(AP) — NFL no ta reconsiderando kita Bad Bunny como su presentacion principal den halftime di Super Bowl, segun comisionado Roger Goodell a bisa ayera, reafirmando e decision pa pone e artista Portoriqueño riba e escenario mas grandi di e liga, cu a ricibi critica di presidente Mericano, Donald Trump, y algun sostenedor.
Goodell a papia tocante e controversia relaciona cu Bad Bunny na su conferencia di prensa despues di e reunion anual di propietario den herfst. Esaki ta e prome biaha cu el a comenta tocante e decision anuncia fin di september, cu a ricibi atencion mundialmente, incluyendo un aumento den stream di musica di Bad Bunny, como tambe critica.
“E ta pensa cuidadosamente,” Goodell a bisa. “Mi no ta sigur nos a yega di selecta un artista unda nos no a ricibi algun critica. Ta hopi dificil pa haci ora bo tin literalmente cienmiles di hende ta mirando.”
Bad Bunny, 31, kende su nomber legal ta Benito Antonio Martinez Ocasio, tabata explicito den su oposicion contra presidente Trump y su politica. El a dicidi di haci un residencia di 31 dia na Puerto Rico, evitando presentacion den Merca continental, citando preocupacion tocante e deportacion masivo di Latino.
E ta canta den Spaño y ta spera di haci esaki na e Super Bowl.
“Nos tin confiansa cu e ta bay ta un tremendo show,” Goodell a bisa, reconociendo cu lo por tin mas talento agrega na e lineup hunto cu Bad Bunny. “E ta compronde e plataforma riba cual e ta, y mi ta kere ta bay ta un momento emocionante y uni.”
San Francisco 49ers ta anfitrion di e Super Bowl dia 8 di februari na Levi’s Stadium na Santa Clara, California. No ta cla si Trump tin plan pa presencia e evento, maske el a haci atende eventonan deportivo mayor en persona un parti significante di su di dos termino den Cas Blanco.
Den un entrevista riba noticiero Newsmax, Trump a bisa cu e “nunca a yega di tende” di Bad Bunny. “Mi no sa ken e ta,” Trump a bisa. “Mi no sa pakico nan ta haciendo e. E ta manera loco. Y djey nan ta culp’e riba algun promotor cu nan a contrata pa scoge entretenimento. Mi ta kere ta absolutamente ridiculo.”
Goodell a defende e decision diaranson, splicando cu a hacie pa motibo di e popularidad inmenso di Bad Bunny.
“E ta un di e entretenedornan lider y mas popular na mundo,” Goodell a bisa. “Esey ta loke nos ta purbando di logra. E ta un escenario importante pa nos. E ta un elemento importante pa e balor di entretenemento.”
