Diaranson atardi, Minister di Labor mr. Wendrick Cicilia a ricibi e inspectornan laboral acompaña pa Director Interino di DAO, Anthony Riviears. Durante nan bishita, nan a entrega Minister Wendrick Cicilia un plan di implementacion pa modernisa, fortifica y empodera e Departamento di Inspeccion Laboral.
Cumplimento cu nos leynan laboral ta importante y pa por garantisa cu tur dunado di trabao ta cumpli cu e leynan, ta necesario pa ekipa, aprecia y balora e departamento di inspeccion laboral, segun un comunicado di gobierno.
Den luna di juni, Minister Wendrick Cicilia a ricibi un evaluacion haci door di Inspeccion Laboral Hulandes cu a evalua nos sistema y tambe e departamento di inspeccion laboral na Aruba. Nan a produci un rapport “Modernisering Arbeidsinspectie Op Weg Naar betere Handhaving van Arbeidswetten”. Den e rapport cu Minister Wendrick Cicilia a ricibi, tin un total di 25 recomendacion pa modernisa y eleva inspeccion laboral.
Riba peticion di Minister Wendrick Cicilia, Directie Aarbeid en Onderzoek (DAO) a entrega un plan di implementacion demostrando con structuralmente lo implementa e 25 recomendacionnan. Cu sosten huridico cu Gobierno a provee, Minister a ricibi un plan di maneho pa ehecuta e recomendacionnan. E plan tin como meta pa garantisa cu e organisacion interno ta eficiente.
Minister Wendrick Cicilia a haci e compromiso cu lo agrega sosten huridico na e Departamento di Inspeccion Laboral pa garantisa cu den futuro por impone multa y sanciona incumplimento di e leynan laboral.
Durante e presentacion, e inspectornan a expresa cu ta te despues di 22 aña, un Minister di Labor ta sinta na mesa cu e inspectornan laboral kende ta e defensornan di e leynan laboral di Aruba.
Pa Minister Wendrick Cicilia, e trankilidad di e empleadonan ta importante y ta comprometi cu lo reenforsa e inspeccion laboral den e structura economico di nos pais.
