(AP) — Un demanda pa difamacion cu Drake a entrega contra Universal Music Group a keda rechasa riba diahuebs pa un hues federal kende a bisa cu e letra den e cantica di Kendrick Lamar, ‘Not Like Us’, ta un opinion.
E disputa entre dos di e streanan mas grandi di hip-hop a rementa den spring di 2024, cu e par intercambianod un serie di cantica odioso cu a culmina cu Lamar anotando e “golpi matador metaforico” cu su megahit na mei, segun hues Jeannette A. Vargas a bisa den su opinion por escrito.
Mientras cu e letranan di e cantica explicitamente a tacha Drake di pedofiel, Vargas a bisa, un oyente rasonable no lo a conclui cu “Not Like Us” tabata dunando hechonan obhetivo tocante e super strea Canades. “A pesar cu e acusacion cu e demandante ta pedofiel sigur ta uno serio, e contexto mas amplio di un bataya di rap, cu lenguahe incendiario y acusacionnan ofensivo lansa pa ambos participante, no lo inclina e oyente rasonable pa kere cu ‘Not Like Us’ ta duna hechonan verificable tocante e demandante,” Vargas a skirbi.
Despues di e decision, team legal di Drake a bisa den un declaracion: “Nos tin intencion pa apela e veredicto di awe, y nos ta anticipa pa e Corte di Apelacion revis’e.”
“Not Like Us” tabata un di e canticanan mas grandi di 2024.
El a gana Album di Aña y Cantica di Aña na e Grammys, y a yuda haci e halftime show di Super Bowl e aña ey un di esunnan mas mira den historia, mientras fanaticonan tabata specula si Lamar echt lo bay cant’e. (El a hacie, pero cu cambio den e letra.”
E cantica, cu ta referi na Drake pa su nomber, ta atak’e como un “colonisador” di cultura rap, ademas di haci insinuacion tocante su bida sexual, incluyendo “mi a tende bo gusta nan jong” – implicacionnan cu Drake ta rechasa.
Entrega na januari, e demanda – cu no ta nombra Lamar – a alega cu Universal Music Group intencionalmente a publica y promove e cantica a pesar cu tabata sa cu e tabatin acusacionnan falso y difamatorio contra Drake, y a sugeri cu oyentenan lo por resorta na husticia vigilante. E cantica a daña su reputacion y a reduci e balor di su brand, segun e demanda.
UMG, e record label mama pa ambos artista, a rechasa e acusacionnan.
“For di comienso, e demanda tabata un atake contra tur artista y nan expresion artistico y nunca mester a mira luz di dia,” a bis den un declaracion. “Nos ta complaci cu e rechaso di corte y ta anticipa pa continua nos trabao promoviendo exitosamente e musica di Drake y invertiendo den su carera.”
Recordando “talbes e bataya di rap mas famoso den historia di e genero,” Vargas a nota cu prome cu “Not Like Us,” Drake a burla di largura di Lamar y su size di sapato, y a cuestiona su exito den un cantica di april 2024, yama “Push Ups,” mientras Lamar a insulta sentido di moda di Drake e mesun luna den “Euphoria.”
For di eynan, Vargas a skirbi, e insultonan a escala, birando “cruel, personal.”
E hues a bisa cu el a considera e forum den cual e insultonan a tuma lugar y a conclui cu e oyente averahe no ta kere cu un ‘dis track’ ta producto di investigacion cauteloso of desinteresa, dunando publico contenido fact checked y verificable.”
Vargas a skirbi cu “Not Like Us” tabata “yen di profanidad, trash-talking (insulto), menasa di violencia y lenguahe figurativo y hiperbolico, cual tur ta indicacion di opinion.”
