Dia 12 di october 2025 a tuma lugar e reunion anual di miembronan di Red Democratico, na un forma hibrido combinando participacion presencial y virtual. A keda eligi e siguiente miembronan di directiva di Red Democratico: Fejite Zijlstra (presidente), Asmid Zijlstra (tesorero), Nino Farro (secretaro), Danny Boekhoudt y Aaron Giel.
Despues di a presenta un informe financiero y politico di Red Democratico a scucha e orador invita, mr. Michiel Bijkerk di Boneiro. A discuti temanan manera un miho futuro pa esnan cu algun forma di limitacion fisico y p’esey nos ta orguyoso cu den e directiva nobo a keda eligi un persona cu limitacion visual, pasobra no por acepta ningun tipo di discriminacion, y tur hende di bon boluntad por carga responsabilidad politico.
A scoge e fecha di 12 di october pa tene e reunion, pasobra dia 12 di october 2025 ta recorda cu un cuarto di siglo pasa gobierno di Aruba a manda reprimi un manifestacion di protesta contra Racetrack, usando polis cu gas lagrimogeno y detencionnan arbitrario, riba ciudadanonan cu simplemente tabata haciendo uso di nan derecho di protesta dilanti parlamento di Aruba. Nos no por lubida esaki, pasobra e no mag pasa mas den futuro cu gobierno ta reprimi un pueblo cu ta expresa su opinion.
E directiva nobo ta consciente di unda Red Democratico a bini, di un movemento di protesta pa defende naturaleza y contra corupcion. Awor kier sigui cu e lucha pa defende derechonan di esnan cu limitacion y esnan mas vulnerabel den nos comunidad. Nos ta spera di por conta cu mas apoyo di nos pueblo.
