin na e departamentonan concerni. “Esey ta bay bon te na e momentonan aki y no ta mira niun cambio dramatico den e proceso ey y spera cu e ta keda asina tambe,” el a subraya.

El a enfatisa cu proteccion di frontera ta hopi importante pa mitiga yegada di personanan di forma, pero gran parti di dje ta pa preveni crimen, preveni cu hende ta bin cu arma, droga etc. na frontera, preveni crimen organisa y traficacion di hende. “Yegada di hende di forma ilegal hopi biaha ta den circunstancia di crimen organisa y traficacion di hende,” el a indica.

Na comienso di luna di augustus minister Dowers a anuncia e trayecto di flexibilisacion den e maneho di admision pa personanan indocumenta por drenta e mercado. E fase aki a enfoca riba personanan indocumenta cu ta na Aruba caba, cu a yega prome cu dia 1 di juli, cu a drenta via aeropuerto y cu ta trahando of tin e posibilidad pa yega na un trabao.

Den luna di september e mandatario a anuncia e siguiente fase den e trayecto di flexibilisacion. E fase aki ta dirigi na e grupo di persona na Aruba cu no tin un dunador di trabao na e momento aki y talbes ta den proceso di busca un dunador di trabao, pero no a logra. E mandatario a splica cu tin un grupo di persona na Aruba cu no tin un dunador di trabao na e momento aki y talbes ta den proceso di busca un dunador di trabao, pero no a logra. E grupo aki tin hendenan cu ta un temporada, sea mas largo of menos largo, na Aruba cu no a logra haya un dunador di trabao y aworaki gobierno kier duna nan un ultimo oportunidad pa nan por logra haya un permiso.

E permiso aki ta un permiso temporal cu e persona por aplica p’e, aunke e no tin un dunador di trabao, pa facilita su buskeda pa un dunador di trabao.

Den e caso aki tambe ta conta e mesun rekisitonan cu den e fase anterior di e trayecto di flexibilisacion, pues e persona mester a drenta Aruba prome cu 1 di juli di e aña aki y mester a drenta via aeropuerto.