(CuraçaoChronicle) – Fundashon Kas Popular (FKP), den colaboracion cu ministerio di Trafico, Transporte y Planificacion Urbano (VVRP), a presenta e documento di decision final di Mi Kas Awor na gobierno di Corsou. E documento ta pone e fundeshi pa un reforma structural di e politica di vivienda na e isla y ta formalisa Mi Kas Awor como un programa nacional di vivienda.

Segun FKP, e programa ta financieramente indisputable. E ta pronostica un inversion publico total di 471 miyon florin y entrada structural di 838 miyon florin, deriva di impuesto di propiedad, erfpacht y benta di casnan existente. Den un periodo di 60 aña, esaki lo genera un resultado neto di 454 miyon florin, un averahe di 7.6 miyon florin pa aña. E cifra ta demostra cu Mi Kas Awor no ta un peso financiero sino un inversion cu ta paga pa su mes mientras ta reforsa finanzas publico a largo plaso.

Tambe ta describi e programa como socialmente transformador. Durante proximo 15 aña, e ta spera di crea mas cu 31,700 cupo di trabao y eleva aproximadamente 5mil persona riba e linea di pobresa, reduciendo pobresa riba e isla cu 10 pa 15 porciento. Ta bay pone casnan pagable disponible na tur grupo di entrada, incluyendo esnan mas vulnerable, sosteni pa e subsidionan di compra cu ta duna famianan propiedad, stabilidad y e oportunidad pa construi rikesa. Haciendo esaki, Mi Kas Awor ta busca pa kibra e ciclo di subsidio di huur cu ta fomenta dependencia, y na su lugar habri un caminda pa independencia y creacion di balor pa hogarnan Curasoleño.

Politicamente, e programa ta sigui modelonan proba internacionalmente, manera Mi Casa Ya di Colombia, y Ciudad Juan Bosch di Republica Dominicana. E iniciativanan aki exitosamente a provee propiedad di cas na cienmiles di famia, probando cu vivienda ta un pilar di stabilidad social y crecemento economico. Door di adapta modelonan asina na realidadnan local, Corsou ta scogiendo un caminda cu resultadonan proba.

E urgencia di e programa ta subraya pa e crisis di vivienda na e isla. Presion di turismo y e aumento di short-term rentals (STR) a reduci significantemente e cantidad di cas pagable, lagando miles di famia den riesgo di keda desplasa. Cada luna di retraso, segun e rapport, ta aumenta e scarsedad, ta aumenta prijs y ta eleva tension social. Mi Kas Awor ta presenta como e unico solucion realistico, factible y sostenible. E t señala un cambio fundamental den politica: di dependencia pa independencia, di gasto pasivo na inversion productivo, y di alivio temporal na construccion di activo a largo plaso.

Cu adopcion di Mi Kas Awor, Corsou ta habri un caminda nobo pa un futuro socialmente husto, economicamente resiliente y politicamente stabiel. E programa ta presenta no como e escogencia di un solo gobierno, sino como un legado ireversible pa generacionnan futuro.