Perspectiva economico pa Aruba ta mustra hopi bon den e proximo añanan, cu e expectativa di un turismo cu ta keda crece fuertemente. Esey no lo haci tur hende feliz, pasobra e crecemento anticipa por resulta tambe den e ‘sobreturismo’ cu gradualmente por converti den menaza pa un desaroyo sostenible.Ademas nos tin e realidad internacional, cu tin noticia menos positivo, cu nos mester tene na cuenta. Nos realidad ta mara semper na loke sucede den mundo. Aña 2027 por bira un aña mas problematico cu 2026, si no bin cambio den e escenario internacional y e situacion na nos partner economico mayor, unda tin tendencia negativo cu por afecta economia global.
Economia di Estadonan Uni ta mustra fuerte, pero no por ignora e señalnan negativo. Crecemento economico ta presente ainda, pero lo ta menos cu a anticipa. Varios economista ta mustra riba e hecho cu e unico sector cu ta mustra crecemento fuerte ta e sector di comunicacion digital, bao impulso di e inversionnan inmenso den Inteligencia Artificial. Banda di esaki gobierno federal tin un debe astronomico, ademas di un deficit anual di alrededor di US$ 2 triyon (2.000 biyon) pa 2026 y 2027 tambe. E cifra mas menciona pa e debe federal ta US$ 40 triyon, pero esun mas realistico ta US$ 32 triyon, pasobra e otro parti ta trata di debe entre entidadnan gubernamental mes. Gobierno federal tapagando e aña aki caba un suma di US$ 1,1 triyon na interes, mas cu loke e pais ta gastando na defensa. Esaki ademas lo subi te 1,5 triyon si gobierno di Trump haya nan aumento di gasto di defensa aproba den Congreso. Compara cu GDP nominal, pa 2026 di US$ 32,6 triyon, debe publico Mericano ta na mas di 100% di GDP, tambe si usa e cifra di US$ 32 triyon. Cifranan impresionante, pero tin caso mas grave den e mundo aki, ademas cu e posicion di tin e moneda di reserva mundial ta haci cu e situacion di debe ta diferente. Pero tin problema na caminda. Pa varios decada, realmente desde final di Segunda Guera Mundial, e pais por a conta cu recurso financiero amplio, pasobra otro pais y entidad di exterior tabata cumpra bono di estado Mericano, considera e inversion mas sigur na mundo. Esey a cuminza cambia. Un factor ta e situacion geopolitico unda gobierno Mericano mes ta practicamente na guera cu su aliadonan, cu semper tabata e clientenan mas fiel di bono di estado Mericano. E bono Mericano ta cuminza perde su atractividad, tambe pa motibo di duda creciente si e debe publico ta sostenible den futuro, cercano caba. Pero tin tambe e situacion riba mercado financiero unda gobierno ta competi fuertemente cu e sector economico, principalmente e empresanan grandi involucra den AI, cu ta atrayendo sumanan increible pa financia e ola di construccion di datacenter den henter e pais. Esaki alavez ta representa e siguiente riesgo grandi, si e ‘bubble’ di AI bira insostenible y cay den otro.Tin varios señal cu ta mustra riba e posibilidad cu e futuro fantastico di AI no resulta loke a anticipa y ta cuminza crece duda si e sector lo tin e ganashinan enorme cu ta necesario pa paga e inversionnan inmenso y duna dividendo na e accionistanan. Un repeticion di loke a sucede na aña 2000 cu e ‘.com-bubble’ta posible y di mayor tamaño ademas. Cu e demas sectornan den un situacion di practicamente poco o ningun crecemento economico, esaki por conduci na un recesion den curso di 2027. Mester menciona tambe cu e guera di tarifa di importacion a cuminza afecta nivel di prijs na e pais, sin cu gobierno lo probecha tanto di e entradanan extra di impuesto di importacion, pasobra gran parti lo bay pa e empresanan importador, cu a entama caso den corte contra gobierno. Inflacion na e pais ta aumentando, causando preocupacion di Federal Reserve, e banco central Mericano. Un siguiente aumento di Fed, di e interes basico lo aumenta costo di fia placa den tur sector, loke ta afecta e consumidor atrobe. E problema fundamental ta keda cu gobierno no tin ningun intencion di corta gasto, tambe di guera, y di e manera aki ta keda impulsa inflacion. Cu e incertidumbre den e proximo dos aña, cu mayoria solido Democrata den Congreso y un presidente cu poder di veto den su man, no ta sigur si tin caos den gobernacion, o cierto colaboracion den gobierno federal; no tin garantia di progreso economico anto.
Mientras tanto e panorama mundial no ta mustra cambio positivo ainda. E guera entre Rusia y Ucrania ta yegando na un fase preocupante y tambe alentador, den e sentido cu Ucrania ta logrando bastante den elimina sector petrolero Ruso pa asina pone un fin na capacidad Ruso pa continua cu accion militar na e frente mes.Cualkier momento por bin un accion di agresion Ruso na Europa, pa desvia atencion di e guera na Ucrania. Un pregunta clave den esaki ta e posicion di Merca, unda tin duda di kico Trump lo haci den caso di agresion Ruso na Europa, mientras cu Congreso desde 3 di januari 2027 ta den man di partido Democrata, cu lo ta na fabor di cumpli cu e obligacion di NATO pa asisti den accion contra Rusia.Ademas parti di partido Republicano tambe ta apoya Ucrania den e guera di agresion Ruso.Cu e situacion na Medio Oriente sin solucion, tin tur ingrediente pa e situacion internacional empeora, cu consecuencia economico pa henter economia mundial, tambe pa nos como pais chikito, y dependiente di loke esaki ta trece pa nos.



