Luna di october ta luna di conscientisacion di cancer di pecho, un luna cu diferente fundacion ta dedica na conscientisa comunidad riba salud di pecho, pero tambe salud general. Bon Dia Aruba a combersa cu presidente di fundacion Koningin Wilhelmina Kankerfonds Heydee Henriquez ken a conta tocante e retonan cu e fundacion ta enfrenta y tambe e cifranan di mortalidad di pashentnan di cancer di pecho y otro tipo di cancer.

Den luna di october aña pasa e directiva di e fundacion a cambia y Henriquez a ser nombra como presidente di e fundacion.

Den su prome aña como presidente di e fundacion, el a splica cu semper tin retonan nobo, y cu casi 65 aña di existencia e fundacion a yega di surpasa hopi reto. Pero un di e retonan cu e ta mira cu ainda mester traha riba dje ta e parti di modernisacion y digitalisacion. Digitalisacion di e sistema, di folders, entre otro, cu ta haci cu e trabou di e personanan cu ta yuda e fundacion mas facil.

Otro aspecto cu el a indica ta un reto pa aña ta e dificultad pa por haya boluntario. El a indica cu actualmente boluntarionan cu ta traha den e oficina di e fundacion ta personanan cu edad hopi halto, niun no ta baha di 60 aña. El a conta cu por ehempel dos luna pasa un boluntario di 80 aña retira di e fundacion, y ainda tin otro personanan cu edad halto cu keto bay ta yuda e fundacion.

“Pa haya boluntario ta hopi dificil pasobra aunke e ta un bunita trabou, hopi hende toch ta scucha e palabra cancer y no por deal cune facil. Pero ta importante pa nan acerca nos pasobra tin diferente trabounan cu nos ta haci. E boluntarionan aki no lo traha directamente cu e pashentnan, pero nos tin trabou administrativo den oficina,” el a indica.

Henriquez a splica cu e fundacion tin hopi trabou. Actualmente nan lo desea di atares boluntarionan mas hoben cu por yuda cu e website di e fundacion of pa traha video y contenido pa pone riba website y rednan social.

El a sigui splica tambe cu ora nan tin e coleccion den luna di april cu mei, esaki ta tuma luga tur diasabra riba caya pa cual tambe nan tin mester di boluntario, pero prome y despues di esey tin trabou tambe manera pidi permiso di polis, registra tur hende cu ta bay ta riba caya, zorg pa tur material ta limpi, registra tur busjes ora nan sali riba caya, entre otro.

Despues di un coleccion e busjes cu placa mester ser entrega back na un persona, ken lo ta encarga pa cuida y trece e busjes nan back. Despues di esey mester conta e placa cu a ser colecta, cual el a indica semper tabata den colaboracion cu Banco di Caribe. “E ta un full plan y proyecto riba su mes pa e dianan ey di colecta placa,” el a remarca.

E aña aki, Henriquez a indica, e fundacion no a logra organisa e colecta cu ta ser organisa den luna di mei y april.

El a splica cu for di aña pasa nan a acerca e miembronan di club di brommer di Harley pa nan haci un dia di collect pa e fundacion, cual a tuma luga riba un diadomingo solamente, durante dos ora, pa motibo di e solo, na diferente parti di e isla.

Durante e colecta ey nan a logra colecta alrededor di 16 mil florin, cu den comparacion cu añanan anterior cu e colecta ta tuma luga henter luna, , e no tabata hopi.

Pero pa yuda recauda mas fondo pa cubri tur nan gastonan, dia 30 di november e fundacion ta bay tin e actividad “Ride for the Roses”. Cual ta un caminata conhuntamente cu coremento di bicicleta.

Cu e actividadnan aki Koningin Wilhelmina Kankerfond ta recauda fondo pa yuda cubri tur e gastonan cu e fundacion tin pa por sigui ofrece nan diferente tipo di servicio na e pashentnan di cancer.

E fundacion no ta ricibi subsidio for di gobierno y pues ta depende completamente riba recaudacion di fondo y donacionnan cu nan ta ricibi.

El a indica cu ultimo añanan aki locual nan ta confrontando hopi ta cu e hobennan ya no ta para mas, nan no tin e mesun smaak, solo ta hunga un rol fuerte den esaki, locual ta haci un diferencia pa e fundacion.

Pa loke ta trata cifranan, Henriquez a enfatisa cu e cifranan cu nan tin ta cifranan di e fundacion so, basa riba nan clientenan y no cifranan general di pais Aruba pa loke ta trata pashentnan di cancer.

Pa loke ta personanan cu a fayece pa motibo di cancer di pecho, el a indica cu aña pasa 14 persona a fayece, y e aña aki te cu luna di juli e cifra ey ta nuebe, cual ta basta halto si compara ambos aña.

Den caso di cancer di prostaat, e cifra di mortalidad aña pasa tabata 13, y e aña aki ta cu juli e cifra aki ta 6.

Otro cancer cu cifra halto tambe ta cancer di colon cu aña pasa tabatin 14 persona cu a fayece y e aña aki te cu luna di juli e ta 10, cual ta basta halto.

Casonan di mortalidad di cancer di higra tambe ta subiendo. El a indica cu aña pasa tabatin seis persona cu a fayece pa motibo di cancer di higra y e aña aki te cu luna di juli el a subi te na ocho.

Otro tipo di cancer cu ta un tiki halto, pero cu a baha toch e aña aki ta cancer di cerebro. Aña pasa tabatin cinco persona cu a fayece y e aña aki te cu luna di juli ta tres.

Pues mirando e cifranan di e fundacion cancer di pecho, prostaat, higra y di colon ta e tiponan di cancer cu tin e cifranan di mortalidad mas halto.