Gobierno ta monitor situacion di tempo den region

Diabierna mainta, Gobierno di Aruba a yama un conferencia di prensa pa asina duna informacion riba un posibel disturbio of mal tempo den Atlantico cu ta moviendo den direccion west. Ta trata te na e momento aki di un posibel ola tropical cu ta acercando nos area den transcurso di otro siman.

Prome Minister Mike Eman a indica cu relaciona cu e situacion di tempo, ta monitoriando e situacion di cerca hunto cu Crisis Management Office (CMO) y Departamento Meteorologico Aruba (DMA).

Eman a bisa cu nan a ricibi hopi pregunta tocante “un sistema cu tin na e momentonan aki den Atlantico, un sistema cu diferente di e instancianan ta pronostica cu segun cu e dianan ta bay por desaorya su mes den un tropical wave, y pa e motibo ey nos a haya importante pa informa nos comunidad kico ta e sentimentonan di Meteorologische Dienst na e momentonan aki.”

“Pa locual ta trata e dianan di fin di siman, ta spera cu e sistema aki no a yega akibanda ainda, probablemente e ta yega den nos area y cu efectonan den nos area rond di diaranson cu diahuebs, si e sigui e curso aki. Y logicamente si e sistema sigui desaroya su mes y bira mas fuerte, e por bira en berdad un tropical wave, cu hopi awasero, cu biento, lamanan bruto. Y esaki ta algo cu nos kier a anticipa cu tempo, y tambe pa motibo cu tin asina hopi publicacion nan awendia rond di pronosticonan di tempo ta importante tambe pa nos por duna nos comunidad e contexto dentro di cual nos tin cu mira e publicacionnan cu nos ta hayando na e momentonan aki.”

Eman a continua cu pa weekend mes, nan ta spera “cu e por keda fresco asina.” El a menciona cu tin un evento grandi tumando lugar di turismo, Autentico, den fin di siman, y cu no ta spera cu no e tempo lo stroba e evento, ya cu e sistema no lo a yega cerca nos ainda. Pero por mira si cu e lo tin influencia si riba Aruba, advertiendo cu si tin posibilidad pa awasero, a pesar cu no tin pronostico pa esaki ainda, pero tempo por cambia.

Eman a bisa cu ta hopi pendiente pa “awasero hopi fuerte” riba diaranson y diahuebs, ora cu ta spera cu e sistema di tempo lo ta yegando den area di Aruba. El a agrega cu ta haciendo cierto preparacion pa cu e awasero potencial aki. Departamentonan di gobierno ta haciendo algun trabao di mantencion den diferente area di nos isla, entre otro Bubali, San Miguel y Keito pa evita cu acumulacion di awa por bay causa posibel molester. “Pa e areanan sigur di San Miguel nos ta bezig ta monitoria e nivel di awa den Bubali Plas, y eynan nos ta tumando precaucionnan, cu si mester en todo caso lo regula e nivel. Nos tin un tiki espacio awo pa locual ta trata e awa mas limpi, na e parti ariba di Bubali Plas, pa por maneha tambe e nivel di loke ta Bubali Plas.”

Tocante preparacionnan pa temporada di yobida, premier Eman a bisa tambe cu DOW tin algun luna caba ta preparando e rooinan y afvoersysteem, y cu ta tumando precaucion ya cu actualmente ta den temporada di horcan y tabata kier prepara pa cualkier eventualidad cu por tin. Tambe el a bisa cu hunto cu Crisis Management a prepara un plan pa atende por ehemplo cu e falta di capacidad pa pomp awa, ya cu na Aruba ora di awasero ta yena hopi lihe cu awa, y ta afecta lugarnan sensitivo tambe manera casnan di cuido, scol, etc.

Eman a bisa ademas cu “Aruba ta prepara” pa un potencial horcan, y pa atende yamada di comunidad cu mester ayudo den caso di un calamidad. El a bisa cu ta evalua e grado di emergencia pa cada yamada pa determina nan urgencia pa ricibi prioridad, ya cu no por atende tur yamada cu mesun velocidad. Pero el a bisa cu tin un sistema pa atende tur e informacion cu por yega y dirigi e instancianan cu tin cu mobilisa pa atende cu e emergencia.

Pa loke ta un potencial blackout, unda comunicacion ta interumpi, prensa a puntra tocante posible shelter, pakico no ta informa di un localidad di manera adelanta, ya cu si tin interupcion den comunicacion, lo bira dificil pa hende sa unda pa bay pa shelter. Premier Eman a bisa cu na e momento aki ainda no ta sigur cu e sistema di tempo lo por crea un problema pa Aruba, y pues no a considera ainda cu ta momento pa prepara shelter.

Premier Eman a remarca riba e importancia di anticipa e informacion na comunidad. Teniendo na cuenta e diferente publicacionnan cu ta awendia na alcance di comunidad, ta na su luga pa duna e comunidad e contexto cual tin cu mira e pronostico di tempo.

El a pidi comunidad pa keda pendiente di mensahenan cu lo presenta cu informacion necesario den proximo dianan. El a enfatisa cu kier a duna contexto di loke ta sucediendo pasobra e ta na haltura cu comunidad ta pendiente di pronosticonan di tempo regional riba rednan social y otro canal di comunciacion.

Den un comunicado di prensa, gobierno a agrega cu si acaso e disturbio aki haya mas structura, lo evalua e momento cu lo yama un siguiente conferencia di prensa pa tene e comunidad na altura di e posibel cambionan y potencial consecuencia pa nos isla.

Pueblo por ta trankil cu ainda no ta papia di un formacion di un sistema tropical organisa pero ta urgi comunidad pa monitoria DMA su website oficial www.meteo.aw pa cualkier cambio.

Eman a agrega cu a palabra cu Meterologische Dienst y Crisis Management cu si e sistema cambia y desaroya den un peliger pa tempo di Aruba, lo bin back cu otro boletin di informacion pa pueblo, y cu tin un schedule pa keda monitoria den weekend.

E sistema ta dos mil kilometer leu di distancia di lama Caribe te ultimo cu a monitoria. Probablidad ta 20/30%. Si bira depresion tropical lo por haya algun impacto chikito. Ta hopi prematuro pa bisa un pronostico exacto pero no tin indicacion di un horcan te na e momentonan aki. Si acaso e disturbio bira un horcan, nos lo ta papiando e ora di horcan Melissa.