(AP) – D’Angelo, e cantante di ganador di Grammy y R&B pa su bos y pa hala atencion cu e video musical di “Untitled (How Does It Feel)”, a fayece cu 51 aña.
E cantante, ken su nomber real tabata Michael Eugene Archer, a fayece diamars despues di un lucha largo cu cancer segun su famia a informa via un comunicado.
El a yam’e “un strea briyante den nos famia y a paga su luz pa nos den e bida aki,” agregando cu nan ta “eternamente gradici pa e legado di musica extraordinariamente conmovedor cu e ta laga atras.”
Den su musica, D’Angelo a mescla hip-hop, soul y e emocion di gospel den un sonido cu a yuda lidera e movemento di genero neo-soul den 1990. Anteriormente e ana aki, e nativo di Virginia a celebra e di 30 aniversario di su album “Brown Sugar,” un album cu a logra platinum y a trece hitnan manera “Lady” y e cancion principal.
E album di 1995 a logra haya varios nominacion di Grammy y a cementa su persona como un di e bosnan mas original di R&B.
D’Angelo su estilo vocal – un mescla di textura y fuides iconico di misa – ta pone apart di su coleganan. E bos aki a bira inseparable di e visualnan di su hit den ana 2000 “Untitled (How Does It Feel).” E video musical a bira un tesoro cultural, causando combersacionnan tocante arte, sexualidad y vulnerabilidad den representacion di hende homber di color scur. E cantica a logra un Grammy pa Best Male R&B Vocal Performance y a impulsa su album “Voodo,” yegando e Billboard 200 chart y ganando e Grammy pa miho album di R&B.
Cu un spirito cu no ta hopi diferente na esun di Prince, D’Angelo su devocion semper tabata den man di e arte – no e mashin rond di esaki. Den un entrevista di 2000 cu The Associated Press, el a papia tocante e costo di busca exito comercial.
“Musiconan a keda pega den e modo di pensa tocante kico por bende y kico ta comercial. Esaki ta destrui arte, e ta destrui e esencia di loke esaki ta,” el a bisa. “Bo no por, bo no por traha asina. Bo no por crea musica asina. Esey no ta loke e cos ki ta trata.”
E mesun aña aki, D’Angelo a refleha riba su necesidad pa soledad: “Mi tabata sali hopi, pero awo mi ta hopi mas un persona di keda paden,” el a bisa AP. “Mi kier pas y silencio.”
Mas aleu di su propio catalogo, D’Angelo su arte a briya den colaboracionnan. Su dueto cu Lauryn Hill den e balada “Nothing Even Matters,” un parti clave di su album “The Miseducation of Lauryn Hill.” Tambe el a contribui na The Roots su album den 1996 “Illadelph Halflife” y tabata parti di e super grupo Black Men United, cual a duna un cantica: “U Will Know,” cual D’Angelo a skirbi y co-produci pa e pelicula “Jason’s Lyrics” den 1994.
