(infobae) – E presentacion recien di informe di UN tocante implementacion di acuerdo di paz na Colombia dilanti Conseho di Seguridad cu a pone luz riba tanto e avancenan como e dificultadnan persistente cu e pais ta enfrenta.

Segun declaracionnan di Raul Rosende, representante special adhunto di Mision di Verificacion di ONU na Colombia, compila pa W Radio, e evaluacion internacional ta considera cu e progresonan alcansa te awo ta resulta “insuficiente”, mientras cu seguridad y husticia transicional ta keda motibo di preocupacion serio.

Durante e sesion trimestral di Conseho di Seguridad dedica na Colombia, Rosende a splica na W Radio cu maske tin consenso importante entre e paisnan miembro tocante e relevancia di e proceso di paz Colombiano, tambe tin critica y desacuerdo cu ta persisti. Den e contexto aki, e postura di Merca a sobresali pa su severidad: embahador Mericano na ONU a cualifica e gestion di gobierno di Gustavo Petro como “iresponsable” y a acusa e administracion di recuri na un “retorica incendiario”.

E observacionnan aki ta refleha e scrutinio internacional na cual e avance di acuerdo di paz ta someti, y e presion pa Colombia acelera su implementacion.

E informe presenta pa ONU, segun Rosende a detaya den e entrevista, ta subraya e necesidad pa avansa mas lihe den ehecucion di e sentencianan deriva di e proceso di paz. “Historia no ta termina cu emision di sentencia, implementacion mester ta lihe y ta importante pa esnan sanciona cuminsa realisa e trabaonan restaurativo di e sentencia y pa opinion publico mira cu ta avansando,” Rosende a afirma.

Ademas, el a insisti riba e importancia di mantene e nivel di participacion y dialogo cu victimanan di e conflicto, elementonan considera fundamental pa legitimidad y sostenibilidad di e proceso.

Den materia di seguridad na Colombia, e informe ta adverti tocante e gravedad di violencia den e teritorio, specialmente contra esnan cu a firma e acuerdo di paz y den contexto di proceso electoral. Rosende a señala cu un di e desafionan actual principal ta radica precisamente riba e proteccion di esnan cu a scoge pa reincorporacion y legalidad, como tambe e salvaguardia di e poblacion civil frente e accionnan di gruponan arma.

Un aspecto trata durante e entrevista cu W Radio tabata e acuerdo recien entre e gruponan arma “Los Pepes” y “Los Costeños,” kende a pacta un paro na actividad ilicito – incluyendo homicidio, robo y extorsion – te dia 20 di januari 2026. A pesar cu UN no ta participa directamente den e tipo di negociacionnan aki, Rosende a splica cu e mandato di e organisacion ta defini pa e Conseho di Seguridad y limita na e acuerdo di paz. “Dialogo ta necesario, pero na mes momento ta coresponde na e gobiernonan revisa unda nan mester tuma lugar y cu cua grupo mester tuma lugar,” el a puntualisa. Rosende ademas a adverti cu algun di e dialogonan recien cu actornan arma no a produci e resultadonan spera, loke ta reforsa e preocupacion pa e persistencia di violencia y e necesidad pa harmonisa e esfuerso di paz cu strategia di seguridad.

Tocante e papel di UN y e perspectiva tocante dialogo cu gruponan arma, Rosende a reitera cu e organisacion ta actua conforme e mandato cu ta asigna pa Conseho di Seguridad y cu su intervencion ta limita na e compromisonan estableci den e acuerdo di paz. No obstante, el a subraya a importancia pa evalua e procesonan dialogo cuidadosamente pa gobierno Colombiano pa determina su pertinencia y alcance.

E continuidad di e sesionnan trimestral di Conseho di Seguridad dedica na Colombia, segun loke ta expresa pa Rosende den su entrevista, ta evidencia cu comunidad internacional ta mantene su atencion riba e pais y ta considera prioritario e siguimento di acuerdo di paz y su desafionan pendiente.