(AP) — Un homber di 29 aña a ser acusa di a causa e candela Palisades di California, un di e candelanan di mas destructivo den su historia, autoridadnan a bisa diaranson.
Oficialnan federal a bisa cu Jonathan Rinderknecht, kende tabata biba den e area, a cuminsa un candela chikito riba Aña Nobo cu a keda kima bao di solo prome cu el cende atrobe casi un siman despues y pasa door di Palisades Pacifico, unda hopi hende rico y famoso di Los Angeles ta biba.
E candela, cu a laga 12 morto den e area montañoso banda di Palisades Pacifico y Malibu, tabata un di dos candela cu a surgi dia 7 di januari, matando mas cu 30 hende den total y destruyendo mas cu 17.000 cas y edificio mientras e tabata kima pa varios dia den Los Angeles.
Rinderknecht a ser aresta diamars na Florida y a haci su prome aparencia den corte diaranson na Orlando riba cargonan incluyendo destruccion malicioso via un candela, cu ta carga un sentencia minimo di cinco aña di prison. Bistiendo short y un T-shirt mientras su pianan ta mara, el a bisa un magistrado federal den un stem suave cu e no tabata bao di influencia y no tabatin problemanan mental.
E hues a fiha un audencia pa dia 17 di october pa considera fiansa y proceso di extraccion. Mensahe buscando comentario a keda pa Aziza Hawthorne, e asistente federal di defensor publico asigna pa representa Rinderknecht.
E hefe di Cuerpo di Bombero Interino di Los Angeles Ronnie Villanueva a bisa cu e aresto tabata un prome paso importante pa husticia.
E departamento a lansa un rapport diaranson cu a haya cu bomberonan no tabatin suficiente recurso y a lucha pa comunica claramente den e prome 36 ora di e candela, y cu e retonan a dificulta nan respuesta durante un momento critico. E rapport a bisa cu e departamento no a pre-desplega suficiente recurso a pesar di alertanan di biento severo.
Sospechoso a papia cu autoridadnan tres siman despues di e candela
Investigadornan a bisa diaranson cu Rinderknecht tabata trahando como un chauffeur di Uber riba Vispera di Aña Nobo, 2024. Despues di a baha un pasahero na Palisades Pacifico, el a parkeer y a cana riba un caminda. El a saca video den un area cerca riba un sero y a scucha un cantica di rap cu un video musical mustrando obhetonan cendi na candela, fiscalnan a bisa. Poco despues di mey anochi, el a pega e candela, nan a alega.
El a huy di e escena despues di a cuminsa e candela pero a bolbe na e area pa wak e candela, e Fiscal di Merca interino Bill Essayli a bisa.
“El a bandona asina cu el a mira cu e truck di bombero tabata bayendo na e sitio. El a draai y a bolbe subi back. y el a saca un video y a wak nan bringa e candela,” Essayli a bisa.
Uber a bisa den un declaracion cu nan a traha cu e Oficina di Merca pa Alcohol, Tabaco, Arma di Candela y Explosivo pa determina unda e chauffeur tabata rond di e momento di e candela.
Rinderknecht tambe a haci varios yamada 911 pa reporta e candela, segun un denuncia criminal.
Durante un entrevista dia 24 di januari, Rinderknecht a bisa investigadornan unda e candela a cuminsa, cual tabata informacion cu ainda no tabata publico y cu e no lo por a sa si e no a wak e candela su mes, e denuncia a bisa.
El a gaña tocante su localidad, alegando cu e tabata cerca di e fondo di e caminda di excursion, Essayli a bisa.
E tabata visiblemente ansioso durante e entrevista, segun e denuncia. Su esfuersonan pa yama 911 y su pregunta na ChatGPT tocante un sigaria causando un candela a indica cu el a pensa pa crea un splicacion mas inocente pa e cuminsamento di e candela y pa mustra cu el a purba yuda cu supresion, e denuncia a bisa.
Investigadornan a determina cu e prome candela probablemente a ser cendi door di un lighter cu a ser cendi riba mata of papel, segun e denuncia criminal.
Investigadornan a haya un lighter pa “barbecue” den e dash board di Rinderknecht su auto dia 24 di januari. E tabata parce e mesun lighter cu tabata den su apartamento dia 31 di december, basa riba un potret riba su celular. El a admiti cu el a trece un mas cune ora el a cana subi e sero, autoridadnan a bisa.
Fiscalnan federal lo mester tin mas prueba di un duda rasonabel cu e Candela Palisades a crece for di e prome candela ey seis dia prome, Jerod Gunsberg a bisa, un abogado di defensa criminal di California cu experencia den casonan di candela provoca.
Departamento di bombero ta examina su propio respuesta
E departamento a haya cu tabatin un atraso den comunica orden di evacuacion na e publico, resultando den evacuacionnan spontaneo sin control di trafico cu a causa cu residentenan a blokia ruta pa e candela. E comando di incidente mester a ser relocalisa frecuentemente pa scapa e frente di candela, e rapport a bisa.
E prome orden di evacuacion a bin 40 minuut despues cu algun cas ya a kima.
E departamento no por a efectivamente despelga personal fuera di servicio, y algun hefe di bombero tabatin experencia limita cu con pa “maneha un incidente di tal complehidad,” e rapport a bisa. Mayoria bombero a traha pa mas cu 36 ora sin descanso.
Di dos candela ta keda bao investigacion
E Candela Eaton a surgi e mesun dia den e comunidad di Altadena, destruyendo mas cu 9.400 cas y matando 19 hende. Investigadornan ainda no a determina oficialmente un causa, pero e gobierno federal a demanda e empresa di servicio publico Southern California Edison luna pasa, alegando cu su team a causa e candela.
Un revision externo lansa den september a haya cu un falta di recurso y politicanan anticua pa manda alertanan di emergencia a causa atraso den alertanan di evacuacion.
E rapport encarga door di e supervisornan di condado di Los Angeles a bisa cu un serie di debilidad, incluyendo “politicanan anticua, practicanan inconsistente y vulnerabilidad di comunicacion,” a dificulta e respuesta di e condado.
