Den cuadro di bishita di IMF-CARTAC pa fortalece planificacion financiero di Aruba, Minister di Finanzas, Asunto Economico y Sector Primario mr. Geoffrey Wever riba 12 di november a ricibi un presentacion di Sra. Nordia Campbell y Sr. John Grinyer riba e resultado preliminar di e bishita aki.

Meta di e asistencia tecnico di IMF-CARTAC den e periodo di 4 pa 13 di november 2026 ta pa hunto cu departamentonan relevante evalua y mehora e calculonan di entrada, gasto y debe publico, y tambe pa evalua y mehora proyeccion economico y su impacto riba finanzas publico.

CARTAC ta un di IMF su centro regional pa asistencia tecnico pa hunto cu paisnan yuda fortalece e capacidad di un pais pa diseña y implementa un maneho macroeconomico saludabel pa stimula crecemento y reduci pobreza. E asistencia tecnico tabata dirigi na mehoracion di e marco fiscal di plaso medio existente.

E instrumento aki ta conecta e proyeccion economico cu e planificacion di presupuesto multianual (meerjarenkader), pa brinda tur gobierno un base mas solido pa determina prioridadnan, planifica inversionnan y anticipa riesgonan financiero- economico.

Durante e periodo di 4 te 13 november 2026, CARTAC a reuni cu Minister di Finanzas, Asunto Economico y Sector Primario, mr. Geoffrey Wever, y Directie Financiën, incluyendo divisionnan di presupuesto, tesoro y maneho financiero-economico. Tambe CARTAC a reuni cu Directie Economische Zaken, Handel en Industrie, Departamento di Impuesto, Departamento di Aduana y Banco Central di Aruba. Ademas, a tuma lugar un encuentro virtual cu Colegio Aruba di Supervision Financiero, enfoca riba e calidad di e proyeccionnan y e posibel riesgonan pa e maneho presupuestario.

Sesionnan di trabao tambe a forma parti di e programa. Durante e sesionnan aki, CARTAC y e departamentonan participante a concentra riba e calculonan di entrada di impuesto, entre otro BBO, winstbelasting y loonbelasting. Tambe a trata e proyeccionnan di gasto, inversionnan publico y obligacionnan financiero relaciona cu proyectonan cu ta den ehecucion.

Un otro componente importante tabata e analisis di diferente scenario economico, pa evalua con un crecemento economico mas halto of mas abao cu ta spera por afecta e entrada, gasto y debe publico. Ademas, e programa a inclui un metodo pa proyecta e debe publico como porcentahe di e Producto Interno Bruto (PIB) te na aña 2040.

E asistencia tecnico ta enfoca riba mehoracion di e instrumento di calculo cu Directie Financiën ta uza pa prepara proyeccionnan financiero, y ta inclui recomendacionnan practico y pasonan concreto. Cu esaki, Aruba ta fortalece e base tecnico pa tuma decisionnan presupuestario y contribui na un maneho responsabel y sostenibel di finanzas publico.

Como parti final di e asistencia tecnico, CARTAC lo entrega un rapport cu conclusionnan y recomendacionnan concreto pa mehora y fortalece e planificacion financiero di Pais Aruba. Durante e presentacion di e resultadonan preliminar a resalta e necesidad pa sigui brinda e aparato gubernamental e instrumentonan y conocemento necesario pa mehora e procesonan di trabao y fortalece e comunicacion y coordinacion entre departamentonan. Minister Geoffrey Wever ta enfatisa cu cada departamento tin un rol clave den e planificacion financiero di Pais Aruba. P’esey, ta importante sigui inverti den e capacidad di e departamentonan y den e desaroyo profesional di nan personal, pa fortalece e calidad di e analisisnan y e base pa decisionnan financiero di Gobierno.

Esaki ta esencial pa mehora e calculonan di entrada, gasto y debe publico, y tambe pa evalua y mehora e proyeccionnan economico y nan impacto riba finanzas publico.

Minister Geoffrey Wever ta expresa su gradicimento na IMF–CARTAC pa e asistencia tecnico brinda na Aruba, y na Directie Financiën, Directie Economische Zaken, Handel en Industrie, Departamento di Impuesto, Departamento di Aduana y Banco Central di Aruba y Colegio Aruba di Supervision Financiero pa nan participacion y contribucion durante e bishita di IMF–CARTAC.