Ayera mainta durante un conferencia di prensa lider di fraccion di PPA parlamentario Eduard Pieters a trece dilanti diferente topico. Un di nan tabata relaciona cu e noticia cu e fraccion a ricibi cu a kita e presidencia di e comision fiho di adultonan mayor y famia for di PPA y a duna esaki na fraccion di Futuro.
Pieters a splica cu dialuna tabatin un reunion publico den Parlamento di Aruba caminda cu a fiha e comisionnan fiho y e comisionnan special, y den e reunion aki el a bin compronde cu nan a kita PPA for di presidencia di e comision adultonan mayor y famia. El a indica cu net e dia cu el a huramenta como parlamentario tabatin un reunion di comision central durante cual nan a kita e presidencia di e comision aki for di PPA y a duna fraccion Futuro.
Awor den e comision fiho di adultonan mayor y famia, parlamentario Gino Goeloe (Futuro) a ser nombra presidente y Pieters, fraccion di PPA, a keda e vice presidente.
El a indica cu durante e reunion publico dialuna nan a purba hustifica pakico nan a haci esaki. Segun el a splica unico motibo cu nan a indica ta cu Sr. Goeloe ta e persona cu tin conocemento den e area y p’esey coalicion a tene un conseho di coalicion caminda nan a dicidi pa saca PPA y pone parlamentario Goeloe.
“Esey ta e unico hustificacion. A puntra si a traha malo of actua malo, nan a bisa no. Al contrario, e comision tabatin mas actividad cu nunca y segun nan e actividadnan tabata hopi bon y PPA a haci un bon trabou. E ora pakico mester castiga nos kitando e presidencia di e comision,” Pieters a cuestiona.
El a sigui splica cu presidente di Parlamento a bisa durante e reunion cu como miembro y vice presdiente di e comision por acerca e comision di un angulo diferente y como parti di e comision mester duna aporte pa bin cu topiconan.
Pero Pieters a remarca cu den politica esey no ta semper manera cosnan ta funciona. “Mescos cu un colebra, si e cabes bay links, e curpa tambe ta bay links, e cabes rechts e curpa tambe ta bay rechts. Abo como miembro di comision bo por wel di kier of trece puntonan hopi bon pa dilanti, pero si e presidente no haci trabou di dje, te eynan bo a keda,” el a agrega.
E situacion aki a causa un descontento pa Pieters y fraccion di PPA. El a enfatisa cu prome cu campaña, mas di un aña pasa, partido PPA, prome como plataforma Pais, ta esun cu a cuminsa hiba combersacionnan cu tur gremio, por ehempel OPPA y SVB, entre otro, tocante e topico di adultonan mayor.
Despues plataforma Pais a bira partido PPA, y den e programa di gobernacion di PPA, el a subraya, nan a percura pa pone puntonan al caso, puntonan fuerte pa sali na vanguardia y dignidad di pensionadonan.
“Nos tin un trayectoria basta largo ta bin ta papia di esaki, e tempo ey niun hende no tabata di dje. Pa mi recorda pueblo, den campaña y na final di campaña bo tabata haya por ehempel, djis pa mi duna un ehempel, un Mike Eman tabata papia di redobla pensioen, despues el a bira papia di 700 florin pa pensionadonan y na final nos sa kico a pasa cu 250 florin so el a entrega na e pensionadonan,” el a indica.
Pieters a remarca cu ora di campaña PPA a para firme pa e pensionadonan y despues di eleccion fraccion di PPA haya e presidencia di e comision fiho di adulto mayor y famia, caminda nan a yama diferente reunion pa duna informacion na e parlamentarionan, pero tambe haya informacion for di diferente gremio. Esaki, el a señala, tabatin como meta pa por duna informacion na gobierno y haci preguntanan skerpi pa gobierno por tene cuenta cu tur necesidadnan cu tin pa e adultonan mayor den nan gobernacion.
El a enfatisa cu si mira e comision cu a traha mas duro den parlamento, tabata e comision lidera pa fraccion di PPA, p’esey ora cu nan a ser informa cu aki ta presidencia for di PPA, Pieters a expresa, e tabata un sorpresa grandi.
“E ta duna un sentimento di bo ta haci bo trabou bon, bo ta percura pa envolve e gremionan importante pa e bienestar di nos adultonan mayor y famia y bo ta ser castiga, bo ta ser hala un banda pa motibo di un coalicion cu ta pensa y bisa algo pero ta haci otro,” el a agrega.
Pieters a subraya cu e situacion ta uno hopi lamentabel y p’esey el a trece e punto dilanti durante su conferencia di prensa. El a indica cu a pesar cu partido PPA a cuminsa cu e lucha pa adultonan mayor y como fraccion di PPA a continua cu e lucha aki, awe ta parlamentario Goeloe ta e presidente nobo di e comision, aunke no a scuch’e papia di e pensionadonan prome cu eleccion.
“E ta un falta di respet pa fraccion PPA, e ta un falta di respet pa nos adultonan mayor. Pero no ta nada, e compromiso cu fraccion di PPA tin ta cu nos lo sigui lucha pa nos adultonan mayor pasobra despues cu nan a saca nos full for di e presidencia y e vice presidencia nos a bringa esaki, nos a hiba un debate den parlamento y despues toch coalicion a duna PPA e vice presidencia,” el a enfatisa.
Por ultimo Pieters a sigura cu como lider di fraccion di PPA e lo sigui traha pa e adultonan mayor hunto cu Goeloe y ta spera cu pronto lo por sinta y wak e agenda cu Sr. Otmar Oduber a alega atras na momento cu e tabata fungi como presidente di e comision aki.
“Sr. Otmar Oduber, a laga un planificacion atras caminda cu lo a invita diferente minister y otro gremionan pa sigui wak con por yuda e adultonan mayor pasobra tin un reto grandi cu e adultonan mayor, nan merece di biba un bida digno y e retonan ta hopi grandi y p’esey ta hopi importante cu e comision aki sigui den buena marcha,” el a finalisa.
