Den nos edicion anterior, Bon Dia Aruba a reporta tocante areanan di beach publico riba cual ta pone propiedad priva – manera stoel – cu ta stroba otro hende di usa e area. Esaki ta algo cu hopi ciudadano local ta preocupa cune. Sinembargo, tin otro banda di e medaya: e invasion publico di propiedadnan priva.

Den nos edicion anterior, un lector a comparti cu na Mangel Halto, tin cierto cas ta cera e beach dilanti di nan propiedad, haciendo esaki inaccesible pa publico. Ademas di cera e area cu palo, ta pone lounge chair haciendo e espacio mustra como si fuera ta un espacio priva. Tampoco ta aceptable pa laga stoel priva poni riba espacio publico cu expectativa cu cualkier otro hende no mag di us’e.

Sinembargo, despues di publicacion, dos lector a acerca Bon Dia Aruba pa conta nan storia, unda ta mira cu e problematica aki tin mas aspecto. Un di nan (nomber y adres conoci pa redaccion) a conta cu e bario en cuestion ta un comunidad uni, cu a pesar cu nan no semper ta di acuerdo, ta existi pacificamente, ta intercambia idea respetuosamente, y ta cuida nan entorno colectivamente.

El a aclaria cu e pida palo cu tin entre e santo y caya no ta destina pa blokea acceso na usuarionan, sino cu e habitantenan mes a pone esakinan pa stop auto di para directamente riba santo. Hasta tabatin auto cu a bay den awa mes. E pida palo en realidad ta yuda tene e beach limpi y habri pa tur hende.

E ciudadano a sigui conta cu e stoel, benchi, mesa y swing cu tin canto di lama, ta diferente bisiña cu ta biba den e area a trece esakinan poco poco. Pero di esaki, no ta e intencion pa nan ta pa uso priva so. Residentenan di e area ta usa nan tur dia, y nan por ser usa tambe pa bishitante di Aruba y turista.

E persona aki a finalisa bisando cu tur hende cu ta bishita e area ta disfruta di e espacio sin restriccion.

Ken ta responsable?
 Un otro lector (nomber y adres conoci pa redaccion) a acerca Aruba pa conta e dificultadnan cu ciudadanonan ta pasa ora ta biba dilanti un beach. E persona aki ta biba den area di Malmok, y pa motibo di sobreturismo, e no por disfruta di su cas mas.

Tocante e tema di privatisacion di espacionan publico, e persona aki a conta cu e beach na su cas realmente si ta uno priva, ya cu e no tabata existi originalmente. Tabata pida baranca cu tabata conduci na lama, y e bisiñanan den e area hunto a paga pa rosa e mondi y trece santo blanco pa crea un beach riba nan propiedad. Asina mes, e ciudadano ta conta cu e no tin problema cu hende ta haci uso di e beach aki respetuosamente. E problema ta cu hopi no ta respeta.

Riba e potretnan por observa con cantidad di hende ta invadi e beach, ta laga sushi y obhetonan atras cu ta causa molester, y hasta sinta riba nan veranda di cas. Segun e persona a conta, hasta mucha a bula riba e trapi di su cas te cu a kibr’e.

Fuera di esey, sobreturismo dilanti un area residencial a bira un problema serio pa e habitantenan, cu hopi di nan ta adulto mayor cu a cumpra propiedad pa por biba un bida trankil. Pero awo, tin cantidad di auto ta para dilanti nan cas tur dia. Segun e ciudadano, a bira asina cu hasta ora su yiu of amigo kier bishita e cas, no por haya lugar pa para auto. E ATV/UTV cu ta yega den grupo ta causa desordo, y e barconan cu ta trece turista den e area ta toca musica duro y stroba e paz y trankilidad den e area. A bira asina erg cu e ciudadano mester tene cas cera pa motibo di e desordo cu tin tur ora.

Hasta e habitantenan ta haya nan bari sushi yen di sushi di otro hende, pasobra no tin control riba esey tampoco.

Y no ta solamente e hendenan den e area ta siendo afecta. Hopi di e turistanan cu ta yega e area no ta tene cuenta cu bida salvahe, y ta saca strea di lama for di awa, of ta mishi cu turtuga. Segun e habitante a conta, antes tabatin hopi turtuga di lama tabata subi traha nan neishi den e area, pero awo cu tanto druk, nan no sa mira nan mas.

Loke ta haci e situacion asina fastioso ta e hecho cu e habitantenan den e area mes ta cuida e area, siendo cu otronan ta gana placa cune y no ta tene cuenta. E ciudadano ta cuestiona por ehempel pakico esnan cu ta organisa tour no ta guia e turistanan pa respeta e area, siñando nan cu ta un area residencial unda hende ta biba, pa tene cuenta cu zonido y cualkier otro incomodidad, y sobre todo pa tene cuenta cu e bida salvahe. Al contrario, e guianan y organisador ta permiti y hasta incita e turistanan pa causa molester den e area, ta gana placa sacando potret, y no ta worry pa piki loke turistanan ta laga atras.

Mientras tanto, e habitantenan di e area ta paga tur luna pa laga haci e beach limpi, ta paga pa drecha e palapa, y cualkier otro gasto di mantencion den e area.

Bon Dia Aruba a puntra si a yega di yama polis ora e desordo ta bira demasiado. Pero e ciudadano a conta cu polis ta bin, nan ta baha musica un rato, y asina cu polis bay, ta bolbe his’e back. Autoridadnan tampoco ta pone borchi pa e turistanan tene cuenta cu regla y comportamento adecuado, y no ta realisa control pa sigura cu no ta causando molester indebido den e area.

E habitante a finalisa bisando cu ta compronde cu tur hende tin derecho di gana nan pan, pero mester haci esaki di un manera cu ta respeta e habitantenan y e bida salvahe den e area.