Recientemente, Minister di Infrastructura, Rene Herdé (AVP) acompaña pa Minister di Finanzas y Economia Geoffrey Wever (Futuro), hunto cu algun inversionista den Oranjestad, a haci un recorido den Caya Grandi relaciona cu inversionnan cuantioso cu inversionistanan ta haciendo y tin planea pa haci den varios edificio.

Tin varios proyecto priva den ehecucion caba den Caya Grandi y tin varios mas na caminda. Ademas a papia riba diferente inversion, pero tambe e necesidad pa mehoracion di infrastructura, mantencion di mata, y limpiesa etc. A recorido a tuma luga den e caya principal, den area di Djiespie’s Place y Wilhelminastraat.

Cu e plannan di e inversionistanan den mente, awo Gobierno por alinea nan trabaonan pa cu Caya Grandi cu esaki pa crea un miho sinergia y pa tur cos cana mas eficiente posibel, segun un comunicado di gobierno. Recien Gobierno a aloca un miyon florin adicional pa renobacion di Wilhelminastraat, Klipstraat y esey ta netamente locual a dialoga cu e inversionistanan durante di e recorido.

Gobierno ta sostene inversionnan asina den y rond di centro di ciudad y p’esey ta importante pa mantene e relacion cu e inversionistanan aki. Segun e comunicado, e vision di Prome Minister Mike Eman pa revitalisa Oranjestad, ta parti di e acuerdo di Gobernacion di Gabinete AVP-Futuro y ya por mira trabaonan tumando luga. E modelo den cual gobierno ta traha activamente cu sector priva, ta esencial pa logra exito den tempo corto compara cu si cada un haci nan parti riba nan mes.

Durante e recepcion organisa pa e embahadornan diahuebs anochi na Fort Zoutman, Prome Minister Eman, Minister Geoffrey Wever, Minister Arthur Dowers y Minister Wendrick Cicilia y representante di Oranjestad Investors Group, Sr. Elton Arends y Sr. Harry Koeman a firma un MoU pa traha hunto na mehoracion di Caya Grandi den su totalidad.

Inversionistanan por drecha edificio, pero gobierno tambe tin un rol importante pa cu mehoracion di e demas aspectonan manera miho iluminacion, mas luga di parkeo, mantencion di e areanan limpi, mas mata, percura pa siguridad, otorgamento di permisonan etc.

Durante su discurso, Prome Minister Eman a indica cu “ta importante pa ta den combersacion y cu gobierno y inversionistanan a haya otro riba e puntonan mas elemental necesario pa e revitalisacion di Oranjestad. Nos capital yama Oranjestad locual ta indica e conexion entre Aruba y Reino Hulandes”.

Cu e acuerdo aki, e vision pa un Oranjestad revitalisa ta haya e impulso necesario pa e trabaonan tuma luga di forma acelera.