Manera ta conoci recientemente Corte di Prome Instancia di Aruba a dicta un sentencia cu ta suspende temporalmente e decision emiti pa e companianan di utilidad dia 11 di juli 2025 pa retira 15 comisario, y ta ordena e reinstalacion di e comisarionan na nan posicionnan te ora cu yega na un decision final den e procedemento principal.

E conflicto ta surgi for di un decision tuma pa e representante di e accionista — actuando den nomber di Gobierno di Aruba — pa kita henter e huntanan di supervision di e companianan di utilidad. Den un carta fecha 10 di juli 2025, e accionista a declara un perdida di confiansa den e directivanan, citando un “diferencia fundamental di vision” entre e representante nobo nombra pa gobierno y e comisarionan pa loke ta trata gobernacion corporativo, direccion strategico, y e responsabilidad social di e empresanan.

Tocante si e “perdida di confiansa” di e accionista tabata constitui un hustificacion adecua pa e retironan, corte a conclui cu esey no tabata e caso y corte a dicta pa suspende e decisionnan di retiro di 11 di juli 2025 te ora cu yega na un sentencia definitivo den e procedemento huridico principal. Esaki ta nifica cu tur 15 comisario mester ser reinstala den nan rolnan den e companianan di utilidad.

Minister di Husticia, Integracion, Energia y Transporte Publico, Arthur Dowers, a indica den un entrevista na medio di comunicacion local cu e ta kere cu hues a tuma su decision basa riba loke a ser presenta na dje.

El a remarca cu loke cu ta importante pa gobierno ta pa garantisa funcionamento y continuidad di e organisacionnan aki. Pa motibo ey, el a splica, na momento cu el a asumi poder como minister, a tuma e pasonan pa garantisa e continuidad di companianan aki.

El a sigui splica cu e statutonan a ser cambia di tal forma cu practicamente ta partido MEP (gobernacion anterior) y su hendenan a bira doño di tur e companianan di utilidad, nan a logra di para e prome fase di esey door di a logra pone hendenan nobo na Utilities Aruba NV.

Minister Dowers a splica cu manera ta conoci Utilities Aruba NV ta e compania mama di e companianan di utilidad y a cuminsa cu cierto analisis y cierto investigacion. Basa riba esey nan a haya cu ta na su luga pa, primeramente haci cierto cambio pa hiba un maneho cu ta den e liña cu loke gobierno ta pensa cu e maneho mester ta. Y na di dos luga, pa por a para cierto iregularidadnan cu a tuma cu a tuma luga y pa por investiga nan miho.

“Nos a constata cu por ehempel cu na momento cu partido MEP a drenta gobierno siete aña pasa y a tuma un decision pa core cu tur comisario, nan no argumenta nada tampoco y a core cu tur hende y a nombra nan friends and family. Nan ta papia aworaki di good corporate governance. Mi tambe ta pro esey, pero e ora e mester ta hendenan cu ta prepara, educa y cu a ser selecta basa riba nan experiencia, experticio y no basa riba nan afiliacion cu partido politico,” e mandatario a enfatisa.

Minister Dowers a sigui splica cu loke a constata na Elmar specificamente, ta cu tabatin un rapport forensico haci na Elmar e tempo aya cu a duna indicacion hopi cla di actonan cu ta mustra den direccion di corupcion y mal maneho di organisacion.

“E tempo ey a scoge pa kita tur hende di directiva di Elmar, conseho a ser traha door di e director e tempo ey sosteni door di raad van commissaris. A core cu tur y no a haci ningun investigacion di loke realmente tabata pasa den e compania. Ta asina tambe cu a core cu e director,” el a indica.

E mandatario a señala cu den tempo cu oposicion a kita tur hende di directiva, e parti pa defende interes di famia cu tabata dirigi e companianan aki a prevalece riba mantenemento di un persona cu tabata bringando pa transparencia y pa para corupcion den organisacion.

Minister Dowers a sigura cu nan tin tur confiansa cu si mantene e hendenan aki, cu lo por haci decisionnan cu mester haci.

El a agrega cu den e dianan dilanti e lo presenta e informacion cu e tin na Ministerio Publico tambe, cu ta demostra, den su concepto, cu actonan di corupcion tabata tuma luga na desbentaha di e compania di utilidad y probablemente na desbentaha di pueblo.

El a indica cu e informacion cu el a ricibi ta cu door cu material tabata ser cumpra otro caminda y no ta materialnan cu ta esnan cu nan tabata custuma cune cu ta cumpli cu standardnan mas halto, cu hasta esey lo por tabatin consecuencia den e parti di suministro di coriente y por ta causa parti di problemanan cu e isla a conoce e ultimo temponan tambe.

Pa loke ta e sentencia di hues den cual ta indica cu e decisionnan di retiro no tabatin suficiente motivacion y no a logra duna rasonamento concreto pa e perdida di confiansa reclama, minister Dowers a splica cu na e momento ey e tabata implica den Utilities Aruba NV. Pero awor cu si e ta implica den e companianan di utilidad loke nan ta bay haci ta cu bay motiva cada un caso pakico ta haya necesario cu e hendenan aki no por keda den nan funcionnan mas.

El a sigura cu e caso aki no tin nada di haber cu politica riba su mes. El a duna como ehempel cu na momento cu el drenta gobierno, bou di su mando tin directivanan cu el a bin topa cu nan cu tur di nan ta sinta ainda pasobra no tin ningun rason pa kita nan. “Nos no ta bay tras di niun hende politicamente,” el a enfatisa.

E mandatario a sigura cu ta bay demostra cu door cu tabatin relacion estrecho cu cierto politiconan, con esaki tabata faborece cierto hendenan y con placa cu mester a bay den saco di comunidad of por lo menos den saco di pagado di belasting, den caha di gobierno, a bay den saco di hendenan cerca di famia.

Tocante si ta bay apela of no e decision di hues, minister Dowers a indica cu nan ta tuma otro paso, y ta verwacht cu ta bin otro procedura.

Por ultimo el a aclaria cu e comisarionan cu a ser buta door di gobierno AVP-FUTURO ta na Utilities y nan t’ey y niun a ser kita pasobra e forma con nan a haci’e tabata hustifica. Ta solamente den e companianan di utilidad cu ta cay bou di Utilities tin hendenan cu a bay cas.