Un ciudadano Haitiano, naci den april 1974, a para dilanti di hues diabierna ultimo despues di ser acusa di traficacion di hende y explotacion sexual di varios muhe. E hechonan, cu a tuma luga entre januari y februari 2025, ta inclui tambe cargo di estadia ilegal y di duna camber sin permiso. Segun documentonan di corte, e homber supuestamente a maneha bar den San Nicolas, unda muhernan tabata traha den condicion cuestionabel.

Fiscal: “E tabata usa muhernan pa gana placa riba nan”

Fiscal di Ministerio Publico (OM) a insisti cu segun ley, e hecho di laga muhernan haci trabao di prostitucion ta conta como explotacion di hende, un delito grave. Segun e acusacion, C.E. tabata pone e muhernan bao di presion y tabata exigi cu nan paga pa camber y tambe pa tur cliente cu nan haya. Fiscal a mustra cu a tin declaracion di algun di e damanan cu a afirma cu nan mester a paga 110 florin pa camber y 10 florin pa cliente. Un di nan a bisa cu e tabata cobra boet di 100 dollar si nan bay cu cliente pafo di e bar.

Fiscal a pidi 48 luna di prison, di cual 6 luna ta condicional, y 5 aña di prueba, segun e tipo di traficacion di hende y explotacion di cual C.E. ta acusa. E fiscal a insisti cu esaki ta un forma di abuso y degrada integridad di e damanan involucra.

Defensa: “E no tabata obliga ningun hende”

Abogado defensor Mr. D. Croes a pidi liberacion di su cliente, insistiendo cu no tabatin ningun prueba cu C.E. a forsa of obliga e muhernan pa haci trabao di prostitucion. E abogado a indica cu e damanan mes a yega Aruba pa traha den e tipo di labor aki y cu nan mes a firma carta di acuerdo pa paga pa camber y traha. Segun e defensa, C.E. no tabata cobra boet, no tabata keda cu paspoort di e damanan, y no tin evidencia cu e a pone presion riba nan.

Croes a remarca cu su cliente ta sinti su mes kibra, pasobra e negoshi ya tabatin siete luna cera, y cu e semper tabata trata e damanan cu respet.

E investigacion di e caso a revela cu algun di e damanan a traha solamente den dos bar den San Nicolas, y no tabata permiti haci otro trabao. E damanan a menciona cu nan mes tabata paga 110 florin pa camber, y si nan no haya cliente, nan no tabata gana nada. Tres di e damanan no tabata contento cu e situacion, afirmando cu e negoshi no tabata bay manera cu a ser priminti.

No tabatin evidencia di violencia fisico ni menasa verbal, pero fiscal a mantene cu e sistema cu C.E. tabata usa ta constitui presion y explotacion.

Sentencia lo ser dicta na fin di october

Hues a cera tratamento di e caso y a anuncia cu sentencia lo ser dicta dia 31 di October 2025 pa 8:15 di mainta. E decision lo determina si C.E. ta culpabel di traficacion di hende, explotacion y estadia ilegal, o si e defensa a logra convence corte cu e no tabatin intencion pa comete ningun acto ilegal.

Casonan di traficacion y explotacion di hende a bin dilanti na varios ocasion. Den luna di juni UMM a haci tres detencion den caso di traficacion di hende. Den e caso aki UMM haci un entrada hudicial na un parcela na Jucuri y a detene tres persona.

Tabata trata di dos hende homber di inicial D.C.T. y J.J.R.C., e muher inicial M.L.J.A.J.G. Tur tres ta naci na Aruba. Nan ta ser sospecha di recluta hobennan di mas o menos 20 aña, door di manipula nan, aisla nan di nan famia y laga e victimanan depende di nan so.

E sospecho ta cu e victimanan tabata ser obliga pa entrega nan salario y poni bao presion pa traha sin pago.

E caso di presunto traficacion di hende a cuminsa na momento un miembro di famia a raporta esaki na UMM.

E team di UMM a haci un investigacion intensivo durante varios siman na unda a haya indicacion di explotacion di hende y mobilisa mesora pa pone man riba e presunto sospechosonan.

Casonan di contrabanda di hende tambe ta ser mira na Aruba. Na comienso di aña hues a dicta sentencia den caso penal Quetzal den cual sospechosonan Y.J.R. y E.J.D.S. ta ser acusa di contrabanda di persona, of mensensmokkel, durante e periodo di 10 pa 11 di december 2023.

Den su veredicto hues a dicta cu ambos sospechoso ta ser declara culpabel di contrabanda di hende. Capitan di e boto, e sospechoso E.J.D.S. a ricibi un castigo di seis aña di prison incondicional kitando e tempo cu el a sinta caba. E sospechoso Y.J.R., ken ta e organisador, a ricibi un castigo di siete aña di prison incondicional kitando e tempo cu el a sinta caba.

Autoridadnan Arubano ta enfatisa e importancia di lucha y combati contrabanda y traficacion di hende. Aruba ta keda vulnerabel pa e tipo di crimen internacional aki, pa motibo di su posicion geografico.

Polis, Ministerio Publico, UMM y otro instancianan ta traha man na man pa identifica victima y persigui esnan cu ta comete e tipo di delitonan aki.

Na varios ocasion gobierno a enfatisa cu contrabanda y traficacion di hende ta delitonan serio cu ta viola derechonan humano. Organisacionnan social tambe ta pidi pa mas consenshi entre pueblo. Nan ta bisa cu cada indicacion di trabao forsa, abuso of promesa falso di trabao na otro pais mester ser tuma na serio y reporta directamente na autoridadnan.

Autoridadnan ta sigui traha hunto cu partnernan internacional pa evita cu Aruba ta ser usa como punto di transito of destino pa contrabanda of traficacion di hende.