Manera ta conoci pa algun tempo caba e combersacion pa implementacion di regulacion pa e sector di short term vacation rentals (STVR) conoci tambe como vacation rentals of Airbnb, ta andando, pero te ainda no a mira accion definitivo tocante esaki. E tamaño creciente di e sector aki ta pone un presion riba no solamente pa e sector hotelero, pero tambe pa comunidad y organisacionnan di e gremio cu ta pidi pa implementacion di regulacion pa e propiedadnan aki pronto.

Segun data di e periodo di 2018 pa 2024, crecemento di estadia den Airbnb a surpasa e crecemento di estadia den hotel y timeshares, y mas di 30% di e turistanan ta hospeda den acomodacion cu no ta un hotel. E cifranan aki a causa preocupacion y segun Aruba Hotel & Tourism Association (AHATA) esaki ta pa motibo di un falta di regulacion den e area aki.

Segun AHATA a indica anteriormente, aunke a mira un crecemento den cantidad di turista bishitando e isla y mas construccion di hotel den e periodo di 2018 pa 2024, no a mira e mesun crecemento aki di estadia den hotel. Den otro palabra, Aruba a mira mas turista y a mira mas construccion di hotel, pero hotelnan ta keda comparti e mesun cantidad di alohamento. Esaki ta sugeri cu mas turista ta optando pa keda den alohamentonan di Airbnb, cual den e periodo menciona a crece cu 71%, mientras estadia den hotel a baha cu 2% y estadia den timeshare a crece cu apenas 13%.

Den 2025 por mira un impulso similar tumando lugar notando cu estadia den vacation STVR a redobla ora midi contra liñanan di base pre-pandemia (2018) pa e prome mitar di aña, mientras cu estadia mas hotel a crece mas suavemente.

E cifranan mas recien di AHATA ta mustra cu ocupacion averahe a baha te 63% na september, 10% menos cu un aña pasa. Aunke cu september historicamente tin un dip y a logra mantene RevPAR, e organisacion a enfatisa cu e cifra aki ta preocupante.

E falta di regulacion ta causa daño directo na ciudadanonan. E tempo ey caba e sector di vivienda tabata mirando un scarsedad enorme, y te ainda esaki ta e caso. Un gran cantidad di ciudadano riba e isla ta kedando sin e oportunidad di huur of cumpra un cas propio, y esaki ta un situacion prevalente specialmente den e generacion mas hoben cu ta yegando un edad mas adulto.

Na juni 2024, ex-minister di Turismo Dangui Oduber a anuncia cu e ley pa regulacion di vacation rentals tabata den su ultimo fase y cu pronto den e tempo ey e lo keda entrega na Parlamento. E meta di e ley aki tabata pa crea un “level playing field”, unda vacation rental lo mester cumpli cu un lista di rekisito.

Tur propietario cu tin un propiedad pa huur lo mester un number di registracion; Lo implementa un tarifa di registracion/permiso pa aña; Tur peticion di permiso lo ta digitalisa; Lo tin control di higiena y seguridad di propiedad; y Entidad nobo lo controla y supervisa vacation rentals.

A pesar di e yamado pa accion urgente di e sector hotelero, regulacion pa e sector di vacation rentals ainda no a conoce ningun avance.

Bon Dia Aruba a manda pregunta pa PR di Minister di Turismo, Wendrick Cicilia, pa asina puntra tocante e ley di regulacion di STVR cu e Minister di Turismo anterior a laga atras, den ki fase esaki ta, si gobierno ta bay sigui pa dilanti cu e mesun ley aki, of si lo bin cu uno propio.

Tambe a puntra tocante e medidnanan principal cu gobierno lo inclui den un ley di regulacion pa e sector aki. Pero te na momento di cierre di nos edicion no a logra haya respuesta.

Den Parlamento di Aruba, presidente di e comision di turismo parlamentario Jeniffer Arends-Reyes (AVP) a entrega un mocion fecha 25 di augustus 2025 relaciona cu e regulacion di short term vacation rentals (STVR) na Aruba.

Den e mocion Arends-Reyes a indica cu Aruba mester atende y promove e regulacion di huurmento di corto plazo na Aruba. El a splica cu algun STVR por competi inhustamente cu hotelnan local si nan ta opera sin registracion, sin paga belasting aplicabel, y sin cumplimento di e normanan basico di seguridad.

El a remarca cu Aruba ta beneficia di un cuadro balansa pa STVR cu ta garantisa seguridad, habitabilidad, etica fiscal, y competencia husto.

Arends-Reyes a pidi gobierno pa atende y promove e regulacion di STVR na Aruba a base di exigencianan di registracion, impuesto, y calidad, y pa percura pa economia local no ser perhudica.

Parlamentario Arends-Reyes a indica na Bon Dia Aruba ta den proceso di aregla un reunion cu minister Cicilia pa e duna Parlamento di Aruba un actualisacion di e situacion.

Mientras tanto, e demanda di turismo ta keda fuerte. Ta proyecta un gasto diario stabiel pa creciente pa bishitante di estadia den 2025, y proyectonan grandi di construccion relaciona cu turismo ta sigui impulsa inversion priva y cuponan di trabou. Cu yegada di bishitante y e parti di mercado di STVR tur dos eleva, e ausencia di reglanan cla y aplicacion ta bira un responsabilidad mas grandi—pa finanzas di gobierno, pa operadornan cu ta cumpli, y pa comunidad cu ta den tension pa conflictonan di vivienda y zonido.

E industria di short term vacation rentals di Aruba no ta un sideshow mas; e ta un parti central di con e isla ta anfitrion di mundo. E datonan ta mustra den un direccion di mas bishitante, mas anochi pafo di hotelnan tradicional, mas peso economico cu ta sosega riba STVR.

E politica mester alcansa e desaroyo. Un ley amplio, cu registracion, participacion di plataforma, belasting husto, y proteccionnan di bario dirigi lo converti e trabou di awendia den un sistema coherente. Esey lo ta bon pa e propietarionan di STVR, husto pa hotelnan, mas sigur pa bishitantenan, y, crucialmente, sostenibel pa comunidad di Aruba.