Diaranson un usuario riba Facebook a publica un video di loke ta parce manchanan blanco apareciendo riba e superficie di lama. Segun e usuario, e manchanan ta indica un derame di azeta for di e naufragio cu tin mas cu 80 aña riba fondo di lama y ta urgi pa intervencion inmediato di autoridad como cu esaki ta presenta un menasa grandi pa bida marino y ecosistemanan di Aruba. E publicacion aki a bira viral riba e plataforma, y varios den comunidad a expresa nan frustracion y preocupacion.
Yama e “Barco di Spirito”, SS Antilla ta e naufragio mas grandi y mas bishita na e costa di Aruba. E ta localisa na Malmok y ta tin un largura di 400 pia. E barco aki tabata den operacion y a sink durante e Segunda Guera Mundial na aña 1940, mas cu 80 aña pasa.
Despues di e haci e publicacion, hopi hende den comunidad a cuminsa pone nan comentario unda hopi a enfatisa cu esaki ta un fenomeno cu ya tin hopi tempo ta pasando sin ningun intervencion for di autoridadnan. Manera varios a menciona, SS Antilla tin añas ta leak, algun bisando cu e tin ya 60 aña. Otro usuario a reafirma esaki, splicando cu “aworaki cu no tin biento zo y zo e azeta ta keda para eynan. Pero semper e [tabatin] leak hopi pa aña caba. Tur dia mi ta eynan y ta tur dia mi [tabata] wak azeta.” E usuario aki a sigui splica cu e motibo pakico no a saca e barinan di azeta den e barco ainda ta pasobra esakinan ta demasiado fragil, insinuando cu nan por kibra facilmente si por hisa nan. Sinembargo, e informacion aki Bon Dia Aruba no por a confirma.
Loke ta sobresali den e comentarionan ta un falta di sorpresa entre usuarionan, unda hopi tambe a afirma e prome comentario cu e azeta tin hopi tempo ta leak. Es mas, tabata aparente entre comentarionan directamente bao di e publicacion cu ta existi un cansancio pa e falta di intervencion adecua di esnan den gobernacion. Manera un usuario a bisa den Ingles: “Bo ta papiando di Aruba. Mi ta duda [cu gobierno lo haci algo] al menos un hende menasa nan cu multa.” Otro usuario a bisa cu “desafortunadamente, nos gobierno no lo haci nada.”
Bon Dia Aruba a purba tuma contacto cu Crisis Management Office (CMO) cual ta e instancia directamente responsable pa atende asuntonan di derame di petroleo, entre otro, pa por haya mas informacion tocante e derame aki na SS Antilla, pero te ciere di e edicion aki no por a logra haya contacto cu e director Sr. Rino Hermans.
Den pasado, CMO a bati alarma y a tuma accion inmediato pa casonan di derame di petroleo, notablemente na maart 2024 unda a mira un derame masivo cerca di Trinidad y Tobago, cual a alerta varios otro nacion den Caribe y a rekeri medidanan di intervencion. E tempo ey, CMO a bisa a declara na prensa internacional cu Gobierno di Aruba tabatin planea pa activa un ekipo di 60 hende, cu tabata inclui personal di prome auxilio y personal di limpiesa, pa atende cu e situacion di derame di petroleo si esaki lo yega costa di Aruba. Sinembargo, te awor no tin medidanan conoci pa aborda e situacion na SS Antilla.
