Ayera, pa di tres aña consecutivo, a tuma lugar e Carousel Social di Universidad di Aruba hunto cu EPI sector di Cuido y Bienestar. Durante e evento, studiantenan tabatin e oportunidad di cera conoci cu e organisacionnan di Trabao Social na Aruba, y explora oportunidadnan pa un stage.

Program Manager di programa di Trabao Social y Desaroyo na Universidad di Aruba, Marloes Dijkstra, a conta cu e evento tabatin meta pa uni e sector di trabao social cu e studiantenan. “Pasobra solamente den colaboracion nos por crea e miho oportunidadnan di aprendisahe pa nos studiantenan, y pa esey realmente nos mester di organisacionnan den ramo di trabao social pa participa y crea bon oportunidadnan di aprendisahe durante internship (stage),” Dijkstra a comenta.

El a conta cu esaki ta e di tres aña consecutivo cu ta organisando e evento. “E organisacionnan a conta nos cu nan ta usa e evento aki pa netwerk cu otro,” Dijkstra a bisa, agregando cu e evento en realidad tin dos meta. “E meta di e evento ta pa crea oportunidad pa nos studiantenan haya informacion tocante posible agencia di internship, pero di otro banda, pa crea oportunidad pa e organisacionnan netwerk cu otro.”

Dijkstra a bisa cu e aña aki a nota definitivamente mas interes den e evento. “Aña pasa ya caba nos tabatin un cantidad halto di participante, y e aña aki nos tabatin 35 organisacion a participa y hopi mas tabata interesa. Pero pa motibo di espacio, nos mester a limita e cantidad di organisacion. Y nos tin tur nos studiante, di prome te di cuatro aña ta participando, di e programa di Trabao Social y Desaroyo di Universidad di Aruba. Pero tambe nos a invita studiantenan di EPI di sector Cuido y Bienestar, y cu tur studiante hunto, nos tin 180 studiante presente, kiermen e ta un evento grandi.”

Dijkstra a bisa cu e studiantenan di prome aña a haya tarea pa haci un entrevista cu algun di e agencianan pa haya informacion. “Ta prome biaha cu nan ta drenta campo di trabao social, pues pa nan cera conoci cu e diferente organisacionnan y e target groups cu cual nos ta trahando como trahador social.” Pa e studiantenan di di dos y di tres aña, a invita nan pa busca organisacionnan unda nan lo por core un stage. “E ta mas specifico den direccion di un internship, y pa haya sa mas tocante loke e instituto of organisacion ta haci, y si esey ta fit cu bo metanan di aprendisahe, di loke bo kier siña durante bo internship,” el a splica. “E ta mas enfoca riba e internship, pasobra e studiantenan di nos programa ta cuminsa nan stage den e di dos aña.”